ಹೋರಿಗೆ ಶ್ರದ್ಧಾಂಜಲಿ ಸಲ್ಲಿಸಿದ ಹಮಾಲರ ಸಂಘ!

ಹಾವೇರಿಯಲ್ಲಿ ಹಮಾಲರ ಸಂಘ ಹೋರಿಗೆ ಶ್ರದ್ಧಾಂಜಲಿ ಸಲ್ಲಿಸಿ ಪ್ರಾಣಿ ಪ್ರೀತಿ ತೋರಿದೆ.

ಹಾವೇರಿ: ಪ್ರಸ್ತುತ ದಿನಗಳಲ್ಲಿ ಮನುಷ್ಯರು ತೀರಿ ಹೋದರೆ ಶ್ರದ್ಧಾಂಜಲಿ ಸಲ್ಲಿಸುವುದ ಸಾಮಾನ್ಯ. ಆದರೆ ಇಲ್ಲಿ ಅಶ್ವಮೇಧ ಎಂಬ ಹೋರಿಗೆ ಹಮಾಲರ ಸಂಘ ಶ್ರದ್ಧಾಂಜಲಿ ಸಲ್ಲಿಸಿ ಪ್ರಾಣಿ ಪ್ರೀತಿ ತೋರಿದೆ.

ಜಿಲ್ಲೆಯಲ್ಲಿ ಕಳೆದ 11 ವರ್ಷಗಳಿಂದ ಅಶ್ವಮೇಧ ಎಂಬ ಹೋರಿ, ಹೋರಿ ಬೆದರಿಸುವ ಸ್ಪರ್ಧೆಯಲ್ಲಿ ಪಾಲ್ಗೊಂಡು ನೂರಾರು ಬಹುಮಾನಗಳನ್ನು ಪಡೆದಿತ್ತು. ಇದರಿಂದ ಈ ಹೋರಿಗೆ ಅಭಿಮಾನಿ ಸಂಘಗಳು ಹುಟ್ಟಿಕೊಂಡಿದ್ದವು. ಆದರೆ 11 ವರ್ಷ ರಾಜನಂತೆ ಮೆರೆದ ಅಶ್ವಮೇಧ ಕಳೆದ ಭಾನುವಾರ ಅಸುನೀಗಿತ್ತು. ಈ ಹಿನ್ನೆಲೆಯಲ್ಲಿ ಅದರ ಅಭಿಮಾನಿಗಳಾದ ಹಾವೇರಿ ಹಮಾಲರ ಸಂಘ ಅಶ್ವಮೇದ ಹೋರಿಗೆ ಶ್ರದ್ಧಾಂಜಲಿ ಸಲ್ಲಿಸಿದ್ದಾರೆ.

ನಗರದ ಬಸವಣ್ಣ ದೇವಸ್ಥಾನದ ಮುಂದೆ ದೊಡ್ಡ ಕಟೌಟ್ ನಿಲ್ಲಿಸಿ ಪೂಜೆ ಸಲ್ಲಿಸಲಾಯಿತು. ನಂತರ ಭಕ್ತರಿಗೆ ಪ್ರಸಾದ ವಿತರಿಸುವ ಮೂಲಕ ಸಂಘ ವಿಶಿಷ್ಟವಾಗಿ ಶ್ರದ್ಧಾಂಜಲಿ ಸಲ್ಲಿಸಿತು. ಈ ಸಂದರ್ಭದಲ್ಲಿ ಹಮಾಲರ ಸಂಘದ ಸದಸ್ಯರು, ಬಸವೇಶ್ವರ ದೇವರ ಭಕ್ತರು ಇದ್ದರು.