ಬೆಳಗಾವಿ: ಕೊರೊನಾ ಮತ್ತು ಕೋವಿಡೇತರ ರೋಗಗಳಿಂದ ಮೃತಪಡುತ್ತಿರುವ ರೋಗಿಗಳ ಮೃತದೇಹವನ್ನು ಸಾಗಿಸಲು ಬೆಳಗಾವಿಯ ಹೆಲ್ಪ್ ಫಾರ್ ನೀಡಿ ಫೌಂಡೇಶನ್ ಹಾಗೂ ಸುಳಗಾ ಗ್ರಾಮದ ಜೀವನ ಸಂಘರ್ಷ ಫೌಂಡೇಶನ್ ಉಚಿತ ಆ್ಯಂಬುಲೆನ್ಸ್ ಸೇವೆ ಆರಂಭಿಸಿವೆ.
ಸಾಕಷ್ಟು ಬಡ ರೋಗಿಗಳು ಆ್ಯಂಬುಲೆನ್ಸ್ ಸೇವೆ ಪಡೆಯುತ್ತಿದ್ದು, ಫೌಂಡೇಶನ್‍ಗಳ ಈ ಕಾರ್ಯ ಸಾರ್ವಜನಿಕರ ಮೆಚ್ಚುಗೆಗೆ ಪಾತ್ರವಾಗಿದೆ. ನಗರದ ಸಾರ್ವಜನಿಕ ಸ್ಥಳ ಹಾಗೂ ಆ್ಯಂಬುಲೆನ್ಸ್ ಮೇಲೆ ಮೊಬೈಲ್ ನಂಬರ್ ಬರೆಯಲಾಗಿದ್ದು, ಅಗತ್ಯ ಬಿದ್ದವರು ಚಾಲಕರನ್ನು ಸಂಪರ್ಕಿಸಿ ಈ ಸೇವೆ ಪಡೆಯಬಹುದು.
2 ಅಮಾನವೀಯ ಘಟನೆಗಳು:ಜಿಲ್ಲೆಯಲ್ಲಿ ಆ್ಯಂಬುಲೆನ್ಸ್ಗಳ ಕೊರತೆ ಎದುರಾಗಿದ್ದು, ಅವುಗಳ ಸೇವೆ ಸಿಗದ ಕಾರಣ ಕೊರೊನಾದಿಂದ ಬಲಿಯಾದ ವ್ಯಕ್ತಿಯನ್ನು ಅಥಣಿಯಲ್ಲಿ ತಳ್ಳುವ ಗಾಡಿಯ ಮೂಲಕ, ಇನ್ನೊಂದೆಡೆ ಕಿತ್ತೂರು ತಾಲೂಕಿನ ಎಂಕೆ ಹುಬ್ಬಳ್ಳಿಯಲ್ಲಿ ಸೈಕಲ್ ಮೇಲೆ ಸೋಂಕಿತನ ಶವ ಕೊಂಡೊಯ್ದು ಅಂತ್ಯಸಂಸ್ಕಾರ ಮಾಡಲಾಗಿತ್ತು. ಈ ಎರಡೂ ಅಮಾನವೀಯತೆ ಘಟನೆಗಳು ರಾಜ್ಯಾದ್ಯಂತ ಸುದ್ದಿಯಾಗಿದ್ದವು. ಅಲ್ಲದೆ, ಸರ್ಕಾರದ ವಿರುದ್ಧ ಆಕ್ರೋಶ ಕೇಳಿಬಂದಿತ್ತು.
ಸ್ಥಳೀಯರ ಸಮಸ್ಯೆ ಅರಿತ ಹೆಲ್ಫ್ ಫಾರ್ ನೀಡಿ ಫೌಂಡೇಶನ್ ಎರಡು ಹಾಗೂ ಜೀವನ ಸಂಘರ್ಷ ಫೌಂಡೇಶನ್ ಒಂದು ಆ್ಯಂಬುಲೆನ್ಸ್ ನೀಡಿವೆ. ಈ ಎರಡೂ ಫೌಂಡೇಶನ್ಗಳು ಕೊರೊನಾ ನಿಯಂತ್ರಣಕ್ಕೆ ಸರ್ಕಾರದ ಜೊತೆಗೆ ಕೈಜೋಡಿಸಿವೆ. ಕ್ವಾರಂಟೈನ್ ಕೇಂದ್ರಗಳಲ್ಲಿ ನೈರ್ಮಲ್ಯೀಕರಣ, ಕೊರೊನಾ ವಾರಿಯರ್ಸ್‍ಗೆ ಮಾಸ್ಕ್ ವಿತರಣೆ ಸೇರಿದಂತೆ ಹಲವು ಸಮಾಜ ಸೇವೆ ಕಾರ್ಯಗಳನ್ನು ಮಾಡಿದೆ.
ಈ ಕುರಿತು ಈಟಿವಿ ಭಾರತ ಜೊತೆಗೆ ಹೆಲ್ಫ್ ಫಾರ್ ನೀಡಿ ಫೌಂಡೇಶನ್ ಸಂಸ್ಥಾಪಕ ಸುರೇಂದ್ರ ಅನಗೋಳಕರ ಮಾತನಾಡಿ, ಆ್ಯಂಬುಲೆನ್ಸ್ ನೀಡುವಂತೆ ಗೋಕಾಕ್ ತಹಶೀಲ್ದಾರ್ ಪತ್ರ ಬರೆದಿದ್ದರು. ಬಡ ಸೋಂಕಿತರು ಮೃತಪಟ್ಟಾಗ ಅಂತ್ಯಸಂಸ್ಕಾರಕ್ಕೆ ಅನುಕೂಲ ಆಗಲಿ ಎಂಬ ಕಾರಣಕ್ಕೆ ಆ್ಯಂಬುಲೆನ್ಸ್ ಹಸ್ತಾಂತರಿಸಲಾಗಿದೆ. ತಾಲೂಕಾಡಳಿತವೇ ಅದರ ನಿರ್ವಹಣೆ ಮಾಡುತ್ತಿದೆ ಎಂದರು.