ಹೊಸ ಜಿಲ್ಲೆಯಾಗುತ್ತಾ ವಿಜಯನಗರ..? ಕಂದಾಯ ಸಚಿವ ಆರ್. ಅಶೋಕ್ ಹೇಳಿದ್ದೇನು..?

ವಿಜಯನಗರವನ್ನು ಹೊಸ ಜಿಲ್ಲೆ ಮಾಡುವ ಪರವಾಗಿ ಜಿಲ್ಲಾಧಿಕಾರಿ ವರದಿ ನೀಡಿದ್ದಾರೆ ಎಂದು ಸಚಿವ ಆರ್.ಅಶೋಕ್ ತಿಳಿಸಿದರು.

ಬೆಂಗಳೂರು:ವಿಜಯನಗರವನ್ನು ಹೊಸ ಜಿಲ್ಲೆ ಮಾಡುವ ಪರವಾಗಿ ಜಿಲ್ಲಾಧಿಕಾರಿ ವರದಿ ನೀಡಿದ್ದಾರೆ ಎಂದು ಸಚಿವ ಆರ್.ಅಶೋಕ್ ತಿಳಿಸಿದರು. ವಿಧಾನಸೌಧದಲ್ಲಿ ಮಾತನಾಡಿದ ಅವರು, ವಿಜಯನಗರವನ್ನು ಹೊಸ ಜಿಲ್ಲೆ ಮಾಡುವ ಪ್ರಸ್ತಾಪ ಇತ್ತು. ಹೊಸ ಜಿಲ್ಲೆ ಮಾಡಬಹುದೆಂದು ಡಿಸಿ ವರದಿ ನೀಡಿದ್ದು, ಈ ವರದಿಯನ್ನು ಸಿಎಂಗೆ ಕಳುಹಿಸಲಾಗಿದೆ. ಸಿಎಂ ಆ ಬಗ್ಗೆ ಅಂತಿಮ ತೀರ್ಮಾನ ಕೈಗೊಳ್ಳುತ್ತಾರೆ ಎಂದು ತಿಳಿಸಿದರು.

ವಿಜಯನಗರ ಹೊಸ ಜಿಲ್ಲೆ ಮಾಡುವಂತೆ ಆನಂದ್ ಸಿಂಗ್ ಪ್ರಸ್ತಾಪ ಸಲ್ಲಿಸಿದ್ದರು. ಇದಕ್ಕೆ ಬಳ್ಳಾರಿ ಜಿಲ್ಲಾ ನಾಯಕರಿಂದಲೇ ವಿರೋಧ ವ್ಯಕ್ತವಾಗಿತ್ತು. ಇದೀಗ ಡಿಸಿ ಹೊಸ ಜಿಲ್ಲೆ ರಚಿಸುವ ಪರವಾಗಿ ವರದಿ ನೀಡಿದ್ದಾರೆ ಎಂದರು.

ಕಪಾಲ ಬೆಟ್ಟ ವರದಿಗೆ ಆತುರ ಏನೂ ಇಲ್ಲ:ಕಪಾಲ ಬೆಟ್ಟಕ್ಕೆ ಸಂಬಂಧಪಟ್ಟಂತೆ ಜಿಲ್ಲಾಧಿಕಾರಿಯಿಂದ ವರದಿ ಕೇಳಿದ್ದೇವೆ. ಅವರು ಸಮಯಾವಕಾಶ ಬೇಕು ಅಂದಿದ್ದಾರೆ. ಹೀಗಾಗಿ ಕೊಟ್ಟಿದ್ದೇವೆ. ಇದರಲ್ಲಿ ಯಾವುದೇ ಆತುರ ಇಲ್ಲ ಎಂದು ತಿಳಿಸಿದರು. ಟ್ರಸ್ಟ್ ಡೀಡ್​​ನಲ್ಲಿ ಪ್ರತಿಮೆ ಕಟ್ಟಲು ಅನುಮತಿ ಇಲ್ಲ. ಯಾವುದೇ ಅನುಮತಿ ಪಡೆಯದೇ ಬೆಟ್ಟದಲ್ಲಿ ನಿರ್ಮಾಣ ಕಾರ್ಯ ನಡೆಸಲಾಗಿರುವುದು ಮೇಲ್ನೋಟಕ್ಕೆ ಗೊತ್ತಾಗಿದೆ. ಈ ಬಗ್ಗೆ ಸೂಕ್ತ ಸಮಯದಲ್ಲಿ ಸೂಕ್ತ ನಿರ್ಧಾರ ಕೈಗೊಳ್ಳಲಾಗುತ್ತದೆ ಎಂದು ಸ್ಪಷ್ಟ ಪಡಿಸಿದರು.

ಈಗಾಗಲೇ ಜಮೀನು ಮಂಜೂರಾಗಿದೆ. ಅಕ್ರಮ ರಸ್ತೆ, ಅಕ್ರಮ‌ ಬೋರ್​​ವೆಲ್, ನೀರು ಸಂಗ್ರಹ ಟ್ಯಾಂಕ್ ನಿರ್ಮಾಣವಾಗಿದೆ. ಇದೆಲ್ಲವೂ ಸಂಶಯ ಬರೋ ರೀತಿಯಲ್ಲಿದೆ. ಈ ಬಗ್ಗೆ ವಸ್ತು ಸ್ಥಿತಿ ವರದಿ ನೀಡುವಂತೆ ಕೇಳಿದ್ದೇನೆ ಎಂದರು. ಸರ್ಕಾರ ಈ ವಿಚಾರದಲ್ಲಿ ಕಾನೂನು ರೀತಿಯಲ್ಲಿ ಕ್ರಮ ಕೈಗೊಳ್ಳಲಿದೆ. ಟ್ರಸ್ಟ್ ಡೀಡ್​​ನಲ್ಲಿ ಶೈಕ್ಷಣಿಕ, ದಾನ ಧರ್ಮಕ್ಕಾಗಿ ಬಳಸಿಕೊಳ್ತೇವೆ ಎಂದು ಹೇಳಿದೆ. ಆದರೆ ಅನುಮತಿ ಪಡೆದು ಏನು ಮಾಡಿಲ್ಲ ಎಂದು ವಿವರಿಸಿದರು.

ಇದು ಕರ್ನಾಟಕದ 6.50 ಕೋಟಿ ಜನರ ಸರ್ಕಾರ‌ವಾಗಿದೆ. ಸಂವಿಧಾನದ ಅಡಿ ಏನು ಕೆಲಸ‌ ಮಾಡಬೇಕು ಅದನ್ನು ಮಾಡುತ್ತೇವೆ ಎಂದರು‌‌. ಬಿಜೆಪಿ ಸರ್ಕಾರ ಹಜ್ ಭವನ ಕಟ್ಟಿಸಿದೆ. ಹಜ್ ಹೋಗುವವರಿಗೆ ಸಹಾಯಧನ ಹೆಚ್ಚಿಗೆ ಮಾಡಿದೆ. ಕ್ರೈಸ್ತ ಮಂಡಲಿ ರಚಿಸಿದ್ದೇವೆ. ನಾವು ಮುಸ್ಲಿಂ, ಕ್ರೈಸ್ತರ ವಿರೋಧಿಗಳಲ್ಲ ಎಂದು ಹೇಳಿದರು.

ಸಿಎಂ ವಾಪಸಾಗುತ್ತಿದ್ದ ಹಾಗೇ ಸಂಪುಟ ವಿಸ್ತರಣೆ:ಇನ್ನು ಸಿಎಂ ಬಿ.ಎಸ್. ಯಡಿಯೂರಪ್ಪನವರು ವಿದೇಶದಿಂದ ವಾಪಸ್​​​ ಬಂದ ತಕ್ಷಣವೇ ಮಂತ್ರಿ ಮಂಡಲ ವಿಸ್ತರಣೆ ಆಗಲಿದೆ. ಸರ್ಕಾರ ರಚನೆಯಾಗಲು ಕಾರಣರಾದವರಿಗೆ ಯಾವುದೇ ಮೋಸ‌ ಮಾಡುವುದಿಲ್ಲ ಎಂದು ಸ್ಪಷ್ಟಪಡಿಸಿದರು.