ಬೆಂಗಳೂರು:ಸೆಕ್ಯುಲರಿಸಂ ಜೆಡಿಎಸ್ನಲ್ಲಿ ಎಲ್ಲಿದೆ ಎಂಬ ಸಿದ್ದರಾಮಯ್ಯ ಹೇಳಿಕೆ ವಿರುದ್ಧ ಕಿಡಿ ಕಾರಿರುವ ಜೆಡಿಎಸ್ ವರಿಷ್ಠ ಹೆಚ್.ಡಿ.ದೇವೇಗೌಡ, ಸಿದ್ದರಾಮಯ್ಯಗೆ ತಿರುಗೇಟು ನೀಡಿದ್ದಾರೆ.
ಜೆಪಿ ಭವನದಲ್ಲಿ ಸುದ್ದಿಗೋಷ್ಠಿ ಉದ್ದೇಶಿಸಿ ಮಾತನಾಡಿದ ದೇವೇಗೌಡರು, ಸೆಕ್ಯುಲರಿಸಂ ಜೆಡಿಎಸ್ನಲ್ಲಿ ಎಲ್ಲಿದೆ ಎಂಬ ಸಿದ್ದರಾಮಯ್ಯ ಹೇಳಿಕೆ ವಿರುದ್ಧ ಕಿಡಿ ಕಾರುತ್ತಾ, ಹಾಸನದಲ್ಲಿ ರಾಹುಲ್ ಗಾಂಧಿಗೆ ಸಿದ್ದರಾಮಯ್ಯ ಸೆಕ್ಯುಲರಿಸಂ ಟ್ರಾನ್ಸ್ಫರ್ ಮಾಡಿದ್ದಾರೆ. ಅದನ್ನು ಪಡೆದುಕೊಳ್ಳುವ ಕಾಲ ಬರುತ್ತದೆ ಆಗ ಪಡೆದುಕೊಳ್ಳುತ್ತೇನೆ ಎಂದು ತಿರುಗೇಟು ನೀಡಿದರು.
ಸಿದ್ದರಾಮಯ್ಯ ಎಲ್ಲಿಂದ ಬಂದರು. ಸಿದ್ದರಾಮಯ್ಯ ಮೂಲ ಎಲ್ಲಿ.? ಅಂದು ದೇವೇಗೌಡರ ಜೊತೆ ರಾಜಕೀಯ ಮಾಡುವಾಗ ಸೆಕ್ಯುಲರಿಸಂ ಇತ್ತು. ಈಗ ಕಾಂಗ್ರೆಸ್ ಹೋದ ಮೇಲೆ ಜೆಡಿಎಸ್ಗೆ ಸೆಕ್ಯುಲರಿಸಂ ಇಲ್ಲವಾ? ಎಂದು ಪ್ರಶ್ನೆ ಮಾಡಿದ್ದಾರೆ.
ಕುಮಾರಸ್ವಾಮಿ ಬಿಜೆಪಿ ಜೊತೆ ಹೋದರು ಅಂತ ಹೇಳುತ್ತೀರಾ. ಕರುಣಾನಿಧಿ ಮನೆ ಬಾಗಿಲಿಗೆ ಕಾಂಗ್ರೆಸ್ ಹೋಗಿರಲಿಲ್ಲವಾ? ಕಾಂಗ್ರೆಸ್ಗೆ ಯಾವ ನೈತಿಕತೆ ಇದೆ.? ರಾಹುಲ್ ಗಾಂಧಿ ಕೈಯಲ್ಲಿ ದೇವೇಗೌಡ ಬಿ ಟೀಂ ಅಂತ ಹೇಳಿಸಿದ್ರು. ಅದರ ಹಣೆ ಬರಹ ಏನ್ ಆಯ್ತು? 130 ಇದ್ದ ಕಾಂಗ್ರೆಸ್ 78 ಕ್ಕೆ ಏಕೆ ಬಂತು ಎಂದು ಪ್ರಶ್ನಿಸಿದ್ದಾರೆ.
ಎಲ್ಲಿ ಹೋಯ್ತು ನಿನ್ನ ಸೆಕ್ಯುಲರಿಸಂ:
ಸಿದ್ದರಾಮಯ್ಯ ವಿರುದ್ದ ಏಕವಚನದಲ್ಲಿ ಕಿಡಿಕಾರಿದ ದೇವೇಗೌಡರು, ನಿನ್ನ ಐದು ವರ್ಷ ಸಿಎಂ ಅವಧಿಯಲ್ಲಿ ಎಲ್ಲಿ ಹೋಗಿತ್ತು ಸೆಕ್ಯುಲರಿಸಂ. ನಿಮಗೆ ಬಂದಿದ್ದು 78 ಅಷ್ಟೇ. ಸಮಯ ಬಂದಾಗ ಎಲ್ಲಾ ಹೇಳುತ್ತೇನೆ. ನಾನು ಕುಳಿತುಕೊಳ್ಳಲ್ಲ ಹೋರಾಟ ಮಾಡುತ್ತೇನೆ ಎಂದು ಹೇಳಿದ್ದಾರೆ.