ಎಸ್ಎಸ್ಎಲ್​ಸಿ ಫಲಿತಾಂಶ ಬಂದ ಮೇಲೆಯೇ ಪಿಯುಸಿ ದಾಖಲಾತಿ ಮಾಡಬೇಕು: ಪಿಯು ಬೋರ್ಡ್​ನಿಂದ ವಾರ್ನಿಂಗ್

ಎಸ್​ಎಸ್​ಎಲ್​ಸಿ ಪರೀಕ್ಷೆ ಫಲಿತಾಂಶ ಬಂದ ನಂತರ ಹಾಗೂ ಬೋರ್ಡ್ ದಾಖಲಾತಿ ಮಾರ್ಗಸೂಚಿ ಬಿಡುಗಡೆ ಮಾಡಿದ ನಂತರವೇ ಪಿಯುಸಿ ದಾಖಲಾತಿ ಮಾಡಬೇಕು ಎಂದು ಪದವಿಪೂರ್ವ ಶಿಕ್ಷಣ ಇಲಾಖೆ ಆದೇಶ ಹೊರಡಿಸಿದೆ.

ಬೆಂಗಳೂರು:ರಾಜ್ಯದಲ್ಲಿ ಕೊರೊನಾ ಸೋಂಕು ಹೆಚ್ಚಳವಾಗಿರುವುದರಿಂದ ಶೈಕ್ಷಣಿಕ ವರ್ಷ ಹಾಗೂ ಪರೀಕ್ಷೆಗಳನ್ನು ತಡವಾಗಿ ನಡೆಸಲಾಗುತ್ತಿದೆ. ಈ ನಡುವೆ ಎಸ್​ಎಸ್​ಎಲ್​ಸಿ ಪರೀಕ್ಷೆಗಳನ್ನ ನಡೆಸಲು ಇಲಾಖೆ ನಿರ್ಧರಿಸಿ, ಈಗಿರುವಾಗ ಅವಧಿಗೂ ಮುನ್ನವೇ ನಗರದ ಹಲವೆಡೆ ಕಾಲೇಜುಗಳು ಅಡ್ಮಿಷನ್ ಶುರು ಮಾಡಲು ಮುಂದಾಗಿವೆ.‌

ಹೀಗಾಗಿ, ಪದವಿ ಪೂರ್ವ ಶಿಕ್ಷಣ ಇಲಾಖೆ ಆದೇಶ ಹೊರಡಿಸಿದ್ದು, 2021-22ನೇ ಸಾಲಿನ ಪ್ರಥಮ ಪಿಯುಸಿ ತರಗತಿ ವಿದ್ಯಾರ್ಥಿಗಳಿಗೆ ದಾಖಲಾತಿ ಮಾಡುವಂತಿಲ್ಲ. ಎಸ್​ಎಸ್​ಎಲ್​ಸಿ ಪರೀಕ್ಷೆ ಫಲಿತಾಂಶ ಬಂದ ನಂತರ ಹಾಗೂ ಬೋರ್ಡ್ ದಾಖಲಾತಿ ಮಾರ್ಗಸೂಚಿಯನ್ನ ಬಿಡುಗಡೆ ಮಾಡಿದ ನಂತರವೇ ಮಾಡಿಕೊಳ್ಳಲು ಸೂಚಿಸಿದೆ.

ಅಲ್ಲಿಯವರೆಗೆ ಯಾವುದೇ ರೀತಿಯಲ್ಲಿ ಪ್ರಥಮ ಪಿಯುಸಿಗೆ ದಾಖಲಾತಿ ನೀಡುವಂತಿಲ್ಲ, ಆನ್​ಲೈನ್ ತರಗತಿಗಳನ್ನ ಸಹ ನಡೆಸುವಂತಿಲ್ಲ ಎಂದು ಆದೇಶ ಹೊರಡಿಸಿದೆ‌. ಈ ಆದೇಶದ ಹೊರತಾಗಿಯೂ ಯಾವುದೇ ಕಾಲೇಜುಗಳಲ್ಲಿ ದಾಖಲಾತಿಗಳು ನಡೆಸಿ, ಆನ್​ಲೈನ್ ತರಗತಿ ನಡೆಯೋದು ತಿಳಿದು ಬಂದರೆ ಕಠಿಣ ಶಿಸ್ತುಕ್ರಮದ ಜೊತೆಗೆ ಕಾಲೇಜುಗಳ ಮಾನ್ಯತೆ ರದ್ದುಪಡಿಸಲಾಗುವುದು ಎಂದು ಎಚ್ಚರಿಕೆ ನೀಡಿದೆ‌.

ಪದವಿಪೂರ್ವ ಶಿಕ್ಷಣ ಇಲಾಖೆ ಆದೇಶ

ಈ ಕುರಿತು ರಾಜ್ಯದ ಎಲ್ಲ ಜಿಲ್ಲೆಗಳ ಪಿಯು ಉಪನಿರ್ದೇಶಕರು ಸೂಕ್ತ ನಿಗಾವಹಿಸುವಂತೆ, ಈ ಮಾಹಿತಿಯನ್ನ ಎಲ್ಲ ಕಾಲೇಜುಗಳ ಪ್ರಾಂಶುಪಾಲರ ಗಮನಕ್ಕೆ ತರುವಂತೆ ತಿಳಿಸಲಾಗಿದೆ.‌