ಬೆಂಗಳೂರು: ಪತ್ನಿಯ ಮೇಲಿನ ಗಂಡನ ಅನುಮಾನದ ಭೂತ ಪೊಲೀಸ್ ಠಾಣೆ ಮೆಟ್ಟಿಲೇರುವಂತೆ ಮಾಡಿದೆ. ಪತ್ನಿಯ ಕನ್ಯತ್ವ(ವರ್ಜಿನಿಟಿ)ದ ಮೇಲೆಯೇ ಅನುಮಾನಗೊಂಡ ಪತಿ ಈಗ ಜೈಲು ಸೇರಿರುವ ವಿಚಿತ್ರ ಪ್ರಕರಣ ನಗರದಲ್ಲಿ ಬೆಳಕಿಗೆ ಬಂದಿದೆ.
ಹೌದು, ಮದುವೆ ಸಂದರ್ಭದಲ್ಲಿ ವರದಕ್ಷಿಣೆ ಸರಿಯಾಗಿ ಕೊಟ್ಟಿಲ್ಲ, ಮದುವೆಯಾದ್ರು ಬೇರೆಯವನನ್ನ ಪ್ರೀತಿಸ್ತಿದ್ದಾಳೆ.. ಹುಡುಗಿ ಸರಿಯಿಲ್ಲ ಅಂತೆಲ್ಲ ಪೊಲೀಸ್ ಠಾಣೆ ಮೆಟ್ಟಿಲೇರಿರುವ ಪ್ರಕರಣಗಳನ್ನು ನೋಡಿರುತ್ತೀರಿ. ಆದ್ರೆ ಮಹಾಶಯ ಪತ್ನಿಯ ವರ್ಜಿನಿಟಿ ಬಗ್ಗೆ ಅನುಮಾನ ವ್ಯಕ್ತಪಡಿಸಿದ್ದಾನೆ. ಅಲ್ಲದೆ ಆಸ್ಪತ್ರೆಗೆ ಕರೆದೊಯ್ದು ಕನ್ಯತ್ವ ಪರೀಕ್ಷೆ ಸಹ ಮಾಡಿಸಿದ್ದಾನಂತೆ.
ವಾಂತಿ ಮಾಡಿಕೊಂಡ ಪತ್ನಿ:
ಕನ್ಯತ್ವ ಪರೀಕ್ಷೆ ಬಳಿಕ ಪತ್ನಿಗೆ ಹುಷಾರಿಲ್ಲದ ಕಾರಣ ಆಗಾಗ ವಾಂತಿ ಶುರುವಾಗಿತ್ತು. ಇದನ್ನು ತಪ್ಪಾಗಿ ತಿಳಿದುಕೊಂಡು ನೀನು ಮತ್ತೋರ್ವನ ಮಗುವಿಗೆ ಜನ್ಮ ನೀಡಲು ಮುಂದಾಗಿದ್ದಿಯಾ ಎಂದು ಪತಿಯ ಕುಟುಂಬಸ್ಥರೆಲ್ಲ ಹಲ್ಲೆ ಮಾಡಿದ್ದಾರೆ ಎಂದು ಆರೋಪಿಸಿ ಮಹಿಳೆ ಶಿವಾಜಿನಗರ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದಾಳೆ. ಅಲ್ಲದೆ ಮಹಿಳಾ ಸಹಾಯವಾಣಿಯ ಮೊರೆ ಹೋಗಿದ್ದಾಳೆ.
ಪ್ರಕರಣದ ಹಿನ್ನೆಲೆ:
ಆಕೆಯದು ಬಡ ಕುಟುಂಬ. ಮೂವರು ಅಕ್ಕ-ತಂಗಿಯರಿದ್ದು ಅವರಿಗೆಲ್ಲಾ ಮದುವೆಯಾಗಿದೆ. ಇನ್ನು ತಂದೆ ತೀರಿಕೊಂಡಿದ್ದರು. ಹೀಗಾಗಿ ಖಾಸಗಿ ಕಂಪನಿಯಲ್ಲಿ ಕೆಲಸ ಮಾಡಿಕೊಂಡು ನನ್ನ ತಾಯಿಯನ್ನ ನೋಡಿಕೊಳ್ಳುತ್ತಿದ್ದಳು. ಆದರೆ ತಾಯಿಗೆ ಕ್ಯಾನ್ಸರ್ ಇದ್ದ ಕಾರಣ ಮನೆಯಲ್ಲಿ ಮದುವೆಯ ಚಿಂತೆಯಿತ್ತು. ಈ ವೇಳೆ ಮದುವೆಗೆ ಸಂಬಂಧವೊಂದು ಕೂಡಿ ಬಂದಿತ್ತು. ಮದುವೆ ಮುನ್ನವೇ ತಾಯಿ ತೀರಿಕೊಂಡಿದ್ದರು.
ತಾಯಿ ತೀರಿಕೊಂಡರೂ ಸಹ ಆಗ ನೋಡಿದ್ದ ಹುಡುಗನನ್ನೇ ವಿವಾಹವಾಗಲು ಯುವತಿ ಒಪ್ಪಿದ್ದಳು. ಈ ನಡುವೆ ತಾಯಿ ಕೊನೆಯುಸಿರೆಳೆದ ವೇಳೆ ಯುವತಿಗೆ ಒಬ್ಬಂಟಿತನ ಕಾಡ್ತಿತ್ತು. ಆಗ ತಂದೆ ಸಮಾನರಂತಿದ್ದ ವ್ಯಕ್ತಿವೋರ್ವನ ಬಳಿ ತನಗಾದ ನೋವಿನ ಬಗ್ಗೆ ಹೇಳಿಕೊಳ್ಳುತ್ತಿದ್ದಳು. ಆದರೆ ಇದನ್ನೇ ತಪ್ಪಾಗಿ ಅರ್ಥೈಸಿಕೊಂಡ ಯುವಕ ಮದುವೆಯಾದ ಮೊದಲ ದಿನವೇ ಪತ್ನಿಯ ಕನ್ಯತ್ವದ ಬಗ್ಗೆ ಶಂಕೆ ವ್ಯಕ್ತಪಡಿಸಿದ್ದನಂತೆ.
ಬಳಿಕ ಆಸ್ಪತ್ರೆಗೆ ಕರೆದೊಯ್ದು ವರ್ಜಿನಿಟಿ ಟೆಸ್ಟ್ ಕೂಡ ಮಾಡಿಸಿದ್ದಾನೆ. ಬಳಿಕ ಆರೋಗ್ಯ ಹದಗೆಟ್ಟು ಆಗಾಗ ವಾಂತಿ ಆಗುತ್ತಿರುವುದನ್ನೂ ತಪ್ಪಾಗಿ ತಿಳಿದುಕೊಂಡು ಬೇರೊಬ್ಬನಿಂದ ನೀನು ಗರ್ಭಿಣಿಯಾಗಿದ್ದಿಯಾ ಎಂದು ಪತಿಯ ಕುಟುಂಬಸ್ಥರೆಲ್ಲಾ ಹಲ್ಲೆ ಮಾಡಿದ್ದಾರೆ ಎಂದು ಸಂತ್ರಸ್ತೆ ಶಿವಾಜಿನಗರ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದಾಳೆ. ಅಲ್ಲದೆ ಮಹಿಳಾ ಸಹಾಯವಾಣಿಯ ಮೊರೆ ಹೋಗಿ
ಎಲ್ಲ ವಿವರಿಸಿದ್ದಾಳೆ.
ಇನ್ನು ಈ ಬಗ್ಗೆ ಪ್ರತಿಕ್ರಿಯಿಸಿರುವ ಮಹಿಳಾ ಸಹಾಯವಾಣಿ, ಸದ್ಯ ಸಂತ್ರಸ್ತೆಯಿಂದ ಶಿವಾಜಿನಗರ ಪೊಲೀಸ್ ಠಾಣೆಗೆ ದೂರು ಕೊಡಿಸಲಾಗಿದ್ದು, ಆರೋಪಿ ಪತಿಯನ್ನು ಪೊಲೀಸರು ಬಂಧಿಸಿದ್ದಾರೆ ಎಂಬ ಮಾಹಿತಿ ನೀಡಿದ್ದಾರೆ.
