बंगालमधील 107 आमदार भाजपमध्ये प्रवेश करणार ; 'या' नेत्याचा दावा

बंगालमधील 107 आमदार भाजपामध्ये प्रवेश करणार असल्याचा दावा भाजपा नेते मुकुल रॉय यांनी केला आहे.

कोलकाता - तृणमूल काँग्रेस, सीपीएम आणि काँग्रेस या पक्षांचे मिळून तब्बल 107 आमदार भाजपामध्ये प्रवेश करणार असल्याचा दावा भाजप नेते मुकुल रॉय यांनी केला आहे.

सध्या गोवा आणि कर्नाटकमध्ये राजकीय नाट्य सुरू आहे. या पार्श्वभूमीवर पश्चिम बंगालमधील राजकारण देखील ढवळून निघाले आहे. 'विरोधी पक्षांचे १०७ आमदार हे येत्या काही दिवसात भाजपमध्ये प्रवेश करणार असून ते आमदार आमच्या संपर्कात आहेत', अशी माहिती आयोजीत पत्रकार परिषदेमध्ये बोलताना भाजपा नेते मुकुल रॉय यांनी दिली आहे.

तृणमुल काँग्रेस, काँग्रेस आणि मार्क्सवादी कम्युनिस्ट पार्टीच्या आमदारांचा यामध्ये समावेश असल्याचे त्यांनी सांगितले आहे. रॉय यांच्या या वक्तव्यामुळे बंगालमधील राजकारणात एकच खळबळ उडाली आहे. दरम्यान पश्चिम बंगालमध्ये भाजपा आणि तृणमूल काँग्रेसच्या कार्यकर्त्यांमध्ये हिंसक घटना घडत असतात.