ಚೊಚ್ಚಲ ಧ್ವಜಾರೋಹಣ ನೆರವೇರಿಸಿದ ಸಿಎಂ ಬಸವರಾಜ ಬೊಮ್ಮಾಯಿ

ಮಾಣಿಕ್ ಷಾ ಪರೇಡ್ ಮೈದಾನದಲ್ಲಿ 75 ನೇ ಸ್ವಾತಂತ್ರ್ಯ ದಿನಾಚರಣೆ ಅಂಗವಾಗಿ ಸಿಎಂ ಬಸವರಾಜ ಬೊಮ್ಮಾಯಿ ಧ್ವಜಾರೋಹಣ ನೆರವೇರಿಸಿದರು. ಕೋವಿಡ್ ಹಿನ್ನೆಲೆ ಈ ಬಾರಿ ಸರಳವಾಗಿ ಸ್ವಾತಂತ್ರ್ಯ ದಿನ ಆಚರಿಸಲಾಯಿತು.

ಬೆಂಗಳೂರು: ನಗರದ ಮಾಣಿಕ್ ಷಾ ಪರೇಡ್ ಮೈದಾನದಲ್ಲಿ ಸರಳವಾಗಿ ಕೋವಿಡ್ ಮಾರ್ಗಸೂಚಿಯಂತೆ 75 ನೇ ಸ್ವಾತಂತ್ರ್ಯ ದಿನಾಚರಣೆಯನ್ನು ಸರಳವಾಗಿ ಆಚರಿಸಲಾಯಿತು. ನೂತನ ಸಿಎಂ ಬಸವರಾಜ್ ಬೊಮ್ಮಾಯಿಯವರು ಚೊಚ್ಚಲ ದ್ವಜಾರೋಹಣ ಮಾಡಿದರು.

ಸೀಮಿತ ಪರೇಡ್ ತಂಡ ಪರೇಡ್‌ನಲ್ಲಿ ಭಾಗವಹಿಸಿತ್ತು. ಆದರೆ ಪ್ರತಿ ವರ್ಷದಂತೆ ಪರೇಡ್ ತಂಡಗಳ ಪಥಸಂಚಲನ ಇರಲಿಲ್ಲ. ವಿದ್ಯಾರ್ಥಿಗಳ ಪರೇಡ್​​ಗೆ ಅವಕಾಶವಿರಲಿಲ್ಲ. ಶಾಲಾ ವಿದ್ಯಾರ್ಥಿಗಳ ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳ ಮೆರುಗೂ ಇರಲಿಲ್ಲ. ಇನ್ನು ಯೋಧರ ಸಾಹಸ ಪ್ರದರ್ಶನಗಳಿಗೂ ಈ ಬಾರಿ ಅವಕಾಶ ಇರಲಿಲ್ಲ.

ಸೀಮಿತ ಗಣ್ಯರು, ಆಹ್ವಾನಿತರೊಂದಿಗೆ ಸ್ವಾತಂತ್ರ್ಯೋತ್ಸವ ಆಚರಿಸಲಾಯಿತು. ಸ್ವಾತಂತ್ರ್ಯ ದಿನಾಚರಣೆಯಲ್ಲಿ ಪಾಲ್ಗೊಳ್ಳಲು ಕೋವಿಡ್ ವಾರಿಯರ್ಸ್ 100 ಮಂದಿ ಹಾಗೂ ಕೋವಿಡ್​ನಿಂದ ಗುಣಮುಖರಾದ 25 ಜನರಿಗೆ ಅವಕಾಶ ಮಾಡಲಾಗಿತ್ತು. ಸಿಎಂ ರಾಷ್ಟ್ರೀಯ ಧ್ವಜಾರೋಹಣದ ಬಳಿಕ ತೆರೆದ ಜೀಪಿನಲ್ಲಿ ಪರೇಡ್ ಪರಿವೀಕ್ಷಣೆ ನಡೆಸಿದರು.ಪರೇಡ್ ನಲ್ಲಿ ಕೆ.ಎಸ್.ಆರ್.ಪಿ/ಸಿ.ಆರ್.ಪಿ.ಎಫ್ ಬಿ.ಎಸ್.ಎಫ್.ಸಿ.ಎ.ಆರ್/ಕೆ.ಎಸ್.ಐ.ಎಸ್.ಎಫ್ ಟ್ರಾಫಿಕ್ ಪೊಲೀಸ್ ಮಹಿಳಾ ಪೊಲೀಸ್ ಹೋಂ ಗಾರ್ಡ್ಸ್/ಟ್ರಾಪಿಕ್ ವಾರ್ಡನ್, ಅಶ್ವದಳ, ಅಗ್ನಿಶಾಮಕ ಸಿಬ್ಬಂದಿ/ಡಾಗ್ ಸ್ಕ್ಯಾಡ್ ಮತ್ತು ಬ್ಯಾಂಡ್‌ನ ಒಟ್ಟು 20 ತುಕಡಿಗಳಲ್ಲಿ 470 ಮಂದಿ ಭಾಗಿಯಾಗಿದ್ದರು.

ಹಾವೇರಿ ಜಿಲ್ಲೆಯ ಸವಣೂರು ಮೂಲದ ಡಿಸಿಪಿ (ಉಪಪೊಲೀಸ್ ಆಯುಕ್ತರು) ಚನ್ನಬಸಪ್ಪ ಪರಪ್ಪ ಹೊಸಮನಿ ಅವರು ಇಂದಿನ ಪರೇಡ್ ನೇತೃತ್ವ ವಹಿಸಿದ್ದರು. ಪರೇಡ್ ವೀಕ್ಷಣೆ ಬಳಿಕ ರಾಜ್ಯವನ್ನು ಉದ್ದೇಶಿಸಿ ಮಾತನಾಡಿದ ಸಿಎಂ, ಮೇಕೆದಾಟು ಯೋಜನೆ, 75 ಸ್ಲಂ, 75 ಕೆರೆ ಅಭಿವೃದ್ಧಿ ಬಗ್ಗೆ ರಾಜ್ಯದ ಜನರಿಗೆ ಭರವಸೆ ನೀಡಿದರು.

ಬಳಿಕ ರೈತಗೀತೆ, ನಾಡಗೀತೆ ಹಾಗೂ ರಾಷ್ಟ್ರಗೀತೆಯೊಂದಿಗೆ ಸ್ವಾತಂತ್ರ್ಯ ದಿನಾಚರಣೆ ಕಾರ್ಯಕ್ರಮವನ್ನು ಸಮಾಪ್ತಿಗೊಳಿಸಲಾಯಿತು.