ಮಾರ್ಕಸ್, ಪೂರನ್ ಸಿಡಿಲಬ್ಬರದ ಬ್ಯಾಟಿಂಗ್: ಬೆಂಗಳೂರು ವಿರುದ್ಧ ರಾಹುಲ್​ ಪಡೆಗೆ ರೋಚಕ ಗೆಲುವು

ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಲಖನೌ ನಾಯಕ ಕೆ.ಎಲ್.ರಾಹುಲ್ ಪಡೆಯು​ ಆರ್​ಸಿಬಿ ವಿರುದ್ಧ ಗೆಲುವಿನ ಕೇಕೆ ಹಾಕಿದೆ.

ಬೆಂಗಳೂರು:ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ವಿರುದ್ಧ ಲಖನೌ ಸೂಪರ್​ ಜೈಂಟ್ಸ್ ರೋಚಕ ಜಯ ದಾಖಲಿಸಿದೆ. ಮಾರ್ಕಸ್ ಸ್ಟೊಯಿನಿಸ್ ಮತ್ತು ನಿಕೋಲಸ್ ಪೂರನ್ ಸಿಡಿಲಬ್ಬರದ ಬ್ಯಾಟಿಂಗ್​ ನೆರವಿನಿಂದ ಕೆಎಲ್​ ರಾಹುಲ್​ ಪಡೆಯು ಒಂದು ವಿಕೆಟ್​ನಿಂದ ಗೆಲುವು ಸಾಧಿಸಿದೆ.

ಇಲ್ಲಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಟಾಸ್​ ಮೊದಲ ಬ್ಯಾಟಿಂಗ್​ಗೆ ಇಳಿದ ಆರ್​ಸಿಬಿ ಮೂವರು ಅಗ್ರ ಕ್ರಮಾಂಕದ ಬ್ಯಾಟರ್​ಗಳು ಅರ್ಧಶತಕದೊಂದಿಗೆ 20 ಓವರ್​ಗಳಲ್ಲಿ ಕೇವಲ 2 ವಿಕೆಟ್​ ನಷ್ಟಕ್ಕೆ 212 ರನ್​ಗಳ ಬೃಹತ್​ ಮೊತ್ತವನ್ನು ಪೇರಿಸಿತ್ತು.

ಈ ಸವಾಲಿನ ಗುರಿ ಬೆನ್ನಟ್ಟಿದ್ದ ಕೆಎಲ್​ ರಾಹುಲ್​ ನೇತೃತ್ವದ ಲಖನೌ ತಂಡ ನಿರೀಕ್ಷಿತ ಆರಂಭವನ್ನು ಪಡೆಯಲಿಲ್ಲ. ಆರಂಭಿಕ ಬ್ಯಾಟರ್ ಕೈಲ್ ಮೇಯರ್ಸ್ ಅವರನ್ನು ಮೊಹಮ್ಮದ್​ ಸಿರಾಜ್​ ಶೂನ್ಯಕ್ಕೆ ಪೆವಿಲಿಯನ್​ಗೆ ಕಳುಹಿಸಿದರು. ನಂತರದಲ್ಲಿ ವೇಯ್ನ್ ಪಾರ್ನೆಲ್ ಅವರು ಒಂದೇ ಓವರ್​ನಲ್ಲಿ ದೀಪಕ್​ ಹುಡಾ 9 ರನ್​ ಮತ್ತು ಕೃನಾಲ್​ ಪಾಂಡ್ಯ ಅವರನ್ನು ಶೂನ್ಯಕ್ಕೆ ಔಟ್​ ಮಾಡಿದರು. ಇದರಿಂದ 23 ರನ್​ಗಳಿಗೆ ಲಖನೌ ತಂಡ ಮೂರು ವಿಕೆಟ್​ಗಳನ್ನು ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತ್ತು.

ನಾಲ್ಕನೇ ವಿಕೆಟ್​ಗೆ ನಾಯಕ ರಾಹುಲ್ ಮತ್ತು ಮಾರ್ಕಸ್ ಸ್ಟೊಯಿನಿಸ್ ಉತ್ತಮ ಜೊತೆಯಾಟ ನೀಡಿದರು. ಮಾರ್ಕಸ್ (65)​​ ಬಿರುಸಿನ ಬ್ಯಾಟಿಂಗ್​ ಪ್ರರ್ದಶಿಸಿದರೆ ರಾಹುಲ್​ (18) ತಾಳ್ಮೆ ಆಟವಾಡಿದರು. ಮಾರ್ಕಸ್​ 30 ಬಾಲ್​ಗಳಲ್ಲಿ ಐದು ಸಿಕ್ಸರ್​ ಮತ್ತು ಆರು ಬೌಂಡರಿಗಳ ಸಮೇತ 65 ರನ್​ ಸಿಡಿಸಿ ತಂಡವನ್ನು ಸಂಕಷ್ಟದಿಂದ ಪಾರು ಮಾಡಿದರು.

ನಂತರ ಬಂದ ನಿಕೋಲಸ್ ಪೂರನ್ ಸ್ಫೋಟಕ ಆಟವಾಡಿದರು. ಕೇವಲ 15 ಬಾಲ್​ಗಳಲ್ಲೇ ಅರ್ಧಶತಕ ಬಾರಿಸಿದರು. ಈ ಮೂಲಕ ಐಪಿಎಲ್ ಇತಿಹಾಸದಲ್ಲಿ ಎರಡನೇ ವೇಗದ ಅರ್ಧಶತಕ ದಾಖಲಿಸಿದರು. ಅಲ್ಲದೇ, ಕೇವಲ 19 ಬಾಲ್​ಗಳಲ್ಲಿ ಏಳು ಸಿಕ್ಸರ್​ಗಳು ಮತ್ತು ನಾಲ್ಕು ಬೌಂಡರಿಗಳೊಂದಿಗೆ 62 ರನ್​ ಸಿಡಿಸಿ ಆರ್​ಸಿಬಿ ತಂಡದ ಗೆಲುವಿಗೆ ಕಂಟಕವಾದರು. ಇದರ ನಡುವೆ ಆಯುಷ್ ಬದೋನಿ 30 ರನ್​ ಬಾರಿಸಿ ಔಟಾದರು. ಕೊನೆಗೆ 9 ವಿಕೆಟ್ ಕಳೆದುಕೊಂಡು 213 ರನ್​ ಗಳಿಸಿ ಲಖನೌ ಗೆಲುವಿನ ನಗೆ ಬೀರಿತು.

ಇದಕ್ಕೂ ಮುನ್ನ ವಿರಾಟ್​ ಕೊಹ್ಲಿ, ಫಾಫ್​ ಡು ಪ್ಲೆಸಿಸ್​ ಮತ್ತು ಗ್ಲೆನ್​ ಮ್ಯಾಕ್ಸ್​ವೆಲ್​ ಅವರ ಭರ್ಜರಿ ಅರ್ಧಶತಕದ ಆಟದಿಂದ ಎರಡು ವಿಕೆಟ್​ ನಷ್ಟಕ್ಕೆ ಆರ್‌ಸಿಬಿ 212 ರನ್​ ಗಳಿಸಿತ್ತು. ವಿರಾಟ್​ ಕೊಹ್ಲಿ ಮತ್ತು ನಾಯಕ ಫಾಫ್​ ಡು ಪ್ಲೆಸಿಸ್​ 33 ಎಸೆತಗಳಿಗೆ 50 ರನ್‌ಗಳ​ ಜೊತೆಯಾಟ ನೀಡಿದರು. ಇಬ್ಬರೂ ಆಟಗಾರರು ಲಕ್ನೋ ಬೌಲರ್​ಗಳನ್ನು ಮನಬಂದಂತೆ ದಂಡಿಸಿದರು. ಪವರ್​ ಪ್ಲೇಯನ್ನು ಸಮರ್ಥವಾಗಿ ಬಳಸಿಕೊಂಡ ಕೊಹ್ಲಿ ಬಿರುಸಿನ ಆಟವಾಡಿದರು. 44 ಎಸೆತಗಳನ್ನು​ ಎದುರಿಸಿದ ಅವರು 4 ಬೌಂಡರಿ ಮತ್ತು 4 ಸಿಕ್ಸ್​ನಿಂದ 61 ರನ್​ ಸಂಪಾದಿಸಿದರು. ಈ ಮೂಲಕ ಐಪಿಎಲ್​ ವೃತ್ತಿಜೀವನದ 46ನೇ ಅರ್ಧಶತಕ ದಾಖಲಿಸಿದರು. ಅಮಿತ್​ ಮಿಶ್ರಾ ಸ್ಪಿನ್​ ಎಸೆತವನ್ನು ಸಿಕ್ಸರ್‌ಗಟ್ಟುವ ಬರದಲ್ಲಿ ಕ್ಯಾಚಿತ್ತು​ ಔಟಾದರು.

ಮ್ಯಾಕ್ಸ್​ವೆಲ್​ ನಾಯಕನ ಜೊತೆಗೂಡಿ ಮತ್ತೊಂದು ಬೆಸ್ಟ್​ ಇನ್ನಿಂಗ್ಸ್​ ಕಟ್ಟಿದರು. ಆಸೀಸ್ ದಾಂಡಿಗ ತಮ್ಮ ಹಳೆಯ ಬ್ಯಾಟಿಂಗ್​ ವೈಖರಿಯನ್ನು ಪ್ರದರ್ಶಿಸಿದರು. 29 ಬಾಲ್​ನಲ್ಲಿ 6 ಸಿಕ್ಸ್​ ಮತ್ತು 3 ಬೌಂಡರಿಯಿಂದ 59 ರನ್​ ಗಳಿಸಿ, ಇನ್ನಿಂಗ್ಸ್ ಮುಕ್ತಾಯಕ್ಕೆ ಒಂದು ಬಾಲ್ ಬಾಕಿ​ ಇದ್ದಾಗ ವಿಕೆಟ್​ ಒಪ್ಪಿಸಿದರು. ಇನ್ನೊಂದೆಡೆ ನಾಯಕ ಡು ಪ್ಲೆಸಿಸ್​ 46 ಬಾಲ್​ನಲ್ಲಿ 5 ಸಿಕ್ಸರ್​ ಮತ್ತು 5 ಬೌಂಡರಿಯಿಂದ 79 ರನ್​ ಗಳಿಸಿ ಅಜೇಯರಾಗುಳಿದರು. ಲಕ್ನೋ ಪರ ಮಾರ್ಕ್​ ವುಡ್​ ಮತ್ತು ಅಮಿತ್​ ಮಿಶ್ರಾ ತಲಾ ಒಂದೊಂದು ವಿಕೆಟ್​ ಪಡೆದರು.

ಇದನ್ನೂ ಓದಿ:RCB vs LSG: ಆರ್​ಸಿಬಿ ವಿರುದ್ಧ ಲಕ್ನೋ ಕಣಕ್ಕೆ, ತವರಲ್ಲಿ 2ನೇ ಜಯ ಕಾಣ್ತಾರಾ ಫಾಫ್​ ಹುಡುಗರು​