ಮಾತಿಗೆ ತಕ್ಕಂತೆ ನಡೆದ್ರೆ ಜಮೀರ್ ಸಿಎಂ ಮನೆ ವಾಚ್‌ಮ್ಯಾನ್ ಆಗಿರ್ಬೇಕಿತ್ತು : ​ಸಚಿವ ಸಿ ಟಿ ರವಿ

ಆಸ್ತಿ ಬರೆದುಕೊಡುತ್ತೇನೆ ಅನ್ನೋದು ಪ್ರಚಾರದ ಮಾತು. ಆಸ್ತಿ ಬರೆಯಲಿ, ಬಿಡಲಿ. ಆದರೆ, ಯಾರ್ಯಾರು ಈ ಡ್ರಗ್ಸ್‌ ಮಾಫಿಯಾದಲ್ಲಿ ತೊಡಗಿದ್ದಾರೆ ಅವರನ್ನು ಬೇರು ಸಮೇತ ಕಿತ್ತು ಹಾಕುವ ಕೆಲಸವನ್ನು ನಮ್ಮ ಸರ್ಕಾರ ಮಾಡುತ್ತೆ..

ಚಿಕ್ಕಮಗಳೂರು :ಯಡಿಯೂರಪ್ಪ ಸಿಎಂ ಆದರೆ ನಾನು ಅವರ ಮನೆ ಮುಂದೆ ವಾಚ್‌ಮ್ಯಾನ್ ಆಗುತ್ತೇನೆ ಎಂದು ಶಾಸಕ ಜಮೀರ್ ಅಹ್ಮದ್ ಹೇಳಿದ್ದರು. ಮಾತಿಗೆ ತಕ್ಕಂತೆ ನಡೆಯೋದಾದ್ರೆ ಅವರು ಸಿಎಂ ಮನೆ ಮುಂದೆ ವಾಚ್‌ಮ್ಯಾನ್​ ಆಗಿ ಇರುತ್ತಿದ್ದರು. ಎಂಎಲ್​ಎ ಆಗುತ್ತಿರಲಿಲ್ಲ ಎಂದು ಸಚಿವ ಸಿ ಟಿ ರವಿ ವ್ಯಂಗ್ಯವಾಡಿದ್ದಾರೆ.

ನಗರದಲ್ಲಿ ಮಾತನಾಡಿದ ಅವರು, ಜಮೀರ್​ ತಮ್ಮ ವಿರುದ್ಧದ ಆರೋಪ ಸಾಬೀತಾದ್ರೆ ತನ್ನ ಸಂಪೂರ್ಣ ಆಸ್ತಿ ಸರ್ಕಾರಕ್ಕೆ ಬರೆದು ಕೊಡುವುದಾಗಿ ಹೇಳಿದ್ದಾರೆ. ಆಸ್ತಿ ಬರೆದುಕೊಡುತ್ತೇನೆ ಅನ್ನೋದು ಪ್ರಚಾರದ ಮಾತು. ಆಸ್ತಿ ಬರೆಯಲಿ, ಬಿಡಲಿ. ಆದರೆ, ಯಾರ್ಯಾರು ಈ ಡ್ರಗ್ಸ್‌ ಮಾಫಿಯಾದಲ್ಲಿ ತೊಡಗಿದ್ದಾರೆ ಅವರನ್ನು ಬೇರು ಸಮೇತ ಕಿತ್ತು ಹಾಕುವ ಕೆಲಸವನ್ನು ನಮ್ಮ ಸರ್ಕಾರ ಮಾಡುತ್ತೆ. ಇಷ್ಟು ಗಂಭೀರ ತನಿಖೆ ಇದೇ ಮೊದಲು ನಡೆಯುತ್ತಿರುವುದು. ಈ ಬಗ್ಗೆ ತನಿಖೆ ಗಂಭೀರವಾಗಿ ನಡೆಯುತ್ತಿದೆ ಎಂದರು.

ನಂತರ ಜಿಹಾದ್ ಬಗ್ಗೆ ಮಾತನಾಡಿ, ಜಿಹಾದ್​ಗೆ ಹಲವು ಮುಖಗಳಿವೆ. ಅದರಲ್ಲಿ ಡ್ರಗ್ಸ್‌ ಮಾಫಿಯಾ ಕೂಡ ಇರಬಹುದು. ಪ್ರಮೋದ್ ಮುತಾಲಿಕ್ ಹುಡುಗಾಟದ ಹೇಳಿಕೆ ಕೊಡುವವರಲ್ಲ. ಅವರ ಹೇಳಿಕೆಯಲ್ಲಿ ಗಂಭೀರತೆ ಇರುತ್ತೆ ಎಂದು ಭಾವಿಸಿದ್ದೇನೆ. ಈಗ ತನಿಖೆ ಗಂಭೀರವಾಗಿ ನಡೆಯುತ್ತಿದೆ. ಹಲವು ಆಯಾಮಗಳಲ್ಲಿ ಭಯೋತ್ಪಾದಕ ಚಟುವಟಿಕೆಗೆ ಹಣ ಪೂರೈಕೆ ಸಂಬಂಧದ ಬಗ್ಗೆಯೂ ಸಂಶಯವಿದೆ.

ಲವ್ ಜಿಹಾದ್ ಬಗ್ಗೆ ಸಂಸದರು, ಪ್ರಮೋದ್ ಮುತಾಲಿಕ್ ಹೇಳಿದ್ದಾರೆ. ಹವಾಲ ಹಣದ ಬಗ್ಗೆಯೂ ಸಂಶಯವಿದೆ. ಎಲ್ಲವೂ ಕೂಡ ತನಿಖೆ ಹಂತದಲ್ಲಿದೆ. ರಾಜೀ ಇಲ್ಲದ ಕಾರಣ ತನಿಖೆ ಗಂಭೀರ ಸ್ವರೂಪ ಪಡೆದಿದೆ ಎಂದರು.