IND vs SA 1st T20: ಬೌಲರ್​ಗಳ ಕಳಪೆ ಪ್ರದರ್ಶನ; ದ.ಆಫ್ರಿಕಾ ಎದುರು ಮುಗ್ಗರಿಸಿದ ಭಾರತ

ಬೃಹತ್​ ಮೊತ್ತ ಪೇರಿಸಿದ ಹೊರತಾಗಿಯೂ ಭಾರತ ತಂಡ ಬೌಲರ್​ಗಳ ಕಳಪೆ ಪ್ರದರ್ಶನದಿಂದ ದಕ್ಷಿಣ ಆಫ್ರಿಕಾ ವಿರುದ್ಧದ ಮೊದಲ ಟಿ-20 ಪಂದ್ಯದಲ್ಲಿ ಸೋಲು ಕಂಡಿದ್ದು, 5 ಪಂದ್ಯಗಳ ಸರಣಿಯಲ್ಲಿ ದಕ್ಷಿಣ ಆಫ್ರಿಕಾ 1-0ರ ಮುನ್ನಡೆ ಪಡೆದಿದೆ.

ನವದೆಹಲಿ:ಬೃಹತ್​ ಮೊತ್ತ ಪೇರಿಸಿದ ಹೊರತಾಗಿಯೂ ಭಾರತ ತಂಡ ಬೌಲರ್​ಗಳ ಕಳಪೆ ಪ್ರದರ್ಶನದಿಂದ ದಕ್ಷಿಣ ಆಫ್ರಿಕಾ ವಿರುದ್ಧದ ಮೊದಲ ಟಿ-20 ಪಂದ್ಯದಲ್ಲಿ ಸೋಲು ಕಂಡಿದೆ. ಟಾಸ್​ ಸೋತು ಮೊದಲು ಬ್ಯಾಟ್​ ಮಾಡಿದ ಭಾರತ 20 ಓವರ್​ಗಳಲ್ಲಿ ಅಗ್ರಪಂಕ್ತಿ ಬ್ಯಾಟರ್‌​ಗಳ ಸಹಾಯದಿಂದ 211 ರನ್​ ಗಳಿಸಿತ್ತು. ಇದಕ್ಕುತ್ತರವಾಗಿ ದಕ್ಷಿಣ ಆಫ್ರಿಕಾ 19.1 ಓವರ್​ನಲ್ಲಿ 212 ಗಳಿಸಿ ವಿಜಯದ ನಗೆ ಬೀರಿತು.

ಕಿಲ್ಲರ್​ ಮಿಲ್ಲರ್​, ಡ್ಯಾಷಿಂಗ್​ ಡಸೆನ್​:ಎದುರುಗಡೆ 211 ರನ್​ಗಳ ಬೃಹತ್​ ಮೊತ್ತವಿದ್ದರೂ ಎದೆಗುಂದದೇ ಬ್ಯಾಟ್​ ಮಾಡಿದ ದಕ್ಷಿಣ ಆಫ್ರಿಕಾ ಆಟಗಾರರು ಸಿಕ್ಸರ್​ಗಳ ಸುರಿಮಳೆ ಸುರಿಸಿದರು. ಆರಂಭಿಕ ಆಟಗಾರ ಕ್ವಿಂಟನ್​ ಡಿ ಕಾಕ್​ 22 ರನ್​ ಗಳಿಸಿದರೆ, ನಾಯಕ ತೆಂಬಾ ಬವುಮಾ 10 ರನ್​ ಗಳಿಸಿ ಔಟಾದರು. ಆಲ್​ರೌಂಡರ್​ ಸ್ವೇನ್​ ಪ್ರಿಟೋರಿಯಸ್​ 4 ಸಿಕ್ಸರ್​ ಸಮೇತ 29 ರನ್​ಗಳಿಸಿದರು.

ನಂತರ ಬಂದ ರಸ್ಸಿ ವ್ಯಾನ್​ಡರ್​ ಡಸ್ಸೆನ್​ ಮತ್ತು ಐಪಿಎಲ್​ನಲ್ಲಿ ಮಿಂಚಿದ್ದ ಡೇವಿಡ್​ ಮಿಲ್ಲರ್​ ಭಾರತೀಯ ಬೌಲರ್​ಗಳನ್ನು ದಂಡಿಸುವ ಮೂಲಕ ತಂಡವನ್ನು ಗೆಲುವಿನ ದಡ ಮುಟ್ಟಿಸಿದರು. ಡಸ್ಸೆನ್​ 46 ಎಸೆತಗಳಲ್ಲಿ 5 ಸಿಕ್ಸರ್​, 7 ಬೌಂಡರಿ ಸಮೇತ 75 ರನ್​ ಗಳಿಸಿದರೆ, ಮಿಲ್ಲರ್​ 31 ಎಸೆತಗಳಲ್ಲ 64 ರನ್​ ಚಚ್ಚಿ ಬೌಲರ್​ಗಳ ಬೆವರಿಳಿಸಿದರು. ಇವರ ಇನ್ನಿಂಗ್ಸ್​ನಲ್ಲಿ 4 ಬೌಂಡರಿ 5 ಭರ್ಜರಿ ಸಿಕ್ಸರ್​ಗಳು ಇದ್ದವು.

ಇಶಾನ್​ ಕಿಶನ್​ ಸಾಹಸ:ಟಾಸ್​ ಸೋತರೂ ಮೊದಲು ಬ್ಯಾಟ್ ಮಾಡಿದ ಭಾರತ ಅಗ್ರ 5 ಬ್ಯಾಟರ್​ಗಳ ಸಹಾಯದಿಂದ 211 ರನ್​ಗಳ ಬೃಹತ್​ ಮೊತ್ತ ಪೇರಿಸಿತು. ಇದರಲ್ಲಿ ಆರಂಭಿಕ ಆಟಗಾರ ಇಶಾನ್​ ಕಿಶನ್​ 48 ಎಸೆತಗಳಲ್ಲಿ 3 ಸಿಕ್ಸರ್​ 11 ಬೌಂಡರಿಗಳಿಂದ 76 ರನ್​ ಗಳಿಸಿದರು. ಮೊದಲ ಬಾರಿಗೆ ಅವಕಾಶ ಪಡೆದ ಋತುರಾಜ್​ ಗಾಯಕ್ವಾಡ್​(23), ಶ್ರೇಯಸ್​ ಅಯ್ಯರ್​(36), ನಾಯಕ ರಿಷಬ್​ ಪಂತ್​(29), ಹಾರ್ದಿಕ್​ ಪಾಂಡ್ಯಾ(31) ಗಳಿಸಿದರು.

ಬೌಲಿಂಗ್​ ಪಡೆ ಫೇಲ್​:ಐಪಿಎಲ್​ನಲ್ಲಿ ಮಿಂಚಿದ್ದ ಭಾರತೀಯ ಬೌಲರ್​ಗಳು ದಕ್ಷಿಣ ಆಫ್ರಿಕಾ ತಂಡದೆದುರು ಮಂಡಿಯೂರಿದರು. ವೇಗಿ ಅವೇಶ್​ ಖಾನ್​ ಹೊರತುಪಡಿಸಿದರೆ ಎಲ್ಲಾ ಬೌಲರ್​ಗಳು ದಂಡನೆಗೆ ಒಳಗಾದರು. ಆವೇಶ್​ ಖಾನ್​ 3 ವಿಕೆಟ್​ ಪಡೆದರೆ, ಭುವನೇಶ್ವರ್​ ಕುಮಾರ್​ 1 ವಿಕೆಟ್​ ಪಡೆದರು. ಸ್ಪಿನ್ನರ್​ ಯಜುವೇಂದ್ರ ಚಹಲ್​, ಹಾರ್ದಿಕ್​ ಪಾಂಡ್ಯಾ, ಹರ್ಷಲ್​ ಪಟೇಲ್​, ಅಕ್ಷರ್​ ಪಟೇಲ್​ ದುಬಾರಿಯಾಗುವ ಮೂಲಕ ಪಂದ್ಯ ಸೋಲುವಂತಾಯಿತು.

ಇದನ್ನೂ ಓದಿ:ಟೀಂ ಇಂಡಿಯಾ ನಾಯಕತ್ವಕ್ಕೆ ಹಾರ್ದಿಕ್ ಪಾಂಡ್ಯ ಪ್ರಬಲ ಸ್ಪರ್ಧಿ: ಹರ್ಭಜನ್ ಸಿಂಗ್​