अमरावती- शहरातील बेलपुरा परिसरात सोमवारी मध्यरात्री जमावाने पोलिसांवर हल्ला केला. या हल्ल्यात पोलीस निरीक्षकासह दोन शिपाई जखमी झाले आहेत.. या घटनेनंतर बेलपुरा परिसराला पोलीस छावणीचे स्वरूप आले असून हल्लेखोरांना घरातून अटक करण्याचे अभियान राबविण्यात आले.
शहरातील संवेदनशील भागांपैकी एक असणाऱ्या बेलपुरा परिसरात सोमवारी रात्री कुठल्यातरी कारणामुळे दोन गटात वाद झाला आणि हाणामारीला सुरुवात झाली. या घटनेची माहिती मिळताच राजापेठ पोलीस ठाण्याचे पोलीस निरीक्षक शेळके हे दोन शिपायांसह बेलपुरा परिसरात पोहचले. यावेळी त्यांनी दोन्ही गटातील लोकांना आवरण्याचा प्रयत्न केला असता दोन्ही गटातील जमावाने अचानक पोलिसांनाच मारहाण केली. या हल्ल्यात पोलीस निरीक्षक शेळके यांच्यासह दोन पोलीस शिपाई गंभीर जखमी झालेत. या तिघांनाही जिल्हा सामान्य रुग्णालयात उपचारासाठी दाखल केले.