ಬೋಯಿಂಗ್​ ಕೇಂದ್ರ ಉದ್ಘಾಟನೆಗೆ ಪ್ರಧಾನಿ ಮೋದಿ: ಏರ್​​ಪೋರ್ಟ್​ ಸುತ್ತಲಿನ ರಸ್ತೆಗಳಲ್ಲಿ ಸಂಚಾರ ಬಂದ್

ಪ್ರಧಾನಿ ನರೇಂದ್ರ ಮೋದಿ ಆಗಮನದ ಹಿನ್ನೆಲೆಯಲ್ಲಿ ಬೆಂಗಳೂರಿನ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ತೆರಲುವ ವಾಹನಗಳಿಗೆ ಪೊಲೀಸರು ಪರ್ಯಾಯ ರಸ್ತೆಗಳನ್ನು ಸೂಚಿಸಿದ್ದಾರೆ.

ದೇವನಹಳ್ಳಿ: ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಸಮೀಪದ ಏರೊಸ್ಪೇಸ್ ಪಾರ್ಕ್‌ನಲ್ಲಿರುವ ಅತ್ಯಾಧುನಿಕ ಬೋಯಿಂಗ್ ಇಂಡಿಯಾ ಎಂಜಿನಿಯರಿಂಗ್ ಮತ್ತು ತಂತ್ರಜ್ಞಾನ ಕೇಂದ್ರ ಉದ್ಘಾಟಿಸಲು ಪ್ರಧಾನಿ ನರೇಂದ್ರ ಮೋದಿ ಇಂದು ಆಗಮಿಸಲಿದ್ದಾರೆ. ಪ್ರಧಾನಿ ಅವರು ಸಂಚರಿಸುವ ಮಾರ್ಗಗಳಲ್ಲಿ ವಾಹನ ಸಂಚಾರ ನಿರ್ಬಂಧಿಸಲಾಗಿದೆ. ಅಲ್ಲದೆ, ವಿಮಾನ ನಿಲ್ದಾಣಕ್ಕೆ ತೆರಳುವ ವಾಹನಗಳಿಗೆ ಪರ್ಯಾಯ ಮಾರ್ಗ ಕಲ್ಪಿಸಲಾಗಿದೆ ಎಂದು ಸಂಚಾರ ಪೊಲೀಸರು ಮಾಹಿತಿ ನೀಡಿದ್ದಾರೆ.

ರಸ್ತೆ ಬದಲಾವಣೆ: ವೈಟ್‌ಫೀಲ್ಡ್, ಕೆ.ಆರ್.ಪುರಂ ಕಡೆಯಿಂದ ಗೊಲ್ಲಹಳ್ಳಿ ಗೇಟ್ ಮಾರ್ಗವಾಗಿ ಕೆಐಎಎಲ್​ಗೆ ಸಂಚರಿಸುವ ವಾಹನಗಳು ಪರ್ಯಾಯ ಮಾರ್ಗವಾಗಿ ಗೊಲ್ಲಹಳ್ಳಿ ಗೇಟ್- ಬಲತಿರುವು- ಹೊನ್ನಹಳ್ಳಿ ಗೇಟ್ - ಬೆಟ್ಟಕೋಟೆ – ಏರ್‌ಲೈನ್ ಡಾಬಾ- ಎಡತಿರುವು- ದೇವನಹಳ್ಳಿ ಬಸ್ ನಿಲ್ದಾಣ ಎಡ ತಿರುವು- ದೇವನಹಳ್ಳಿ ಬೈಪಾಸ್ - ಎಡ ತಿರುವು- ಬಿ.ಬಿ. ರಸ್ತೆ- ದೇವನಹಳ್ಳಿ ಟೋಲ್‌ನಲ್ಲಿ ಎಡಕ್ಕೆ ತಿರುವು ಪಡೆದು ಕೆಂಪೇಗೌಡ ವಿಮಾನ ನಿಲ್ದಾಣ ತಲುಪಬಹುದು.

ರಾಷ್ಟ್ರೀಯ ಹೆದ್ದಾರಿ- 648 ಏರ್‌ಲೈನ್ಸ್ ಡಾಬಾ ಜಂಕ್ಷನ್ ಕಡೆಯಿಂದ ಕೆಐಎಡಿಬಿ ಇಂಡಸ್ಟ್ರಿಯಲ್ ಏರಿಯಾದ ಮೂಲಕ ಕೆಐಎಎಲ್​ಗೆ ಬರುವ ವಾಹನಗಳು ಏರ್‌ಲೈನ್ಸ್ ಡಾಬಾ -ದೇವನಹಳ್ಳಿ ಬಸ್ ನಿಲ್ದಾಣ- ಎಡ ತಿರುವು ದೇವನಹಳ್ಳಿ ಬೈಪಾಸ್- ಎಡ ತಿರುವು– ಬಿಬಿ ರಸ್ತೆ- ದೇವನಹಳ್ಳಿ ಟೋಲ್‌ನಲ್ಲಿ ಎಡ ತಿರುವು ಪಡೆದು ವಿಮಾನ ನಿಲ್ದಾಣಕ್ಕೆ ತೆರಳಬಹುದು.

ಹೆಣ್ಣೂರು- ಬಾಗಲೂರು ಕಡೆಯಿಂದ ಗಾಳಮ್ಮ ಸರ್ಕಲ್ ಮಾರ್ಗವಾಗಿ ಕೆಐಎಎಲ್​ಗೆ ಸಂಚರಿಸುವ ವಾಹನಗಳು, ಬಾಗಲೂರು ಗುಂಡಪ್ಪ ವೃತ್ತ- ಎಡ ತಿರುವು - ರೇವಾ ಕಾಲೇಜು ಜಂಕ್ಷನ್ - ಬಾಗಲೂರು ಕ್ರಾಸ್ -ಬಲ ತಿರುವು- ಚಿಕ್ಕಚಾಲ -ಸಾದಹಳ್ಳಿ ಟೋಲ್ - ವಿಮಾನ ನಿಲ್ದಾಣ ಬಳಿಯ ಮೇಲ್ಸೇತುವೆ ಪ್ರವೇಶಿಸಿ ಕೆಂಪೇಗೌಡ ವಿಮಾನ ನಿಲ್ದಾಣಕ್ಕೆ ಹೋಗಬಹುದು.

ಚಿಕ್ಕಜಾಲ ಕೋಟೆ ಕ್ರಾಸ್ ಕಡೆಯಿಂದ ಗಾಳಮ್ಮ ಸರ್ಕಲ್ ಮಾರ್ಗವಾಗಿ ಕೆಐಎಎಲ್​ಗೆ ಸಂಚರಿಸುವ ವಾಹನಗಳು ಚಿಕ್ಕಚಾಲ- ಸಾದಹಳ್ಳಿ ಟೋಲ್ – ವಿಮಾನ ನಿಲ್ದಾಣ ಬಳಿಯ ಮೇಲ್ಸೇತುವೆ ಮೂಲಕ ಕೆಂಪೇಗೌಡ ವಿಮಾನ ನಿಲ್ದಾಣಕ್ಕೆ ತೆರಳಬಹುದು.

ಬಾಗಲೂರು ಕಡೆಯಿಂದ ಗಾಳಮ್ಮ ವೃತ್ತದ ಮಾರ್ಗವಾಗಿ ಕೆಐಎಎಲ್​ಗೆ ಸಂಚರಿಸುವ ವಾಹನಗಳು ಬಾಗಲೂರು ಕಾಲೊನಿಯಲ್ಲಿ ಬಲ ತಿರುವು ಪಡೆದು ರಜಾಕ್ ಪಾಳ್ಯ -ಎಂ.ವಿ.ಐ.ಟಿ ಕಾಲೇಜು- ಚಿಕ್ಕಚಾಲ- ಬಲ ತಿರುವು - ಬಿಬಿ ರಸ್ತೆ - ಸಾದಹಳ್ಳಿ ಟೋಲ್- ವಿಮಾನ ನಿಲ್ದಾಣ ಬಳಿಯ ಮೇಲ್ಸೇತುವೆ ಮೂಲಕ ತಲುಪಬಹುದು ಎಂದು ಸಂಚಾರ ಪೊಲೀಸರು ತಿಳಿಸಿದ್ದಾರೆ.

ಇದನ್ನೂ ಓದಿ:ಕಲಬುರಗಿಗೆ ಬಂದಿಳಿದ ಪ್ರಧಾನಿ ಮೋದಿ; ಹೆಲಿಕಾಪ್ಟರ್‌ ಮೂಲಕ ಸೋಲಾಪುರಕ್ಕೆ ಪಯಣ