ನಕಲಿ ಪ್ರಮಾಣ ಪತ್ರ ನೀಡಿ ಅಧಿಕಾರ ವಹಿಸಿಕೊಂಡ ಆರೋಪ: ಹಾಸನ ನಗರಸಭೆ ಸದಸ್ಯನ ವಿರುದ್ಧ ಕ್ರಮಕ್ಕೆ ಆಗ್ರಹ

ಸುಳ್ಳು ಜಾತಿ ಹೇಳಿ ಸದಸ್ಯರಾಗಿ ಆಯ್ಕೆಗೊಂಡಿರುವ​ ಆರ್. ಮೋಹನ್ ವಿರುದ್ಧ ಕ್ರಿಮಿನಲ್ ಮೊಕದ್ದಮೆ ದಾಖಲಿಸಿ ಹಾಗೂ ಸದಸ್ಯತ್ವ ರದ್ದು ಮಾಡುವಂತೆ ಒತ್ತಾಯಿಸಿ ನಗರಸಭೆಯ ಜೆಡಿಎಸ್ ಬೆಂಬಲಿತ ಸದಸ್ಯರುಗಳು ಅಧಿಕಾರಿಗಳಿಗೆ ಮನವಿ ಸಲ್ಲಿಸಿದರು.

ಹಾಸನ: ನಗರಸಭೆಯ 34ನೇ ವಾರ್ಡ್​ಗೆ ಸುಳ್ಳು ಜಾತಿ ಹೇಳಿ ಸದಸ್ಯರಾಗಿ ಆಯ್ಕೆಗೊಂಡಿರುವ​ ಆರ್. ಮೋಹನ್ ವಿರುದ್ಧ ಕ್ರಿಮಿನಲ್ ಮೊಕದ್ದಮೆ ದಾಖಲಿಸಿ ಹಾಗೂ ಸದಸ್ಯತ್ವ ರದ್ದು ಮಾಡುವಂತೆ ಒತ್ತಾಯಿಸಿ ಜೆಡಿಎಸ್ ತಾಲೂಕು ಅಧ್ಯಕ್ಷ ಎಸ್. ದ್ಯಾವೇಗೌಡ ನೇತೃತ್ವದಲ್ಲಿ ನಗರಸಭೆಯ ಜೆಡಿಎಸ್ ಬೆಂಬಲಿತ ಸದಸ್ಯರುಗಳು ಜಿಲ್ಲಾ ಉಪವಿಭಾಗಾಧಿಕಾರಿ, ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ, ಸಮಾಜ ಕಲ್ಯಾಣ ಇಲಾಖೆ ಅಧಿಕಾರಿಗಳಿಗೆ ಮನವಿ ಸಲ್ಲಿಸಿದರು.

ಈ ವೇಳೆ ಮಾತನಾಡಿದ ಜೆಡಿಎಸ್ ತಾಲೂಕು ಅಧ್ಯಕ್ಷ ಎಸ್. ದ್ಯಾವೇಗೌಡ, ಹಾಸನ ನಗರಸಭೆ ಚುನಾವಣೆಯಲ್ಲಿ 34ನೇ ವಾರ್ಡ್​​​ನಿಂದ ಪರಿಶಿಷ್ಟ ಪಂಗಡ ಮೀಸಲು ಕ್ಷೇತ್ರದಿಂದ ಬಿಜೆಪಿ ಅಭ್ಯರ್ಥಿ ಆರ್. ಮೋಹನ್ ಸ್ಪರ್ಧಿಸಿ ವಿಜೇತರಾಗಿದ್ದಾರೆ. ಮೋಹನ್​ರವರ ದಾಖಲಾತಿ ಪರಿಶೀಲಿಸಿದಾಗ ಇವರ ತಂದೆ ರಘುಪತಿ ರಾವ್. ಎಸ್ ಎಂದಿದೆ. ಇವರು ಮೂಲತಃ ಮರಾಠ ಸಮುದಾಯಕ್ಕೆ ಸೇರಿದವರು. 3(ಬಿ) ವರ್ಗದ ಅಡಿಯಲ್ಲಿ ಬರಲಿದ್ದು, ರಘುಪತಿ ರಾವ್​ರವರ ಶಿಕ್ಷಣ ಅವಧಿಯಲ್ಲಿ ಎಲ್ಲ ದಾಖಲಾತಿಗಳಲ್ಲಿ ಜಾತಿ ಮರಾಠ ಎಂದು ನಮೂದಿಸಲ್ಪಟ್ಟಿದೆ. ಆದರೆ ಇವರ ಮಗ ಮೋಹನ್ ವಿದ್ಯಾಭ್ಯಾಸದಲ್ಲೂ ಕೂಡ ಮರಾಠ ಜಾತಿ ಬರೆದಿರುವುದನ್ನು ತಿದ್ದಿ ಗೊಂಡ (ಎಸ್.ಟಿ.) ಎಂದು ಬರೆಯಲಾಗಿದೆ ಎಂದರು.

ಜಾತಿ ಬದಲಾಯಿಸಿ ಸುಳ್ಳು ಹೇಳಿಕೊಂಡು ನಗರಸಭೆ ಸದಸ್ಯರಾಗಿರುವ ಮೋಹನ್ ಬಗ್ಗೆ ಕೂಲಂಕಷವಾಗಿ ತನಿಖೆ ಮಾಡಿ ನ್ಯಾಯ ಒದಗಿಸಬೇಕು. ಇವರ ವಿರುದ್ಧ ಜೆಡಿಎಸ್ ಪಕ್ಷದಿಂದ ಸ್ಪರ್ದೆ ಮಾಡಿ ಪರಭವಗೊಂಡಿರುವ ಎನ್.ಟಿ. ಶ್ರೀನಿವಾಸ್​ರವರು ದೂರು ನೀಡಿದ್ದರೂ ಇದುವರೆಗೂ ಯಾವುದೇ ಕ್ರಮಕೈಗೊಂಡಿರುವುದಿಲ್ಲ ಎಂದು ದೂರಿದರು.

ಕೂಡಲೇ ಈ ಬಗ್ಗೆ ಗಮನವಹಿಸಿ ಮೋಹನ್ ಮೇಲೆ ಕ್ರಿಮಿನಲ್ ಪ್ರಕರಣ ದಾಖಲಿಸಿ ಕ್ರಮ ಜರುಗಿಸದಿದ್ದರೆ ಹಾಸನ ನಗರಸಭಾ ಚುನಾಯಿತ ಸದಸ್ಯರುಗಳು ಹೋರಾಟ ನಡೆಸುವುದಾಗಿ ಎಚ್ಚರಿಕೆ ನೀಡಿದರು.