ಹಳೆಯ ಟಿವಿ, ರೇಡಿಯೋಗೆ ಹೆಚ್ಚಿದ ಬೇಡಿಕೆ... ಗಾಳಿ ಸುದ್ದಿಗೆ ಮರುಳಾಗುತ್ತಿರುವ ಜನ!

ತಾಲೂಕಿನ ಗಾಣದಹೊಳೆ, ಹೆಬ್ಬಸಾಲೆ, ಬೆಳ್ಳೆಕೆರೆ ಸೇರಿದಂತೆ ಹಲವು ಗ್ರಾಮಗಳಲ್ಲಿ ಗಾಳಿ ಸುದ್ದಿ ವ್ಯಾಪಕವಾಗಿ ಹಬ್ಬಿದ್ದು, ಜನರು ಎಲ್ಲೋ ಮೂಲೆಯಲ್ಲಿ ಬಿಸಾಕಿದ್ದ ಹಳೆಯ ಟಿವಿ, ರೇಡಿಯೋಗಳ ಹುಡುಕಾಟಕ್ಕೆ ಮುಂದಾಗಿದ್ದಾರೆ.

ಸಕಲೇಶಪುರ(ಹಾಸನ) : ತಾಲೂಕಿನ ಹಲವು ಗ್ರಾಮಾಂತರ ಪ್ರದೇಶಗಳಲ್ಲಿ ಹಳೆಯ ಕಪ್ಪು ಬಿಳುಪು ಟಿವಿ , ರೇಡಿಯೋ ಹಾಗೂ ಟೇಪ್ ರೆಕಾರ್ಡರ್‌ಗಳಿಗೆ ವ್ಯಾಪಕ ಬೇಡಿಕೆ ಕಂಡು ಬಂದಿದ್ದು, ಗಾಳಿ ಸುದ್ದಿಗಳನ್ನು ನಂಬಿ ಕೆಲ ಜನ ಈ ಹಳೆಯ ವಸ್ತುಗಳಿಗೆ ದುಬಾರಿ ಬೆಲೆ ಕೊಟ್ಟು, ಕೊಳ್ಳಲು ಮುಂದಾಗುತ್ತಿದ್ದಾರೆ.

ತಾಲೂಕಿನ ಗಾಣದಹೊಳೆ, ಹೆಬ್ಬಸಾಲೆ, ಬೆಳ್ಳೆಕೆರೆ ಸೇರಿದಂತೆ ಹಲವು ಗ್ರಾಮಗಳಲ್ಲಿ ಈ ಗಾಳಿ ಸುದ್ದಿ ವ್ಯಾಪಕವಾಗಿ ಹಬ್ಬಿದ್ದು, ಜನರು ಎಲ್ಲೋ ಮೂಲೆಯಲ್ಲಿ ಬಿಸಾಕಿದ್ದ ಹಳೆಯ ಟಿವಿ, ರೇಡಿಯೋಗಳ ಹುಡುಕಾಟಕ್ಕೆ ಮುಂದಾಗಿದ್ದಾರೆ. ಹಾಗೆಯೇ ಕೆಲವು ಜನರು ಈ ವಸ್ತುಗಳನ್ನು ಖರೀದಿಸಿ ಶೇಖರಿಸಿಡಲು ಮುಂದಾಗುತ್ತಿದ್ದಾರೆ.

ಹಳೆಯ ಟಿವಿ

ಈಗಾಗಲೇ ಕೆಲವರು ಈ ಹಳೆಯ ಟಿವಿ ಹಾಗೂ ರೇಡಿಯೋಗಳನ್ನು ಹೆಚ್ಚಿಗೆ ಬೆಲೆ ನೀಡಿ ಖರೀದಿ ಮಾಡಿದ್ದು, ಯಾರಿಗೆ ಮಾರಟ ಮಾಡಬೇಕು ಎಂದು ತೋಚದೆ ಪರದಾಡುತ್ತಿದ್ದಾರೆ. ಸಾಮಾಜಿಕ ಮಾಧ್ಯಮಗಳಲ್ಲಿ ಈ ಹಳೆಯ ವಸ್ತುಗಳ ಬಗ್ಗೆ ಇಲ್ಲಸಲ್ಲದ ಸುದ್ದಿಗಳನ್ನು ಹಬ್ಬಿಸುತ್ತಿರುವ ಹಿನ್ನೆಲೆ ಜನರು ಈ ರೀತಿ ಮರುಳಾಗುತ್ತಿದ್ದಾರೆ. ಇದಕ್ಕೆ ಕಡಿವಾಣ ಹಾಕಬೇಕು ಎಂದು ಕೆಲವು ಸ್ಥಳೀಯರು ಆಗ್ರಹ ಮಾಡಿದ್ದಾರೆ.