ಬೆಂಗಳೂರು ರೈಲು ನಿಲ್ದಾಣಕ್ಕೆ ‘ಯುವಿ ಬ್ಯಾಗೇಜ್ ಬಾತ್​’... ಲಗೇಜ್​ಗಳಿಂದ ಸೋಂಕು ಹರಡುವಿಕೆ ಭೀತಿ ದೂರ

ರೈಲ್ವೆ ನಿಲ್ದಾಣಗಳಲ್ಲಿ ಕೊರೊನಾ ವಿರುದ್ಧದ ಮುಂಜಾಗೃತಾ ಕ್ರಮಕ್ಕಾಗಿ ಯುವಿ ಬ್ಯಾಗೇಜ್ ಬಾತ್​ ಯಂತ್ರವನ್ನು ಅಳವಡಿಸಲಾಗಿದೆ. ಈ ಮೂಲಕ ಪ್ರಯಾಣಿಕರ ಬ್ಯಾಗ್​ ಮೂಲಕ ಕೊರೊನಾ ಸೋಂಕು ಹರಡುವ ಭೀತಿ ದೂರಾಗಿದೆ.

ಬೆಂಗಳೂರು: ಕೋವಿಡ್ ಸೋಂಕು ಹೆಚ್ಚಾಗುತ್ತಿರುವ ಹಿನ್ನೆಲೆ ಹೆಚ್ಚು ಜನಸಂದಣಿ ಉಂಟಾಗುವ ರೈಲ್ವೆ ನಿಲ್ದಾಣದಲ್ಲಿ ಮುನ್ನೆಚ್ಚರಿಕೆ ವಹಿಸಲು ಮುಂದಾಗಲಾಗಿದೆ. ಹೀಗಾಗಿ ನಗರದ ಸಂಗೊಳ್ಳಿ ರಾಯಣ್ಣ ರೈಲ್ವೆ ನಿಲ್ದಾಣದಲ್ಲಿ ಪ್ರಯಾಣಿಕರ ಬ್ಯಾಗ್​​​​​ಗಳಿಗಾಗಿ ಯುವಿ ಬ್ಯಾಗೇಜ್ ಬಾತ್​​ ನಿರ್ಮಿಸಲಾಗಿದೆ.

ಪ್ರಯಾಣಿಕರ ಲಗೇಜುಗಳ ಮೇಲಿನ ಸೋಂಕು ನಾಶಮಾಡುವ “ಯುವಿ ಬ್ಯಾಗೇಜ್ ಬಾತ್" ಯಂತ್ರವನ್ನು ಇಂದು ಉದ್ಘಾಟಿಸಲಾಗಿದೆ. ಸುರಂಗ ಆಕೃತಿಯ ಈ ಯಂತ್ರದಲ್ಲಿ ಲಗೇಜ್​ ಇಟ್ಟಾಗ ಯಂತ್ರದ ಒಳಗೆ ಹೊಮ್ಮುವ ಅಲ್ಟ್ರಾವೈಲೆಟ್​​ ಕಿರಣಗಳು ಲಗೇಜ್ ಮೇಲಿರುವ ವೈರಸ್​​​​​​ಗಳನ್ನು ನಾಶ ಮಾಡುತ್ತದೆ. ನಂತರ, “ಸೋಂಕು ಕಳದಿದೆ” ಎಂಬ ಚೀಟಿಯನ್ನು ಲಗೇಜ್ ಮೇಲೆ ಅಂಟಿಸಿ ಪ್ರಯಾಣಿಕರಿಗೆ ಹಿಂದಿರುಗಿಸಲಾಗುತ್ತದೆ.

ಯುವಿ ಬ್ಯಾಗೇಜ್​ ಯಂತ್ರ

ಈ ಯಂತ್ರವನ್ನು ಚೆನ್ನೈನ ಮೆ.ಆಪ್ಟಿಮರ್ಸ್ ಬಯೋ ಮತ್ತು ಐಟಿ ಸಲ್ಯೂಷನ್ಸ್ ಅಭಿವೃದ್ಧಿ ಪಡಿಸಿದ್ದು, ಬೆಂಗಳೂರು ಸಂಗೋಳ್ಳಿ ರಾಯಣ್ಣ ನಿಲ್ದಾಣ ಮತ್ತು ಯಶವಂತಪುರ ರೈಲ್ವೆ ನಿಲ್ದಾಣಗಳಲ್ಲಿ ರೈಲ್ವೆಯ NINFRIS ( New&innovative non- fare revenue ideas scheme) ಯೋಜನೆ ಅಡಿಯಲ್ಲಿ ಅಳವಡಿಸಲಾಗುತ್ತಿದೆ.

ನಿರಂತರ ರೈಲುಗಳ ಸೇವೆ ಆರಂಭವಾದ ನಂತರ ಪ್ರಯಾಣಿಕರ ಪ್ರತಿಕ್ರಿಯೆಯನ್ನು ಆಧರಿಸಿ ಇತರ ಪ್ರಮುಖ ರೈಲು ನಿಲ್ದಾಣಗಳಲ್ಲಿ ಈ ಮಾದರಿಯ ಯಂತ್ರಗಳನ್ನು ಅಳವಡಿಸಲು ಚಿಂತನೆ ನಡೆಸಲಾಗುತ್ತಿದೆ.