ಬೆಂಗಳೂರು:ಸ್ಯಾಂಡಲ್‌ವುಡ್ಗೆ ಡ್ರಗ್ಸ್ ನಂಟು ಆರೋಪ ಪ್ರಕರಣಕ್ಕೆ ಸಂಬಂಧಿಸಿದಂತೆ ನಟಿ ಸಂಜನಾ ಆಪ್ತ ಶೇಖ್ ಫಾಜಿಲ್ಗಾಗಿ ಸಿಸಿಬಿ ಶೋಧ ನಡೆಸುತ್ತಿದೆ. ಈತನಿಗೆ ಬಾಲಿವುಡ್ ನಂಟಿದೆ ಎಂಬ ಮಾಹಿತಿ ಲಭಿಸಿತ್ತು. ಆದರೆ ಇದೀಗ ಬಾಲಿವುಡ್ ಜೊತೆಗೆ ಕ್ರಿಕೆಟ್ ಲೋಕದ ನಂಟೂ ಇದೆ ಎಂಬ ವಿಷಯ ಬಹಿರಂಗವಾಗಿದೆ.
ಈತ ನಟಿ ಸಂಜನಾ ಆಪ್ತನಾಗಿದ್ದು, ಆಕೆಯ ಜೊತೆ ಪಾರ್ಟಿ ಪಬ್ಗಳಲ್ಲಿ ಕಾಣಿಸಿಕೊಂಡಿದ್ದ ಎನ್ನಲಾಗ್ತಿದೆ. ಸದ್ಯ ಫಾಜಿಲ್ ತಲೆಮರೆಸಿಕೊಂಡಿದ್ದು, ಈತನ ಹಿನ್ನೆಲೆಯನ್ನು ಸಿಸಿಬಿ ಕಲೆಹಾಕಿದೆ. ಈ ವೇಳೆ ಸ್ಯಾಂಡಲ್ವುಡ್ ಹಾಗೂ ಬಾಲಿವುಡ್ ಜೊತೆಗೆ ಮಾತ್ರವಲ್ಲದೆ, ಈತ ಕ್ರಿಕೆಟ್ನಲ್ಲಿ ಕೂಡ ಭಾಗಿಯಾಗಿರೋದು ಬಯಲಾಗಿದೆ.
ಪ್ರತಿಷ್ಠಿತ ಅಬುದಾಬಿ ಟಿ-10 ಕ್ರಿಕೆಟ್ ಲೀಗ್‌ನ ತಂಡವೊಂದಕ್ಕೆ ಫಾಜಿಲ್ ಪಾಲುದಾರಿಕೆ ಹೊಂದಿರುವ ಕ್ಯಾಸಿನೋ ಪ್ರಾಯೋಜಕತ್ವ ನೀಡಿರುವುದು ತಿಳಿದುಬಂದಿದೆ. ಈ ಹಿನ್ನೆಲೆಯಲ್ಲಿ ಶ್ರೀಲಂಕಾದಲ್ಲಿರುವ ಬೆಲೀಸ್ ಕ್ಯಾಸಿನೋ ಪ್ರಾಯೋಜಕತ್ವದ ಮೂಲಕ ಪ್ರಭಾವಿ ಆಟಗಾರರನ್ನೊಳಗೊಂಡ ತಂಡಕ್ಕೂ ಮಾದಕ ದ್ರವ್ಯ ರವಾನೆಯಾಗಿದೆಯೇ ಎಂಬ ಅನುಮಾನ ವ್ಯಕ್ತವಾಗಿದೆ.
ಬೆಲೀಸ್ ಕ್ಯಾಸಿನೋದ ಮಾರ್ಕೆಟಿಂಗ್ ಮ್ಯಾನೇಜರ್ ಆಗಿರುವ ಶೇಖ್ ಫಾಜಿಲ್ ಅಬುದಾಬಿ ಟಿ-10 ಲೀಗ್‌ನ ತಂಡವೊಂದಕ್ಕೆ 2019ರಿಂದ ಪ್ರಾಯೋಜಕ ನೀಡುತ್ತಿದ್ದಾನೆ. ಅಂತಾರಾಷ್ಟ್ರೀಯ ಮಟ್ಟದ ಹಾಲಿ, ಮಾಜಿ ಸ್ಟಾರ್ ಆಟಗಾರರನ್ನ ಹೊಂದಿರುವ ಈ ತಂಡ ಟೂರ್ನಿಯ ಪ್ರಮುಖ ತಂಡಗಳಲ್ಲಿ ಒಂದಾಗಿದ್ದು, ತಂಡದ ಪ್ರಮುಖ ಕ್ರಿಕೆಟ್ ಆಟಗಾರರೊಂದಿಗೂ ಶೇಖ್ ಫಾಜಿಲ್ ನಂಟು ಹೊಂದಿದ್ದಾನೆ ಎಂದು ಹೇಳಲಾಗ್ತಿದೆ. ಟೂರ್ನಿಯುದ್ದಕ್ಕೂ ಆ ತಂಡದೊಂದಿಗೆ ಗುರುತಿಸಿಕೊಂಡಿದ್ದ ಶೇಖ್ ಫಾಜಿಲ್ ಮ್ಯಾಚ್ ನಂತರ ಪಾರ್ಟಿಗಳಲ್ಲಿ ಆಟಗಾರರಿಗೂ ಮಾದಕ ದ್ರವ್ಯ ಪೂರೈಸಿರುವ ಅನುಮಾನ ಮೂಡಿದೆ.
ಸದ್ಯ ಫಾಜಿಲ್ನ ಬೃಹತ್ ಜಾಲ ಬೆಳಕಿಗೆ ಬರುತ್ತಿದ್ದು, ಆತನ ಸುತ್ತ ಅನುಮಾನಗಳು ಮೂಡಿವೆ. ಸದ್ಯ ಆತನಿಗಾಗಿ ಪೊಲೀಸರು ಶೋಧ ಮುಂದುವರೆಸಿದ್ದಾರೆ.