जिल्हा बँकेच्या आजी-माजी अध्यक्षांनी शेतकऱ्यांची फसवणूक केली - बच्चू कडू

शेतकऱ्यांपेक्षा स्वतःचे हित जोपासणाऱ्या बँकेच्या आजी-माजी अध्यक्षांनी शेतकऱ्यांची फसवणूक केली. ज्यांच्याकडे बँकेची जबाबदारी होती त्यांनीच बँकेचा बट्ट्याबोळ केला असल्यामुळे मी मोठ्या पदावर असतानाही जिल्हा बँकेची निवडणूक मला लढवावी लागत आहे, हे खरं तर दुर्दैवी आहे, असे राज्यमंत्री बच्चू कडू यांनी म्हटले आहे.

अमरावती -जिल्ह्यातील शेतकऱ्यांना बळकट करणे, त्यांना आधार देणे यासाठी जिल्हा बँकेचे महत्त्व हे अनन्यसाधारण असते. मात्र अमरावती जिल्हा बँकेच्या आजी-माजी अध्यक्षांनी गेल्या अकरा वर्षांत पार वाटोळे केले आहे. शेतकऱ्यांपेक्षा स्वतःचे हित जोपासणाऱ्या बँकेच्या आजी-माजी अध्यक्षांनी शेतकऱ्यांची फसवणूक केली. ज्यांच्याकडे बँकेची जबाबदारी होती त्यांनीच बँकेचा बट्ट्याबोळ केला असल्यामुळे मी मोठ्या पदावर असतानाही जिल्हा बँकेची निवडणूक मला लढवावी लागत आहे, हे खरं तर दुर्दैवी आहे. मात्र शेतकऱ्यांच्या हितासाठी दुसरा इलाजच उरला नसल्याने मी निवडणूक रिंगणात असल्याचे राज्यमंत्री बच्चू कडू यांनी म्हटले आहे.

पालकमंत्री आणि राज्य मंत्र्यांच्या वर्चस्वाची लढाई -

अमरावती जिल्हा बँकेची निवडणूक 4 ऑक्टोबर रोजी होत आहे. या निवडणुकी पालकमंत्री यशोमती ठाकूर यांचे समर्थन असणाऱ्या विद्यमान संचालक मंडळाच्या गटविरोधात राज्यमंत्री बच्चू कडू यांच्यासह अमरावतीच्या आमदार सुलभा खोडके, धामणगाव रेल्वेचे आमदार प्रताप अडसड, आमदार राजकुमार पटेल, शिवाजी शिक्षण संस्थेचे अध्यक्ष व माजी मंत्री हर्षवर्धन देशमुख, माजी मंत्री वसुधा देशमुख यांच्या गट उभा ठाकला आहे. जिल्हा बँकेची निवडणूक यावेळी पालकमंत्री आणि राज्यमंत्र्यांच्या वर्चस्वाची लढाई असल्याचे चित्र सध्या जिल्ह्यात निर्माण झाले आहे. अकरा वर्षापासून जिल्हा बँकेवर काँग्रेसचे वर्चस्व आहे.

'शेतकऱ्यांऐवजी जोपासले कंपन्यांचे हित'

जिल्हा बँकेचे उद्दिष्ट हे जिल्ह्यातील शेतकऱ्यांचे हित जोपासणे असताना बँकेच्या संचालकांनी शेतकऱ्यांना कर्ज वाटप न करता कंपन्यांच्या म्युचल फंडमध्ये अधिक गुंतवणूक केली. याद्वारे कमिशन खाण्याचे काम केले. कर्ज मिळत नाही म्हणून शेतकऱ्यांना उपोषणावर बसावे लागले. अशी वेळ बँकेच्या विद्यमान सत्ताधाऱ्यांनी आणली. बँक रजिस्ट्रार, जिल्हा उपनिबंधक यांच्यासह नाबार्डने बँकेच्या कामावर आणि व्यवहारावर गंभीर आक्षेप घेतले आहे. यामुळे या बँकेचा परवाना रद्द होऊन बँक बरखास्त होण्याची शक्यता आहे. नवीन संचालक मंडळालाही भीती आगामी काळात राहणार आहे. खरं तर सर्वोच्च न्यायालयाने आदेश दिल्यानंतर या निवडणुका घेतल्या जात आहेत. बँकेची परिस्थिती अतिशय गंभीर असून जिल्ह्यातील शेतकऱ्यांना आधार मिळावा. शेतकऱ्यांचे हित जोपासल्या जावे यासाठीच बँकेच्या निवडणूक रिंगणात मला उतरावे लागले, असे मत बच्चू कडू यांनी व्यक्त केले आहे.

हेही वाचा -नवरात्रीच्या पहिल्या दिवसापासून राज्यातील सर्वधर्मीय धार्मिकस्थळं होणार खुली; मुख्यमंत्र्यांचा निर्णय