ವಾಟರ್ ಬಾಯ್ ಆದ ವಿರಾಟ್ ಕೊಹ್ಲಿ ಕೊಲಂಬೊ (ಶ್ರೀಲಂಕಾ):ಕ್ರಿಕೆಟಿಗ ವಿರಾಟ್ ಕೊಹ್ಲಿ ಮೈದಾನದಲ್ಲಿದ್ದಾಗ ಎಷ್ಟು ಅಗ್ರೆಸಿವ್ ಆಗಿರ್ತಾರೋ ಅಷ್ಟೇ ಫನ್ ಮ್ಯಾನ್‌ ಕೂಡಾ. ಮೈದಾನದಲ್ಲಿ ಸಹ ಆಟಗಾರೊಂದಿಗೆ ಡ್ಯಾನ್ಸ್, ಇತರೆ ತುಂಟಾಟದ ಅವರ ವಿಡಿಯೋಗಳು ಈ ಹಿಂದೆ ವೈರಲ್ ಆಗಿದ್ದವು. ಇಂದು ಏಷ್ಯಾಕಪ್ನ ಸೂಪರ್ ಫೋರ್ ಹಂತದ ಬಾಂಗ್ಲಾದೇಶ ವಿರುದ್ಧದ ಪಂದ್ಯದಲ್ಲಿ ವಾಟರ್ ಬಾಯ್ ಆಗಿ ಮೈದಾನಕ್ಕೆ ತಮಾಷೆ ಮಾಡುತ್ತಾ ಓಡಿಕೊಂಡು ಬರುತ್ತಿರುವ ವಿಡಿಯೋ ವೈರಲ್ ಆಗಿದೆ.
ಬಾಂಗ್ಲಾ ವಿರುದ್ಧದ ಔಪಚಾರಿಕ ಪಂದ್ಯದಲ್ಲಿ ಭಾರತ ಪ್ರಮುಖ ಐದು ಆಟಗಾರರಿಗೆ ವಿಶ್ರಾಂತಿ ನೀಡಿದೆ. ಇದರಿಂದ ಏಷ್ಯಾಕಪ್ಗೆ ಆಯ್ಕೆಯಾಗಿದ್ದ 17 ಜನರ ತಂಡದಲ್ಲಿ ಬೆಂಚ್ ಕಾದಿದ್ದ ತಿಲಕ್ ವರ್ಮಾ, ಸೂರ್ಯಕುಮಾರ್ ಯಾದವ್, ಮೊಹಮ್ಮದ್ ಶಮಿ, ಪ್ರಸಿದ್ಧ್ ಕೃಷ್ಣ ಮತ್ತು ಶಾರ್ದೂಲ್ ಠಾಕೂರ್ಗೆ ಅವಕಾಶ ಸಿಕ್ಕಿದೆ. ವಿರಾಟ್ ಕೊಹ್ಲಿ, ಹಾರ್ದಿಕ್ ಪಾಂಡ್ಯ, ಮೊಹಮ್ಮದ್ ಸಿರಾಜ್, ಜಸ್ಪ್ರೀತ್ ಬುಮ್ರಾ ಮತ್ತು ಕುಲ್ದೀಪ್ ಯಾದವ್ ಅವರು ಇಂದಿನ ತಂಡದಲ್ಲಿಲ್ಲ.
ಬಾಂಗ್ಲಾದೇಶ ಬ್ಯಾಟಿಂಗ್ ಸಂದರ್ಭದಲ್ಲಿ ವಿರಾಟ್ ಕೊಹ್ಲಿ ತಂಡದ ವಾಟರ್ ಬಾಯ್ ಆಗಿ ಕಾರ್ಯನಿರ್ವಹಿಸಿದರು. ಸಿರಾಜ್ ಮತ್ತು ಕೊಹ್ಲಿ ನೀರಿನ ಬಾಟಲಿಗಳನ್ನು ಹಿಡಿದುಕೊಂಡು ಮೈದಾನಕ್ಕೆ ಓಡಿಕೊಂಡು ಬರುತ್ತಿರುವ ವಿಡಿಯೋ ಇದಾಗಿದೆ. ಇದರಲ್ಲಿ ವಿರಾಟ್ ಓಟ ತುಂಬಾ ಫನ್ನಿಯಾಗಿದೆ. ಇದಕ್ಕೆ 'ಅತ್ಯಂತ ಹೆಚ್ಚು ಸಂಭಾವನೆ ಪಡೆಯುವ ವಾಟರ್ ಬಾಯ್' ಎಂದು ನೆಟ್ಟಿಗರು ಕಾಮೆಂಟ್ ಮಾಡಿದ್ದಾರೆ.
ವಿರಾಟ್ ಈ ಹಿಂದೆ ವಿಶ್ರಾಂತಿ ನೀಡಿದ್ದ ಪಂದ್ಯಗಳಲ್ಲೂ ವಾಟರ್ ಬಾಯ್ ಆಗಿ ಕಾರ್ಯ ನಿರ್ವಹಿಸಿದ್ದರು. ತಂಡದಲ್ಲಿ ಪ್ರಮುಖ ಆಟಗಾರನಾಗಿರುವ ವಿರಾಟ್ಗೆ ತಾನೊಬ್ಬ ಸ್ಟಾರ್ ಎಂಬ ಅಹಂ ಇಲ್ಲ ಎಂಬುದನ್ನು ನೆಟ್ಟಿಗರು ಗುಣಗಾನ ಮಾಡಿದ್ದಾರೆ. ತಂಡದ ಆಟಕ್ಕೆ ನೀರು ಕೊಟ್ಟು ಸಹಕರಿಸುವವನ ಕೆಲಸವೂ ಅತ್ಯಂತ ಮುಖ್ಯ ಎಂಬುದನ್ನು ವಿರಾಟ್ ನಡೆ ತೋರಿಸಿದೆ. ಇದರಿಂದಾಗಿ ಕೆಲಸದಲ್ಲಿ ಯಾವುದನ್ನೂ ಕನಿಷ್ಠ ಮತ್ತು ಶ್ರೇಷ್ಠ ಎಂದು ವಿರಾಟ್ ಅಳೆಯುವುದಿಲ್ಲ ಎಂಬುದಾಗಿ ಕ್ರಿಕೆಟ್‌ಪ್ರಿಯರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ಅಭ್ಯಾಸಕ್ಕೆ ತೆರಳಿದ ವಿರಾಟ್: ಭಾರತ ಎರಡನೇ ಇನ್ನಿಂಗ್ಸ್ ಆರಂಭಿಸುತ್ತಿದ್ದಂತೆ ವಿರಾಟ್ ಕೊಹ್ಲಿ ಏಷ್ಯಾಕಪ್ ಫೈನಲ್ಸ್ಗಾಗಿ ಅಭ್ಯಾಸಕ್ಕೆ ತೆರಳಿದ್ದಾರೆ. ಸೆಪ್ಟೆಂಬರ್ 17 ರಂದು ಶ್ರೀಲಂಕಾ ವಿರುದ್ಧ ಭಾರತ ಏಷ್ಯಾಕಪ್ ಫೈನಲ್ ಆಡಲಿದೆ. ಸೂಪರ್ ಫೋರ್ ಹಂತದಲ್ಲಿ ಲಂಕಾ ಸ್ಪಿನ್ನರ್ಗೆ ವಿಕೆಟ್ ಕೊಟ್ಟಿದ್ದ ವಿರಾಟ್ ಫೈನಲ್ನಲ್ಲಿ ಕಮ್ಬ್ಯಾಕ್ ಮಾಡುವ ಉತ್ಸಾಹದಲ್ಲಿದ್ದಾರೆ. ಭಾನುವಾರ ಮಳೆ ಬಂದಲ್ಲಿ ಸೋಮವಾರವನ್ನು ಮೀಸಲು ದಿನ ಎಂದು ಎಸಿಸಿ ಪ್ರಕಟಿಸಿದೆ.
ಭಾರತಕ್ಕೆ 266 ರನ್ ಗುರಿ: ಬಾಂಗ್ಲಾದ ಮೊದಲ ಮೂರು ವಿಕೆಟ್ ಪತನದ ನಂತರ ಮಧ್ಯಮ ಕ್ರಮಾಂಕದಲ್ಲಿ ಕಮ್ಬ್ಯಾಕ್ ಮಾಡಿತು. ನಾಯಕ ಶಕೀಬ್ ಅಲ್ ಹಸನ್ ಮತ್ತು ಹೃದಯೋಯ್ ಅವರ ಅರ್ಧಶತಕದ ಆಟದ ನೆರವಿನಿಂದ ಬಾಂಗ್ಲಾ 50 ಓವರ್ಗೆ 8 ವಿಕೆಟ್ ನಷ್ಟಕ್ಕೆ 265 ರನ್ ಗಳಿಸಿದೆ. ಈ ರನ್ ಗುರಿಯನ್ನು ಭಾರತ ಚೇಸ್‌ ಮಾಡುತ್ತಿದೆ. ಸದ್ಯ ಕ್ರೀಸ್ನಲ್ಲಿ ಆರಂಭಿಕ ಶುಭ್‌ಮನ್ ಗಿಲ್ ಮತ್ತು ಅಕ್ಸರ್‌ ಪಟೇಲ್‌ ಆಡುತ್ತಿದ್ದು ಭಾರತ 6 ವಿಕೆಟ್ ನಷ್ಟಕ್ಕೆ 183 ರನ್ ಗಳಿಸಿದೆ.
ಇದನ್ನೂ ಓದಿ:ಏಷ್ಯಾಕಪ್‌ನಲ್ಲಿಂದು ಭಾರತ-ಬಾಂಗ್ಲಾದೇಶ ಫೈಟ್: ಟಾಸ್‌ ಗೆದ್ದ ಭಾರತ ಬೌಲಿಂಗ್, ತಿಲಕ್ ವರ್ಮಾ ಪಾದಾರ್ಪಣೆ
