ವಿರಾಟ್​, ರೋಹಿತ್​ಗಿಂತಲೂ ರಾಹುಲ್​ ಬಳಿ ಹೆಚ್ಚಿನ ಬ್ಯಾಟಿಂಗ್​ ಸಾಮರ್ಥ್ಯ: ಗೌತಮ್​ ಗಂಭೀರ್

ಐಪಿಎಲ್​ನಲ್ಲಿ ಉತ್ತಮ ಪ್ರದರ್ಶನ ನೀಡಿರುವ ಕನ್ನಡಿಗ ರಾಹುಲ್​, ಟೀಂ ಇಂಡಿಯಾ ಕ್ಯಾಪ್ಟನ್​ ಹಾಗೂ ಉಪನಾಯಕನಿಗಿಂತಲೂ ಹೆಚ್ಚಿನ ಬ್ಯಾಟಿಂಗ್​​ ಸಾಮರ್ಥ್ಯ ಹೊಂದಿದ್ದಾರೆಂದು ಗಂಭೀರ್ ತಿಳಿಸಿದ್ದಾರೆ.

ನವದೆಹಲಿ:ಟೀಂ ಇಂಡಿಯಾ ಕ್ಯಾಪ್ಟನ್​ ವಿರಾಟ್​​ ಕೊಹ್ಲಿ ಹಾಗೂ ಉಪನಾಯಕ ರೋಹಿತ್​ ಶರ್ಮಾಗಿಂತಲೂ ಕನ್ನಡಿಗ ಕೆ.ಎಲ್​ ರಾಹುಲ್​ ಬಳಿ ಹೆಚ್ಚಿನ ಸಾಮರ್ಥ್ಯವಿದೆ ಎಂದು ಮಾಜಿ ಆಟಗಾರ ಗೌತಮ್​ ಗಂಭೀರ್​ ಅಭಿಪ್ರಾಯಪಟ್ಟಿದ್ದಾರೆ.

ಇಂಡಿಯನ್​​ ಪ್ರೀಮಿಯರ್ ಲೀಗ್​​ನಲ್ಲಿ ಪಂಜಾಬ್​ ಕಿಂಗ್ಸ್​ ತಂಡದ ನಾಯಕನಾಗಿರುವ ಕೆ.ಎಲ್​ ರಾಹುಲ್​, ಚೆನ್ನೈ ಸೂಪರ್​​​ ಕಿಂಗ್ಸ್​​ ವಿರುದ್ಧದ ಪಂದ್ಯದಲ್ಲಿ ಏಕಾಂಗಿಯಾಗಿ ಕೇವಲ 42 ಎಸೆತಗಳಲ್ಲಿ ಅಜೇಯ 98ರನ್​ಗಳಿಕೆ ಮಾಡಿ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರ ನಿರ್ವಹಿಸಿದ್ದರು.

ರೋಹಿತ್​​ ಶರ್ಮಾ-ವಿರಾಟ್​​ ಕೊಹ್ಲಿ

ಇದರ ಬಗ್ಗೆ ಮಾತನಾಡಿರುವ ಗೌತಮ್​ ಗಂಭೀರ್​, 29 ವರ್ಷದ ರಾಹುಲ್​​, ಕ್ರಿಕೆಟಿಗರಾದ ವಿರಾಟ್​ ಕೊಹ್ಲಿ ಹಾಗೂ ರೋಹಿತ್​ ಶರ್ಮಾ ಅವರಿಗಿಂತಲೂ ಹೆಚ್ಚಿನ ಸಾಮರ್ಥ್ಯ ಹೊಂದಿದ್ದಾರೆ. ಐಪಿಎಲ್​​ ಅಭಿಯಾನದ ಉದ್ದಕ್ಕೂ ಅವರ ಬ್ಯಾಟಿಂಗ್​ ಪ್ರದರ್ಶನ ಉತ್ತಮವಾಗಿದ್ದು, ಅವರಲ್ಲಿ ಇತರರಿಗಿಂತಲೂ ಹೆಚ್ಚಿನ ಹೊಡೆತ ಹೊಂದಿದ್ದಾರೆಂದು ಹೇಳಿಕೊಂಡಿದ್ದಾರೆ.ಅನೇಕ ಪಂದ್ಯಗಳಲ್ಲಿ ಅದನ್ನ ಕನ್ನಡಿಗ ರಾಹುಲ್​ ಸಾಬೀತುಪಡಿಸಿದ್ದಾರೆಂದು ತಿಳಿಸಿದ್ದಾರೆ.

ಆಟವಾಡಿ, ಭಾರತದಲ್ಲಿ ಮಾತ್ರವಲ್ಲ, ನಿಮ್ಮ ಸಾಮರ್ಥ್ಯವನ್ನ ಇಡೀ ಪ್ರಪಂಚಕ್ಕೆ ತೋರಿಸಿ. ಜನರು ರೋಹಿತ್​, ವಿರಾಟ್​ ಬಗ್ಗೆ ಮಾತನಾಡುವಾಗ ಖಂಡಿತವಾಗಿ ನಿಮ್ಮ ಹೆಸರು ತೆಗೆದುಕೊಳ್ಳುತ್ತಾರೆ. ಇದಕ್ಕೆ ಕಾರಣವಾಗಿದ್ದು, ನಿಮ್ಮ ಬ್ಯಾಟಿಂಗ್​ ಸಾಮರ್ಥ್ಯ ಎಂದು ಗಂಭೀರ್ ಹೇಳಿದ್ದಾರೆ.

14ನೇ ಆವೃತ್ತಿ ಇಂಡಿಯನ್​​ ಪ್ರೀಮಿಯರ್​ ಲೀಗ್​​​ನಲ್ಲಿ ಪಂಜಾಬ್​ ತಂಡ 14 ಪಂದ್ಯಗಳಿಂದ 12 ಅಂಕಗಳಿಕೆ ಮಾಡಿದ್ದು, ಪ್ಲೇ-ಆಫ್​​ ಪ್ರವೇಶ ಮಾಡುವಲ್ಲಿ ವಿಫಲಗೊಂಡಿದೆ. ಆದರೆ, ರಾಹುಲ್​​​​​ 13 ಪಂದ್ಯಗಳಿಂದ 626ರನ್​​ಗಳಿಕೆ ಮಾಡಿ ಮಿಂಚಿದ್ದಾರೆ. ಕೆಲವೊಂದು ಪಂದ್ಯಗಳಲ್ಲಿ ಆಕ್ರಮಣಕಾರಿ ಪ್ರದರ್ಶನ ತೋರುವಲ್ಲಿ ರಾಹುಲ್​ ವಿಫಲಗೊಂಡಿರುವ ಕಾರಣ, ಪ್ಲೇ-ಆಫ್​ ಹಂತಕ್ಕೆ ಹೋಗುವಲ್ಲಿ ಎಡವಿದೆ ಎಂದು ಇದೇ ವೇಳೆ ಗಂಭೀರ್​ ಅಭಿಪ್ರಾಯಪಟ್ಟಿದ್ದಾರೆ.