ನೋಡಿ: ವಯಸ್ಸಲ್ಲಿ ಹಿರಿಯನಾದ್ರೂ 'ಕ್ರಿಕೆಟ್‌ ದೇವರ' ಪಾದಮುಟ್ಟಿ ನಮಿಸಿದ ಶ್ರೇಷ್ಠ ಕ್ರಿಕೆಟಿಗ!

ದಕ್ಷಿಣ ಆಫ್ರಿಕಾದ ಪ್ರಸಿದ್ಧ ಕ್ರಿಕೆಟಿಗ ಜಾಂಟಿ ರೋಡ್ಸ್​, 'ಕ್ರಿಕೆಟ್​ ದೇವರು' ಸಚಿನ್​ ತೆಂಡೂಲ್ಕರ್​ ಕಾಲಿಗೆ ನಮಸ್ಕರಿಸಿದ್ದಾರೆ. ಐಪಿಎಲ್​ನಲ್ಲಿ ಮಾಜಿ ಕ್ರಿಕೆಟಿಗರಿಬ್ಬರ ಈ ಅಭಿಮಾನ ಹೃದಯಸ್ಪರ್ಶಿಯಾಗಿತ್ತು.

ಮುಂಬೈ:ಕ್ರಿಕೆಟ್​ ದೇವರೆಂದೇ ಹೆಸರಾದ ಸಚಿನ್​ ತೆಂಡೂಲ್ಕರ್​ ಜಗತ್ತಿನಾದ್ಯಂತ ಅಭಿಮಾನಿಗಳು ಹೊಂದಿದ್ದಾರೆ. ಅವರು ಕ್ರಿಕೆಟ್​ ಆಡುತ್ತಿದ್ದಾಗ ಮೈದಾನಕ್ಕೆ ನುಗ್ಗಿ ಬಂದು ಅಭಿಮಾನಿಗಳು ಅವರ ಕಾಲಿಗೆ ನಮಸ್ಕರಿಸಿದ್ದನ್ನು ನೋಡಿದ್ದೇವೆ. ಆದರೆ, ಐಪಿಎಲ್​ನ ಪಂಜಾಬ್​ ಮತ್ತು ಮುಂಬೈ ಇಂಡಿಯನ್ಸ್​ ನಡುವೆ ನಡೆದ ಪಂದ್ಯದಲ್ಲಿ ಖ್ಯಾತ ಮಾಜಿ ಕ್ರಿಕೆಟಿಗರೊಬ್ಬರು ಸಚಿನ್​ ಕಾಲು ಮುಟ್ಟಿ ನಮಸ್ಕರಿಸಿದ್ದಾರೆ.

ಹೌದು, ಜಗತ್ತಿನ ಅತ್ಯದ್ಭುತ ಫೀಲ್ಡರ್​, ಪ್ರಸ್ತುತ ಪಂಜಾಬ್​ ಕಿಂಗ್ಸ್​ ತಂಡದ ಫೀಲ್ಡಿಂಗ್​ ಕೋಚ್​ ಆಗಿರುವ ಜಾಂಟಿ ರೋಡ್ಸ್​(52) ಅವರೇ ಸಚಿನ್​(48) ಕಾಲಿಗೆ ಎರಗಿದವರು. ಪಂಜಾಬ್​- ಮುಂಬೈ ಮಧ್ಯೆ ನಡೆದ ಪಂದ್ಯದ ಬಳಿಕ ಆಟಗಾರರು ಪರಸ್ಪರ ಹಸ್ತಲಾಘವ ಮಾಡುತ್ತಿದ್ದಾಗ ಎದುರಾದ ಸಚಿನ್​ ಕಾಲಿಗೆ ಜಾಂಟಿ ರೋಡ್ಸ್​ ಎರಗಲು ಮುಂದಾಗಿದ್ದಾರೆ. ಈ ವೇಳೆ ಅವರ ಕೈ ಹಿಡಿದ ಸಚಿನ್​ ತಡೆಯಲು ಮುಂದಾದರು. ಆದರೂ ಜಾಂಟಿ ರೋಡ್ಸ್​ ಬಾಗಿ ಸಚಿನ್​ ಕಾಲು ಮುಟ್ಟಿದರು.

ಬಳಿಕ ಸಚಿನ್​, ಜಾಂಟಿ ರೋಡ್ಸ್​ ಅವರನ್ನು ತಬ್ಬಿಕೊಂಡು ಅಭಿನಂದಿಸಿದರು. ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಒಬ್ಬರು ರನ್​ ಶಿಖರ ಕಟ್ಟಿ ಕ್ರಿಕೆಟ್​ ದಂತಕತೆಯಾದರೆ, ಇನ್ನೊಬ್ಬರು ಜಗತ್ತಿನ ಅದ್ಭುತ ಫೀಲ್ಡರ್​ ಆಗಿ ಗುರುತಿಸಿಕೊಂಡ ಈ ಮಾಜಿ ಕ್ರಿಕೆಟಿಗರ ಅವಿನಾಭಾವ ಸಂಬಂಧವನ್ನು ಕಂಡು ಅಲ್ಲಿದ್ದ ಯುವ ಕ್ರಿಕೆಟಿಗರೇ ಅಚ್ಚರಿಗೊಳಗಾಗಿದ್ದಾರೆ.

ಇನ್ನು ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ಪಂಜಾಬ್​ ಕಿಂಗ್ಸ್​ ವಿರುದ್ಧ ಸೋಲು ಕಂಡಿದೆ. ಈ ಋತುವಿನ ಐಪಿಎಲ್​ನಲ್ಲಿ ಮುಂಬೈ ತಂಡ ತಾನಾಡಿದ ಐದೂ ಪಂದ್ಯಗಳಲ್ಲಿ ಸೋಲು ಕಂಡು ಪಟ್ಟಿಯಲ್ಲಿ ಕೊನೆಯ ಸ್ಥಾನದಲ್ಲಿದೆ.

ಇದನ್ನೂ ಓದಿ:ಸರಣಿ ಸೋಲುಗಳ ಬಳಿಕ ಇಂಗ್ಲೆಂಡ್ ಟೆಸ್ಟ್​ ನಾಯಕತ್ವದಿಂದ ಕೆಳಗಿಳಿದ ಜೋ ರೂಟ್