ನಾವ್ ಬೀಳೋದಿಲ್ಲ, ನೀವ್ ಕಟ್ಟೋದಿಲ್ಲ: ಬಿಜೆಪಿಗರಿಗೆ ಐವಾನ್ ಡಿಸೋಜಾ ಸವಾಲು

ಬಿಜೆಪಿಗರು ರಾಜಕಾರಣ ಮಾಡಲು ಅನ್ ಫಿಟ್ ಎಂದು ಕಾಂಗ್ರೆಸ್ ನ ವಿಧಾನ ಪರಿಷತ್ ಸದಸ್ಯ ಐವಾನ್ ಡಿಸೋಜಾ ವಾಗ್ದಾಳಿ ನಡೆಸಿದ್ದಾರೆ.

ಬಳ್ಳಾರಿ: ನಾವ್ ಬೀಳೋದಿಲ್ಲ.‌ ನೀವ್ ಮತ್ತೆ ಕಟ್ಟೋದಿಲ್ಲ. ಬಿಜೆಪಿಗರು ಸರ್ಕಸ್ ಮಾಡ್ತಿದಾರೆ​ ಎಂದು​ ಕಾಂಗ್ರೆಸ್​​ನ ವಿಧಾನ ಪರಿಷತ್ ಸದಸ್ಯ ಐವಾನ್ ಡಿಸೋಜಾ ವಾಗ್ದಾಳಿ ನಡೆಸಿದ್ದಾರೆ.

ಡಿಸಿ ಕಚೇರಿಯಲ್ಲಿಂದು ನಡೆದ ಸುದ್ದಿಗೋಷ್ಟಿಯಲ್ಲಿ ಮಾತನಾಡಿದ ಅವರು, ನಾವ್ (ಮೈತ್ರಿಕೂಟ ಸರ್ಕಾರ) ಬೀಳೋದಿಲ್ಲ‌. ನಮ್ ಬುಡ ಗಟ್ಟಿಯಾಗಿದೆ. ನೀವ್ (ಬಿಜೆಪಿಗರು) ಕಟ್ಟೋದಿಲ್ಲ. ನಿಮ್ಗೆ ಈ ಸರ್ಕಾರ ಬೀಳುತ್ತದೆ ಎಂಬ ಭ್ರಮನಿರಸನ ಆಗಿಬಿಟ್ಟಿದೆ. ಆಗಾಗಿ, ನಮ್ ಕಡೆ ಈ ಹಳ್ಳಿಗಳಲ್ಲಿ ದೊಂಬರಾಟ ನಡೆಯುತ್ತೆ. ಅದೇ‌ ಮಾದರಿಯಲ್ಲೇ ಈ ಬಿಜೆಪಿಗರು ದೊಂಬರಾಟ ನಡೆಸುತ್ತಿದ್ದಾರೆಂದು ದೂರಿದ್ದಾರೆ.

ಈ ಮೈತ್ರಿಕೂಟದ ಸರ್ಕಾರ ಬೀಳಿಸುವ ಬಿಜೆಪಿ ಗೇಮ್ ಪ್ಲಾನ್ ವರ್ಕೌಟ್ ಆಗುತ್ತಿಲ್ಲ. ಬಿಜೆಪಿಯವರು ಸರ್ಕಾರವನ್ನ ಅಸ್ಥಿರಗೊಳಿಸಲು ಪ್ರಯತ್ನಿಸಿ 9 ಬಾರಿ ಫೇಲ್ ಆಗಿದ್ದಾರೆ. ನೀವೆಲ್ಲಾ ಫೇಲ್ ಸ್ಟುಡೆಂಟ್ಸ್, ನಿಮಗೆ ಮತ್ತೆ ಪ್ರಯತ್ನಿಸುವ ಅವಕಾಶಗಳಿಲ್ಲ. ನೀವೆಲ್ಲ ರಾಜಕಾರಣ ಮಾಡಲು ಅನ್ ಫಿಟ್ ಎಂದು ಐವಾನ್​ ಛೇಡಿಸಿದ್ದಾರೆ.

ರಾಜಕೀಯದಲ್ಲಿ ಶಾಸಕರು ಆ ಪಕ್ಷದಿಂದ ಈ ಪಕ್ಷಕ್ಕೆ ಹೋಗಿ ಬರೋದು ಮಾಮೂಲಿ‌. ಬಿಜೆಪಿಯವರಿಗೆ ದೊಡ್ಡಾಟ ಆಡಲು ಸಾಧ್ಯವಾಗುತ್ತಿಲ್ಲ. ಹೀಗಾಗಿ ಚಿಕ್ಕಚಿಕ್ಕ ಮೇಳ ಕಟ್ಟಿ ಕುಣಿಯುತ್ತಿದ್ದಾರೆ. ನಾಲ್ಕು ಜನರನ್ನು ಹಿಡಿದು ಬಯಲಾಟ ಆಟವಾಡುತ್ತಿದ್ದಾರೆ. ಬಳಿಕ ಬಂದ ದಕ್ಷಿಣೆ ತಗೆದುಕೊಂಡು ಹೋಗ್ತಾರೆ ಅಂತಾ ಡಿಸೋಜಾ ವ್ಯಂಗ್ಯವಾಡಿದ್ದಾರೆ.