नवी दिल्ली - राजकीय निवडणूक रणनितीकार प्रशांत किशोर यांनी मंगळवारी दिल्लीत काँग्रेस अध्यक्षा सोनिया गांधी, राहुल गांधी आणि प्रियंका गांधी यांची भेट घेतली. या बैठकीनंतर अनेक प्रकारचे अंदाज बांधले जात आहेत. या बैठकीत शरद पवार यांच्या राष्ट्रपती पदाच्या उमेदवारीबद्दल चर्चा झाल्याची माहिती समोर आली होती. दरम्यान, या बैठकीत पंजाबमधील राजकीय परिस्थितीवर चर्चा झाली असल्याची माहिती आता समोर आली आहे.
प्रशांत किशोर यांनी सध्या देशातील विरोधी पक्षांच्या दिग्गज नेत्यांशी बैठकांचा सपाटा लावला आहे. याआधी प्रशांत किशोर यांनी मुंबईत राष्ट्रवादीचे अध्यक्ष शरद पवार यांची भेट घेतली होती. त्यानंतर पवार यांची दिल्लीतही प्रशांत किशोर यांची भेट झाली. शरद पवार यांच्या भेटीआधी प्रशांत किशोर यांनी शिवसेना पक्षप्रमुख आणि मुख्यमंत्री उद्धव ठाकरे यांचीही भेट घेतली होती. त्यामुळे काँग्रेसच्या भेटीनंतर अनेक तर्क लावले जात होते.