ಕಾಲೇಜು ಶಿಕ್ಷಕರ ಆಂತರಿಕ ಕಲಹಕ್ಕೆ ಲಕ್ಷಾಂತರ ಮೌಲ್ಯದ ಲ್ಯಾಬ್ ಬಲಿ

130 ವರ್ಷಗಳ ಇತಿಹಾಸ ಹೊಂದಿರುವ ಸರ್ಕಾರಿ ಪದವಿಪೂರ್ವ‌ ಕಾಲೇಜಿನಲ್ಲಿ ಉಪನ್ಯಾಸಕರ ಅಂತಃಕಲಹದಿಂದ ಕಾರ್ಕಳ ಕಾಲೇಜು ಅಕ್ಷರಶ: ರಣಾಂಗಣವಾಗಿದೆ. ಬಯಾಲಜಿ ಶಿಕ್ಷಕಿ ಜಯಶ್ರೀ ಹೆಗ್ಡೆಯವರನ್ನು ವರ್ಗಾವಣೆಗೊಳಿಸಲು‌ ಹಾಗೂ ಅವರ ಮೇಲಿನ ದ್ವೇಷ ಸಾಧನೆಗಾಗಿ ಕಾಲೇಜಿನ ಲ್ಯಾಬ್ ನಾಶ ಮಾಡಲಾಗಿದೆ.

ಕಾರ್ಕಳ :ಇಲ್ಲಿನ ಸರ್ಕಾರಿ ‌ಪದವಿ ಪೂರ್ವ ಕಾಲೇಜಿನಲ್ಲಿ ಶಿಕ್ಷಕರ ನಡುವಿನ ವೈಯಕ್ತಿಕ ಜಗಳಕ್ಕೆ ಲಕ್ಷಾಂತರ ರೂಪಾಯಿ ‌ಬೆಲೆ‌ಬಾಳುವ ಬಯಾಲಜಿ ಪರಿಕರಗಳು ನಾಶವಾಗಿರುವ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ. ಹೊಸದಾಗಿ ಕಾಲೇಜಿಗೆ ವರ್ಗವಾಗಿರುವ ಬಯೋಲಜಿ ಶಿಕ್ಷಕಿಯನ್ನು ಎತ್ತಂಗಡಿ ಮಾಡಲು ಲ್ಯಾಬ್​ ನಾಶ ಮಾಡಲಾಗಿದೆ ಎಂಬ ಶಂಕೆ ವ್ಯಕ್ತವಾಗುತ್ತಿದೆ.

ಬಯಾಲಜಿ ಶಿಕ್ಷಕಿ ಜಯಶ್ರೀ ಹೆಗ್ಡೆಯವರನ್ನು ಈ ಕಾಲೇಜಿನಿಂದ ವರ್ಗಾವಣೆಗೊಳಿಸಲು‌ ಹಾಗೂ ಅವರ ಮೇಲಿನ ವೈಯಕ್ತಿಕ ದ್ವೇಷ ಸಾಧನೆಗಾಗಿ ಇಂತಹ ಕೃತ್ಯ ‌ಎಸಗಿದ್ದಾರೆ ಎನ್ನಲಾಗಿದೆ. ಈ ಘಟನೆ ಬಗ್ಗೆ ಪ್ರಾಶುಂಪಾಲ ಮಾಧವ್ ಭಟ್ ಪ್ರತಿಕ್ರಿಯಿಸಿ, ಇದನ್ನು ನಾವು ಮಾಡಿಲ್ಲ ಬದಲಾಗಿ ಬೆಕ್ಕುಗಳ ಉಪಟಳದಿಂದ ನಡೆದಿದೆ ಎಂದಿದ್ದಾರೆ.

ಬೆಕ್ಕುಗಳಿಂದ ಗಾಜುಗಳು ಒಡೆದು‌ ಹೋಗಬಹುದು‌. ಅದರೆ, ಮೈಕ್ರೋ ಸ್ಕೋಪ್ ಸೇರಿದಂತೆ ಹಲವಾರು ದಾಖಲೆಗಳು ಮಾಯವಾಗಲು ಹೇಗೆ ಸಾಧ್ಯ ಎಂದು ಬಯೋಲಜಿ ಶಿಕ್ಷಕಿ ಜಯಶ್ರೀ ಹೇಳುತ್ತಾರೆ.

ಪ್ರಕರಣದ ಹಿನ್ನೆಲೆ:

ಬಯಾಲಜಿ ಉಪನ್ಯಾಸಕಿ ಜಯಶ್ರೀ ಹೆಗ್ಡೆ ಕಳೆದ ಆಗಸ್ಟ್‌ನಲ್ಲಿ ಕಾರ್ಕಳ ‌ಪದವಿಪೂರ್ವ ಕಾಲೇಜಿಗೆ ವರ್ಗಾವಣೆಗೊಂಡಿದ್ದರು. ಬಳಿಕ‌ ಅನಾರೋಗ್ಯ ಕಾರಣ ಅವರು ಜನವರಿ 30 ರಂದು ಗೈರು ಹಾಜರಾಗಿದ್ದರು‌. ನಂತರ ಆರೋಗ್ಯ ಚೇತರಿಸಿದ ಬಳಿಕ ಮಾರ್ಚ್ 16 ರಂದು ಮತ್ತೆ ಕಾಲೇಜಿಗೆ ಬಂದಿದ್ದರು. ಆ ಬಳಿಕ ವಿದ್ಯಾರ್ಥಿಗಳ ಪರೀಕ್ಷೆ ನಂತರ ಮತ್ತೆ ಎರಡು‌ ತಿಂಗಳ ಕಾಲ ರಜೆಯಲ್ಲಿದ್ದು, ಜೂನ್ ತಿಂಗಳಿನಲ್ಲಿ ತರಗತಿ ಆರಂಭವಾಗಿದ್ದವು.

ತರಗತಿಗಳು ಪ್ರಾರಂಭವಾದ ಬೆನ್ನಲ್ಲೆ ಲ್ಯಾಬ್​ನ ಕೀ ನೀಡುವಂತೆ ಪ್ರಾಂಶುಪಾಲರ ಬಳಿ ಜಯಶ್ರೀ ಹಲವು ಬಾರಿ‌ ಮನವಿ ಮಾಡಿದ್ದಾರೆ. ಆದ್ರೆ ಪ್ರಾಂಶುಪಾಲರು ಇಂದು ನಾಳೆ ಎಂಬ ನೆಪ ಒಡ್ಡಿ ಕೊಠಡಿಯ ಬಾಗಿಲು ತೆಗೆಯದೇ ಸತಾಯಿಸಿ ಕೊನೆಗೆ‌ ಮಂಗಳವಾರ ಲ್ಯಾಬ್​ ಬಾಗಿಲು ತೆಗೆಯಲಾಗಿದೆ. ಬಾಗಿಲು ತೆಗೆದ ಮೇಲೆ ಲ್ಯಾಬ್​ ನಾಶವಾಗಿರುವ ಅಂಶ ಬೆಳಕಿಗೆ ಬಂದಿದೆ.