ಕುಂದಗೋಳ ವಿಧಾನಸಭಾ ಉಪ ಚುನಾವಣೆಗೆ ಕ್ಷಣಗಣನೆ... ಆಯೋಗದಿಂದ ಸರ್ವ ಸಿದ್ಧತೆ!

ಕುಂದಗೋಳ ವಿಧಾನಸಭಾ ಉಪ ಚುನಾವಣೆಗೆ ಕ್ಷಣಗಣನೆ-ಯಾವುದೇ ಅಡ್ಡಿ ಆತಂಕ ಇಲ್ಲದೆ ಮತದಾನ ನಡೆಸುವ ನಿಟ್ಟಿನಲ್ಲಿ 54 ಸೂಕ್ಷ್ಮ ವೀಕ್ಷಕರನ್ನು ನಿಯೋಜನೆ-ಕುಂದಗೋಳ ವಿಧಾನಸಭೆ ಕ್ಷೇತ್ರದಲ್ಲಿ ಬಿಜೆಪಿ ಮತ್ತು ಕಾಂಗ್ರೆಸ್ ಮಧ್ಯೆ ನೇರ ಹಣಾಹಣಿ.

ಹುಬ್ಬಳ್ಳಿ:ಕುಂದಗೋಳ ವಿಧಾನಸಭಾ ಉಪ ಚುನಾವಣೆಗೆ ಕ್ಷಣಗಣನೆ ಶುರುವಾಗಿದೆ. ಇಂದು ಬೆಳಗ್ಗೆ 7 ಗಂಟೆಯಿಂದ ಸಂಜೆ 6 ರವರೆಗೆ ಮತದಾನ ನಡೆಯಲಿದೆ‌. ಶಾಂತಿಯುತ ಮತದಾನಕ್ಕೆ ಚುನಾವಣಾ ಆಯೋಗ ಪೂರಕ ಕ್ರಮ ಕೈಗೊಂಡಿದ್ದು, ಒಟ್ಟು 214 ಮತಗಟ್ಟೆಗಳನ್ನು ನಿರ್ಮಾಣ ಮಾಡಿದ್ದು, ಇದರಲ್ಲಿ 33 ಸೂಕ್ಷ್ಮ,38 ಅತೀ ಸೂಕ್ಷ್ಮ ಎಂದು ಗುರುತಿಸಲಾಗಿದೆ.

ಚುನಾವಣೆಗಾಗಿ 916 ಸಿಬ್ಬಂದಿ ನಿಯೋಜನೆ ಮಾಡಲಾಗಿದೆ. ಇದರಲ್ಲಿ 2 ಸಖೀ ಮತಗಟ್ಟೆ, 54 ಸೂಕ್ಷ್ಮ ವೀಕ್ಷಕರ ನೇಮಕ, 157 ವಿವಿ ಪ್ಯಾಟ್‌ ಬಳಕೆ ಮಾಡಲಾಗುತ್ತಿದೆ.

ಸೂಕ್ಷ್ಮ ವೀಕ್ಷಕರ ನೇಮಕ:

ಯಾವುದೇ ಅಡ್ಡಿ ಆತಂಕ ಇಲ್ಲದೆ ಮತದಾನ ನಡೆಸುವ ನಿಟ್ಟಿನಲ್ಲಿ 54 ಸೂಕ್ಷ್ಮ ವೀಕ್ಷಕರನ್ನು ನಿಯೋಜಿಸಲಾಗಿದೆ. ಮತಗಟ್ಟೆ ಸಂಖ್ಯೆ 35 ಮತ್ತು 37 ಎರಡು ಸಖೀ ಮತಗಟ್ಟೆ ಮಾಡಲಾಗಿದ್ದು, ಅಂಬೇಡ್ಕರ್‌ ನಗರದಲ್ಲಿರುವ ಮತಗಟ್ಟೆ ಸಂಖ್ಯೆ 45ರಲ್ಲಿ ಒಂದು ವಿಶೇಷಚೇತನರ ಮತಗಟ್ಟೆ ಮಾಡಲಾಗಿದೆ. ಮತಗಟ್ಟೆಗೆ ಬರಲಾಗದ ವಿಶೇಷಚೇತನರು ಮತ್ತು ವಯೋವೃದ್ಧರನ್ನು ಮತಗಟ್ಟೆಗೆ ಕರೆತಂದು ಮತದಾನ ಮಾಡಿಸುವ ಸ್ವಯಂ ಸೇವಕರಿಗೆ 50 ರೂ. ನೀಡುವ ಮೂಲಕ ಮತದಾನ ಹೆಚ್ಚಳಕ್ಕೆ ಕ್ರಮಕೈಗೊಳ್ಳಲಾಗಿದೆ.

18 ಸೆಕ್ಟರ್ ಅಧಿಕಾರಿಗಳ ಕಾರ್ಯನಿರ್ವಹಣೆ:

ಪ್ರತಿ ಮತಗಟ್ಟೆಗೂ ಅಗತ್ಯ ಇವಿಎಂ ಮತ್ತು ವಿವಿ ಪ್ಯಾಟ್‌ ನೀಡಲಾಗುತ್ತಿದ್ದು, ಇದರಲ್ಲಿ ಯಾವುದೇ ತೊಂದರೆ ಉಂಟಾದರೆ ಕೂಡಲೇ ಸರಿಪಡಿಸುವ ನಿಟ್ಟಿನಲ್ಲಿ ಹೆಚ್ಚುವರಿಯಾಗಿ 44 ಇವಿಎಂ, 157 ವಿವಿಪ್ಯಾಟ್‌ ವ್ಯವಸ್ಥೆ ಮಾಡಿಕೊಳ್ಳಲಾಗಿದೆ. ಅಲ್ಲದೆ, 10-15 ಮತಗಟ್ಟೆಗಳಿಗೆ ಒಬ್ಬ ಸೆಕ್ಟರ್‌ ಅಧಿಕಾರಿ ನಿಯೋಜನೆ ಮಾಡಲಾಗಿದ್ದು, ಒಟ್ಟು 18 ಸೆಕ್ಟರ್‌ ಅಧಿಕಾರಿಗಳು ಚುನಾವಣೆಯಲ್ಲಿ ಕಾರ್ಯನಿರ್ವಹಿಸಲಿದ್ದಾರೆ. ಪ್ರತಿ ಮತಗಟ್ಟೆಯಲ್ಲಿ ಕಾರ್ಯನಿರ್ವಹಿಸುವ ಚುನಾವಣಾ ಸಿಬ್ಬಂದಿಗೆ ಈ ಬಾರಿ ಅಂಗನವಾಡಿ ಕಾರ್ಯಕರ್ತೆಯರು ಊಟದ ವ್ಯವಸ್ಥೆ ಕಲ್ಪಿಸಲಿದ್ದಾರೆ‌.

ಕ್ಷೇತ್ರದ ಮತದಾರರ ಸಂಖ್ಯೆ:

• ಒಟ್ಟು ಮತದಾರರು: 1,89,437
• ಪುರುಷ ಮತದಾರರು: 97,526
• ಮಹಿಳಾ ಮತದಾರರು: 91,907
• ಹೊಸ ಮತದಾರರು: 4,705
• ಮತಕೇಂದ್ರಗಳು: 214
• ಸೂಕ್ಷ್ಮ ಮತಗಟ್ಟೆಗಳು: 25

ಕುಂದಗೋಳ ಕಣದಲ್ಲಿರುವ ಅಭ್ಯರ್ಥಿಗಳು:

1. ಕುಸುಮಾವತಿ ಶಿವಳ್ಳಿ, (ಕಾಂಗ್ರೆಸ್)
2. ಎಸ್.ಐ. ಚಿಕ್ಕನಗೌಡ್ರ, (ಬಿಜೆಪಿ)
3. ಭಂಡೀವಾಡ ಶೆಟ್ಟೆಪ್ಪ, (ಪಕ್ಷೇತರ)
4. ತುಳಸಪ್ಪ ದಾಸರ, (ಪಕ್ಷೇತರ)
5. ರಾಜು ನಾಯಕವಾದಿ, (ಪಕ್ಷೇತರ)
6. ಶ್ರೀಮತಿ ಗೋನಿ ಶೈಲಾ ಸುರೇಶ್, (ಪಕ್ಷೇತರ)
7. ಸಿದ್ದಪ್ಪ ಸತ್ಯಪ್ಪ ಗೋಡಿ, (ಪಕ್ಷೇತರ)
8. ಸೋಮಣ್ಣ ಮೇಟಿ, (ಪಕ್ಷೇತರ)

ಬಿಜೆಪಿ- ಕಾಂಗ್ರೆಸ್ ನಡುವೆ ನೇರ ಹಣಾಹಣಿ:

ಕುಂದಗೋಳ ವಿಧಾನಸಭೆ ಕ್ಷೇತ್ರದಲ್ಲಿ ಬಿಜೆಪಿ ಮತ್ತು ಕಾಂಗ್ರೆಸ್ ಮಧ್ಯೆ ನೇರ ಹಣಾಹಣಿ ಇದ್ದು, ಕಾಂಗ್ರೆಸ್​ನ ಕುಸುಮಾವತಿ ಶಿವಳ್ಳಿ ವಿರುದ್ಧ ಬಿಜೆಪಿಯ ಚಿಕ್ಕನಗೌಡ್ರ ಅವರು ತೀವ್ರ ಸ್ಪರ್ಧೆ ನೀಡಿದ್ದಾರೆ.

ಎಡಗೈ ಮಧ್ಯದ ಬೆರಳಿಗೆ ಶಾಹಿ:

ಲೋಕಸಭೆ ಚುನಾವಣೆಯ ವೇಳೆ ಮತದಾನ ಮಾಡುವ ವ್ಯಕ್ತಿಗಳ ಎಡಗೈ ತೋರು ಬೆರಳಿಗೆ ಶಾಹಿ ಹಾಕಲಾಗಿತ್ತು. ಈಗ ವಿಧಾನಸಭೆ ಉಪ ಚುನಾವಣೆಗೆ ಎಡಗೈ ಮಧ್ಯದ ಬೆರಳಿಗೆ ಶಾಹಿಯನ್ನು ಹಾಕಲಾಗುತ್ತಿದೆ.‌

ಪೊಲೀಸ್ ಬಿಗಿ ಭದ್ರತೆ:

ಕುಂದಗೋಳ ಉಪಚುನಾವಣೆ ಪ್ರಕ್ರಿಯೆ ಶಾಂತಿಯುತವಾಗಿ ನಡೆಸಲು 2 ಡಿವೈಎಸ್‌ಪಿ, 6 ಪಿಐ, 17 ಪಿಎಸ್‌ಐ, 41 ಎಎಸ್‌ಐ, 114 ಎಚ್‌ಸಿ, 144 ಪಿಸಿ, 260 ಹೋಮ್‌ ಗಾರ್ಡ್‌ ಹಾಗೂ 272 ಅರೆ ಸೇನಾ ಸಿಬ್ಬಂದಿ ಕಾರ್ಯನಿರ್ವಹಿಸಲಿದ್ದಾರೆ.