ಸೋಫಿ ಡಿವೈನ್​ ಹೊಡೆತಕ್ಕೆ 94 ಮೀಟರ್​ ದೂರ ಹೋಗಿ ಬಿದ್ದ ಚೆಂಡು! ಮಹಿಳಾ ಕ್ರಿಕೆಟ್​ನಲ್ಲಿ ಸಂಚಲನ

ಮಹಿಳಾ ಪ್ರೀಮಿಯರ್​ ಲೀಗ್​ನಲ್ಲಿ ನಿನ್ನೆ ಆರ್​ಸಿಬಿ ತಂಡದ ಸೋಫಿ ಡಿವೈನ್​ 94 ಮೀಟರ್ ದೂರ ಸಿಕ್ಸರ್ ಬಾರಿಸಿದ್ದರು. ಇದು ಪ್ರಸ್ತುತ ಲೀಗ್​ನ ದೊಡ್ಡ ಸಿಕ್ಸರ್​ ಆಗಿದೆ.

ಮುಂಬೈ:ಮಹಿಳಾ ಪ್ರೀಮಿಯರ್​ ಲೀಗ್​ನಲ್ಲಿ ನಿನ್ನೆ ನಡೆದ ಪಂದ್ಯದಲ್ಲಿ ಗುಜರಾತ್​ ಜೈಂಟ್ಸ್​ ವಿರುದ್ಧ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ಅಧಿಕಾರಯುತ ಗೆಲುವು ಸಾಧಿಸಿತು. ಸೋಫಿ ಡಿವೈನ್​ರ ಆರ್ಭಟದ ಬ್ಯಾಟಿಂಗ್​ ಮುಂದೆ ಗುಜರಾತ್​ ಸೊಲ್ಲೆತ್ತಲಿಲ್ಲ. ಪಂದ್ಯದಲ್ಲಿ ಸೋಫಿ 8 ಸಿಕ್ಸರ್​ ಬಾರಿಸಿ ಕ್ರಿಕೆಟ್​ ರಸದೌತಣ ನೀಡಿದರು. ಇದೇ ವೇಳೆ ಚೆಂಡನ್ನು 94 ಮೀಟರ್​ ದೂರ ಹೊಡೆದು ಅಚ್ಚರಿ ಮೂಡಿಸಿದರು.

ಸೋಫಿ ಹೊಡೆದ ಭರ್ಜರಿ ಸಿಕ್ಸರ್​ ಸಾಮಾಜಿಕ ಜಾಲತಾಣದಲ್ಲಿ ಪಟಾಕಿ ಹಚ್ಚಿದೆ. ಇದರ ವಿಡಿಯೋ ವೈರಲ್​ ಆಗುತ್ತಿದ್ದು, ಸಿಕ್ಸರ್​ ಹೊಡೆದ ಬಳಿಕ ಸೋಫಿಯೇ ಒಂದು ಕ್ಷಣ ಅಚ್ಚರಿಪಟ್ಟರು. ಇನ್ನು ಡಗೌಟ್​ನಲ್ಲಿದ್ದ ಎಲ್ಲ ಆಟಗಾರ್ತಿಯರು ಸೋಫಿ ಪಂಚ್​ಗೆ ಬೆಕ್ಕಸಬೆರಗಾದರು. ಇದಕ್ಕೂ ಮೊದಲು ಪಾಕಿಸ್ತಾನದ ಆಯೇಷಾ ನಸೀಮ್​ ಟಿ20 ವಿಶ್ವಕಪ್​ನಲ್ಲಿ ಭಾರತದ ವಿರುದ್ಧ 81 ಮೀಟರ್​ ದೂರ ಸಿಕ್ಸರ್​ ಬಾರಿಸಿದ್ದರು.

6,4,4,6,4:ಗುಜರಾತ್​ ನೀಡಿದ್ದ 189 ರನ್‌ಗಳ ಬೃಹತ್​ ಮೊತ್ತದ ಗುರಿ ಬೆನ್ನತ್ತಿದ ಆರ್‌ಸಿಬಿ ಸ್ಫೋಟಕ ಆರಂಭ ಕಂಡಿತು. ಆರಂಭಿಕರಾದ ಸೋಫಿ ಡಿವೈನ್ ಮತ್ತು ಸ್ಮೃತಿ ಮಂಧಾನ ಗುಜರಾತ್ ಜೈಂಟ್ಸ್ ಬೌಲರ್‌ಗಳ ಮೇಲೆರಗಿದರು. ಅದರಲ್ಲೂ ಸೋಫಿ, ಮೊದಲ ಓವರ್​ನಿಂದಲೇ ಅಬ್ಬರಿಸಿದರು. ಅವಕಾಶ ಸಿಕ್ಕಾಗಲೆಲ್ಲಾ ಅವರು ಚೆಂಡನ್ನು ಬೌಂಡರಿ ಗೆರೆ ದಾಟಿಸಿದರು. ಆಶ್ಲೀ​ ಗಾರ್ಡ್ನರ್​ ಎಸೆದ 2ನೇ ಓವರ್​ನಲ್ಲಿ ಸೋಫಿ ತನ್ನ ಅಸಲಿ ಖದರ್​ ತೋರಿಸಿದರು. ಮೊದಲ ಎಸೆತ ಡಾಟ್​ ಮಾಡಿದರೆ, ಉಳಿದ ಐದು ಎಸೆತಗಳನ್ನು 6,4,4,6,4 ಬಾರಿಸಿ 24 ರನ್ ಗಳಿಸಿದರು. ಇದು ಮೈದಾನದಲ್ಲಿದ್ದ ಆರ್​ಸಿಬಿ ಅಭಿಮಾನಿಗಳನ್ನು ರಂಜಿಸಿತು.

ಆರ್‌ಸಿಬಿ ಆಟಗಾರ್ತಿಯರ ಆರ್ಭಟದಿಂದ ಕೇವಲ 3.4 ಓವರ್‌ಗಳಲ್ಲಿ ತಂಡ 50 ರನ್‌ ಗಡಿ ದಾಟಿತು. ಆರು ಓವರ್‌ಗಳ ಪವರ್‌ಪ್ಲೇ ಮುಕ್ತಾಯದ ವೇಳೆಗೆ ವಿಕೆಟ್​ ನಷ್ಟವಿಲ್ಲದೇ, 77 ರನ್​ ದಾಖಲಿಸಿತ್ತು. ಇದು ಮಹಿಳಾ ಐಪಿಎಲ್​ನಲ್ಲಿ ತಂಡವೊಂದು ಪವರ್​ಪ್ಲೇಯಲ್ಲಿ ಬಾರಿಸಿದ ಅತ್ಯಧಿಕ ಮೊತ್ತವಾಯಿತು.

ನ್ಯೂಜಿಲ್ಯಾಂಡ್​ನ ಸೋಫಿ ಡಿವೈನ್ ಕೇವಲ 20 ಎಸೆತಗಳಲ್ಲಿ ಅರ್ಧಶತಕವನ್ನು ಪೂರೈಸಿದರು. ಈ ವೇಳೆಗಾಗಲೇ 6 ಬೌಂಡರಿ ಮತ್ತು 4 ಸಿಕ್ಸರ್‌ಗಳು ಅವರ ಬ್ಯಾಟ್​ನಿಂದ ಸಿಡಿದಿದ್ದವು. ಇನ್ನೊಂದು ತುದಿಯಲ್ಲಿ ನಾಯಕಿ ಸ್ಮೃತಿ ಮಂಧಾನ ಆಗಾಗ ದೊಡ್ಡ ಹೊಡೆತಕ್ಕೆ ಕೈ ಹಾಕಿ, ಹೆಚ್ಚಿನ ಸ್ಟ್ರೈಕ್ ಅನ್ನು ಡಿವೈನ್​ ಅವರಿಗೆ ನೀಡಿದರು. ಇದರಿಂದ ಆರ್​ಸಿಬಿ ಕೇವಲ 8 ಓವರ್‌ಗಳಲ್ಲಿ 100 ರನ್‌ಗಳ ಗಡಿ ದಾಟಿತು.

ಆಕಾಶಕ್ಕೆ ಸಿಡಿದ ಚೆಂಡು:ಒಂಬತ್ತನೇ ಓವರ್‌ ಎಸೆಯಲು ಬಂದ ತನುಜಾ ಕನ್ವರ್​ಗೆ ಡಿವೈನ್ ಬೆವರಿಳಿಸಿದರು. 3 ಸಿಕ್ಸರ್ ಮತ್ತು 1 ಬೌಂಡರಿ ಬಾರಿಸಿದರು. ಇದರಲ್ಲಿ ಒಂದು ಸಿಕ್ಸರ್​ 94 ಮೀಟರ್ ದೂರ ದಾಖಲಾಯಿತು. ಇದು ಈವರೆಗಿನ ಅತ್ಯಧಿಕ ಅಂತರದ ಸಿಕ್ಸರ್​ ಎಂದು ಪರಿಗಣಿತವಾಯಿತು. ಆರ್‌ಸಿಬಿ ಈ ಓವರ್​ನಲ್ಲಿ 25 ರನ್ ಗಳಿಸಿತು. ತಂಡ ಒಟ್ಟಾರೆ 125 ರನ್​ ಗಳಿಸಿತ್ತು. ಇದೇ ವೇಳೆ ನಾಯಕಿ ಮಂಧಾನ ದೊಡ್ಡ ಹೊಡೆತಕ್ಕೆ ಕೈ ಹಾಕಿ ವಿಕೆಟ್​ ನೀಡಿದರು.

ಪ್ಲೇಆಫ್ ಕನಸು ಜೀವಂತ!: ಇಷ್ಟಾದರೂ ಬಿಡದ ಡಿವೈನ್​ ಬ್ಯಾಟಿಂಗ್​ ಅಬ್ಬರ ಮುಂದುವರಿಸಿದರು. ತಂಡ 11.1 ಓವರ್‌ಗಳಲ್ಲಿ 150 ರನ್‌ ಗಳಿಸಿತ್ತು. ಸೋಫಿ ಡಿವೈನ್ 36 ಎಸೆತಗಳಲ್ಲಿ 99 ರನ್ ಗಳಿಸಿದ್ದರು. ಶತಕದ ಅಂಚಿನಲ್ಲಿದ್ದ ಆಟಗಾರ್ತಿಗೆ ಕಿಮ್​ ಗಾರ್ತ್ ಶಾಕ್​ ನೀಡಿದರು. ತೇಲಿಬಂದ ಚೆಂಡನ್ನು ಬಾರಿಸಲು ಮುಂದಾದ ಡಿವೈನ್​ ಅಶ್ವನಿ ಕುಮಾರಿಗೆ ಕ್ಯಾಚಿತ್ತು ಔಟಾದರು. ಇದರಿಂದ ಸೋಫಿ 1 ರನ್ನಿಂದ ಶತಕ ವಂಚಿತರಾದರು. ಕೊನೆಯಲ್ಲಿ ಹೀಥರ್​ ನೈಟ್ ಮತ್ತು ಪೆರ್ರಿ ಉಳಿದ ರನ್​ ಕಲೆ ಹಾಕಿ 27 ಎಸೆತಗಳು ಬಾಕಿ ಇರುವಂತೆಯೇ ಪಂದ್ಯ ಗೆಲ್ಲಿಸಿಕೊಟ್ಟರು. ಆರ್​ಸಿಬಿ ಸತತ ಐದು ಸೋಲಿನ ಬಳಿಕ 2ನೇ ಗೆಲುವು ದಾಖಲಿಸಿ ಪ್ಲೇ ಆಫ್​ ಆಸೆ ಜೀವಂತವಾಗಿರಿಸಿಕೊಂಡಿತು.

ಇದನ್ನೂ ಓದಿ:36 ಎಸೆತ 99 ರನ್! ಸೋಫಿ ಡಿವೈನ್ RCBಯ ಕ್ರಿಸ್‌ ಗೇಲ್ ಎಂದ ನೆಟ್ಟಿಗರು! ಪ್ಲೇ ಆಫ್‌ಗೇರುತ್ತಾ ಮಂಧಾನ ಟೀಂ?