ಗೆಲುವಿನ ಖಾತೆ ತೆರೆದ ಆರ್​ಸಿಬಿ: ಪ್ಲೇ ಆಪ್​ ಕನಸು ಜೀವಂತ

ಮಹಿಳಾ ಪ್ರೀಮಿಯರ್​ ಲೀಗ್​ನಲ್ಲಿ ಆರ್​ಸಿಬಿ ಗೆಲುವಿನ ಖಾತೆ ತೆರೆದು ಪ್ಲೇ ಆಪ್​ ಕನಸು ಜೀವಂತವಾಗಿ ಇರಿಸಿಕೊಂಡಿದೆ.

ಮುಂಬೈ (ಮಹಾರಾಷ್ಟ್ರ): ಮಹಿಳಾ ಪ್ರೀಮಿಯರ್​ ಲೀಗ್​ನಲ್ಲಿ ಬೆಂಗಳೂರು ರಾಯಲ್​ ಚಾಲೆಂಜರ್ಸ್​ ತಂಡ ಮೊದಲ ಗೆಲುವು ಸಾಧಿಸಿದೆ. ಯುಪಿ ವಾರಿಯರ್ಸ್​ ತಂಡದ ವಿರುದ್ಧ ಐದು ವಿಕೆಟ್​ಗಳ ಜಯ ದಾಖಲಿಸಿರುವ ಸ್ಮೃತಿ ಮಂಧಾನ ಪ್ಲೇ ಆಪ್​ ಕನಸು ಜೀವಂತವಾಗಿ ಉಳಿಸಿಕೊಂಡಿದೆ.

ಮುಂಬೈನ ಡಿವೈ ಪಾಟೀಲ್ ಸ್ಪೋರ್ಟ್ಸ್​​ ಅಕಾಡೆಮಿ​ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ಆರ್​ಸಿಬಿ ತಂಡ ಟಾಸ್​ ಗೆದ್ದು ಬೌಲಿಂಗ್​ ಆಯ್ದುಕೊಂಡಿತ್ತು. ಮೊದಲು ಬ್ಯಾಟಿಂಗ್​ಗೆ ಇಳಿದ ಯುಪಿ ವಾರಿಯರ್ಸ್​ ತಂಡವನ್ನು 135 ರನ್​ಗಳಿಗೆ ಕಟ್ಟಿ ಹಾಕುವಲ್ಲಿ ಆರ್​ಸಿಬಿ ಬೌಲರ್​ಗಳು ಯಶಸ್ವಿಯಾದರು.

ಆರಂಭಿಕರಾಗಿ ಕಣಕ್ಕಿಳಿದ ನಾಯಕಿ ಅಲಿಸ್ಸಾ ಹೀಲಿ (1) ಮತ್ತು ದೇವಿಕಾ ವೈದ್ಯ (0) ತಂಡಕ್ಕೆ ಉತ್ತಮ ಅಡಿಪಾಯ ಹಾಕುವಲ್ಲಿ ವಿಫಲರಾದರು. ಮೂರನೇ ಕ್ರಮಾಂಕದಲ್ಲಿ ಬಂದ ಕಿರಣ್ ನವಗಿರೆ (22) ಬಾರಿಸಿದರು. ನಂತರದಲ್ಲಿ ಗ್ರೇಸ್ ಹ್ಯಾರಿಸ್ (46) ಬಿರುಸಿನ ಬ್ಯಾಟ್​ ಬೀಸಿದರು. ದೀಪ್ತಿ ಶರ್ಮಾ (22), ಎಕ್ಲೆಸ್ಟೋನ್ (12) ರನ್​ಗಳ ಮಾತ್ರ ಕಲೆ ಹಾಕಿದರು. ಆದರೆ, ಕೊನೆಗೆ 19.3 ಓವರ್​ಗಳಲ್ಲಿ ಸರ್ವಪತನ ಕಂಡ ಯುಪಿ 135 ರನ್​ಗಳನ್ನು ಪೇರಿಸಲು ಶಕ್ತವಾಯಿತು.

ಆರ್​ಸಿಬಿ ಪರ ಎಲ್ಲಿಸ್ ಪೆರ್ರಿ ಮೂರು ವಿಕೆಟ್​ ಕಿತ್ತಿದರು. ಸೋಫಿ ಡಿವೈನ್ ಮತ್ತು ಆಶಾ ಶೋಬನಾ ತಲಾ ಎರಡು ವಿಕೆಟ್​ ಕಬಳಿಸಿದರು. ಮೇಗನ್ ಶುಟ್ ಹಾಗೂ ತಲಾ ಶ್ರೇಯಾಂಕಾ ಪಾಟೀಲ್ ಒಂದು ವಿಕೆಟ್​ ಪಡೆದರು.

136 ರನ್​ಗಳ ಗೆಲುವಿನ ಗುರಿ ಬೆನ್ನಟ್ಟಿದ ಆರ್​ಸಿಬಿ ತಂಡ 18 ಓವರ್​ಗಳಲ್ಲಿ 5 ವಿಕೆಟ್​ ಕಳೆದುಕೊಂಡು ಗೆಲುವಿನ ದಡ ಸೇರಿತು. ಆರಂಭದಲ್ಲೇ 14 ರನ್​ಗಳಿಗೆ 2 ವಿಕೆಟ್​ ಕಳೆದುಕೊಂಡು ಆರ್​ಸಿಬಿ ಆಘಾತ ಅನುಭವಿಸಿತ್ತು. ಸೋಫಿ ಡಿವೈನ್ (14) ಮತ್ತು ನಾಯಕಿ ಸ್ಮೃತಿ ಮಂಧಾನ ಶೂನ್ಯಕ್ಕೆ ವಿಕೆಟ್​ ಒಪ್ಪಿಸಿದರು. ಎಲ್ಲಿಸ್ ಪೆರ್ರಿ (10), ಹೀದರ್ ನೈಟ್ (24), ಕನಿಕಾ ಅಹುಜಾ (46) ಹಾಗೂ ರಿಚಾ ಘೋಷ್​ (31 ಅಜೇಯ) ರನ್​ಗಳ ನೆರವಿನೊಂದಿಗೆ ಆರ್​ಸಿಬಿ ತಂಡ ಗೆಲುವು ಸಾಧಿಸಿತು. ಶ್ರೇಯಾಂಕಾ ಪಾಟೀಲ್ ಅಜೇಯ 5 ರನ್​ ಬಾರಿಸಿದರು. ಯುಪಿ ಪರವಾಗಿ ದೀಪ್ತಿ ಶರ್ಮಾ ಎರಡು ವಿಕೆಟ್​ ಪಡೆದರೆ, ಗ್ರೇಸ್ ಹ್ಯಾರಿಸ್, ಸೋಫಿ ಎಕ್ಲೆಸ್ಟೋನ್, ದೇವಿಕಾ ವೈದ್ಯ ತಲಾ ಒಂದು ವಿಕೆಟ್​ ಪಡೆದರು.

ಇದನ್ನೂ ಓದಿ:ಅಕ್ಷರ್​ ಆಲ್​ರೌಂಡರ್​ ಆಟ ಭಾರತಕ್ಕೆ ಭರವಸೆ: ಏಳನೇ ವಿಕೆಟ್​ಗೂ ಪಟೇಲ್​ ಬ್ಯಾಟಿಂಗ್​ ಬಲ