ಶ್ರೀಜೇಶ್​, ದೀಪಿಕಾ ಹೆಸರು ರಾಜೀವ್ ಗಾಂಧಿ ಖೇಲ್​ರತ್ನಕ್ಕೆ ಶಿಫಾರಸು

ಹಾಕಿ ಇಂಡಿಯಾದಿಂದ ದ್ರೋಣಾಚಾರ್ಯ, ರಾಜೀವ್ ಗಾಂಧಿ ಖೇಲ್​ ರತ್ನ ಹಾಗೂ ಧ್ಯಾನ್​ ಚಂದ್​ ಪ್ರಶಸ್ತಿಗಾಗಿ ಕೆಲ ಆಟಗಾರರ ಹೆಸರು ಶಿಫಾರಸುಗೊಂಡಿದೆ.

ನವದೆಹಲಿ: ಟೀಂ ಇಂಡಿಯಾ ಹಾಕಿ ಗೋಲ್​ ಕೀಪರ್​​​​ ಪಿ.ಆರ್​​​ ಶ್ರೀಜೇಶ್​ ಹಾಗೂ ಮಹಿಳಾ ಹಾಕಿ ತಂಡದ ಆಟಗಾರ್ತಿ ದೀಪಿಕಾ ಅವರ ಹೆಸರನ್ನ ರಾಜೀವ್​ ಗಾಂಧಿ ಖೇಲ್​ ರತ್ನಕ್ಕೆ ಶಿಫಾರಸು ಮಾಡಲಾಗಿದೆ.

ಇದಕ್ಕೆ ಸಂಬಂಧಿಸಿದಂತೆ ಹಾಕಿ ಇಂಡಿಯಾ ಮಾಹಿತಿ ನೀಡಿದ್ದು, ಹರ್ಮನ್​​ಪ್ರೀತ್​ ಸಿಂಗ್​, ವಂದನಾ ಕಠಾರಿಯಾ ನಾಗೂ ನವಜೋತ್​​ ಕೌರ್​ ಹೆಸರನ್ನ ಅರ್ಜುನ್​ ಅವಾರ್ಡ್​ಗೋಸ್ಕರ ಶಿಫಾರಸು ಮಾಡಿದೆ. ಜೀವಮಾನ ಸಾಧನೆಗೋಸ್ಕರ ಧ್ಯಾನ್​ ಚಂದ್​ ಪ್ರಶಸ್ತಿಗಾಗಿ ಹಾಕಿ ಇಂಡಿಯಾದ ಮಾಜಿ ಆಟಗಾರರಾದ ಆರ್​​.ಪಿ ಸಿಂಗ್​, ಸಂಗೈ ಇಬೆಮ್ಹಾಲ್​ ಆಯ್ಕೆಯಾಗಿದ್ದಾರೆ. ಉಳಿದಂತೆ ದ್ರೋಣಾಚಾರ್ಯ ಪ್ರಶಸ್ತಿಗೆ ತರಬೇತುದಾರರಾದ ಬಿ.ಜೆ. ಕರಿಯಪ್ಪ ಹಾಗೂ ಸಿ.ಆರ್​​. ಕುಮಾರ್​​ ಶಿಫಾರಸುಗೊಂಡಿದ್ದಾರೆ.

ಪಿ.ಆರ್​​​ ಶ್ರೀಜೇಶ್​​ 2018ರ ಚಾಂಪಿಯನ್ಸ್​​ ಟ್ರೋಫಿಯಲ್ಲಿ ಬೆಳ್ಳಿ ಪದಕ, 2018ರ ಏಷ್ಯಾ ಗೇಮ್ಸ್​ನಲ್ಲಿ ಕಂಚಿನ ಪದಕ ಹಾಗೂ FIH ಪುರುಷರ ಹಾಕಿ ಫೈನಲ್​ನಲ್ಲಿ ಭಾರತ ಚಿನ್ನದ ಪದಕ ಗೆಲ್ಲುವಲ್ಲಿ ಮಹತ್ವದ ಪಾತ್ರ ನಿರ್ವಹಿಸಿದ್ದರು. ಈಗಾಗಲೇ ಇವರಿಗೆ 2015ರಲ್ಲಿ ಅರ್ಜುನ್​​ ಪ್ರಶಸ್ತಿ ಹಾಗೂ 2017ರಲ್ಲಿ ಪ್ರತಿಷ್ಠಿತ ಪದ್ಮಶ್ರೀ ಪ್ರಶಸ್ತಿ ನೀಡಲಾಗಿದೆ. 2018ರ ಏಷ್ಯನ್​ ಕ್ರೀಡಾಕೂಟದಲ್ಲಿ ಭಾರತ ಬೆಳ್ಳಿ ಪದಕ ಗೆಲ್ಲುವಲ್ಲಿ ದೀಪಿಕಾ ಮಹತ್ವದ ಪಾತ್ರ ವಹಿಸಿದ್ದರು.