ಹೈದರಾಬಾದ್: ಭಾರತೀಯ ಪುರುಷರ ಕ್ರಿಕೆಟ್ ತಂಡದ ಹಾಲಿ ನಾಯಕ ವಿರಾಟ್ ಕೊಹ್ಲಿಗೆ ಇಂದು 31ನೇ ವರ್ಷಕ್ಕೆ ಕಾಲಿಟ್ಟಿದ್ದಾರೆ.
ವಿಶ್ವಶ್ರೇಷ್ಠ ನಾಯಕ ಎಂ.ಎಸ್.ಧೋನಿಯಿಂದ ತೆರವಾದ ನಾಯಕತ್ವ ಸ್ಥಾನಕ್ಕೆ ಬಂದ ವಿರಾಟ್ ಕೊಹ್ಲಿ ತಮ್ಮ ಆಕ್ರಮಣಕಾರಿ ಮನೋಭಾವದಿಂದ ತಂಡವನ್ನು ಗೆಲುವಿನ ಟ್ರ್ಯಾಕ್ನಲ್ಲಿ ಕೊಂಡೊಯ್ಯುತ್ತಿದ್ದಾರೆ.
U-19 ತಂಡದ ನಾಯಕನಾಗಿ ತಂಡವನ್ನು ಗೆಲ್ಲಿಸಿದ್ದ ಕೊಹ್ಲಿ ಅದೇ ಆಧಾರದಲ್ಲಿ ರಾಷ್ಟ್ರೀಯ ತಂಡದ ಕದತಟ್ಟಿದ್ದರು. 2008ರಲ್ಲಿ ರಾಷ್ಟ್ರೀಯ ತಂಡಕ್ಕೆ ಕಾಲಿಟ್ಟ ಕೊಹ್ಲಿ ಅಲ್ಲಿಂದ ನಂತರ ದಾಖಲೆ ಮೇಲೆ ದಾಖಲೆ ಬರೆಯುತ್ತಾ ಅಸಾಧ್ಯ ಎಂದೇ ಭಾವಿಸಿದ್ದ ಅದೆಷ್ಟೋ ದಾಖಲೆಯನ್ನು ಪುಡಿಗಟ್ಟಿದ್ದಾರೆ.
ಹಿರಿಯ ಆಟಗಾರ ಧೋನಿ ಜೊತೆ ಕೊಹ್ಲಿ
2008 ಆಗಸ್ಟ್ನಲ್ಲಿ ಭಾರತ ತಂಡ ಶ್ರೀಲಂಕಾ ಪ್ರವಾಸ ಕೈಗೊಂಡಿತ್ತು. ಈ ವೇಳೆ ತಂಡ ಸೇರಿದ್ದ ಕೊಹ್ಲಿ ದೊಡ್ಡ ಜವಾಬ್ದಾರಿಯೇ ಬಂದೊದಗಿತ್ತು. ಪ್ರವಾಸದ ಆರಂಭದಲ್ಲೇ ಆರಂಭಿಕ ಆಟಗಾರರಾದ ಸಚಿನ್ ತೆಂಡೂಲ್ಕರ್ ಹಾಗೂ ವೀರೇಂದ್ರ ಸೆಹ್ವಾಗ್ ಗಾಯಗೊಂಡಿದ್ದರು. ಹೀಗಾಗಿ ಕೊಹ್ಲಿ ಇನ್ನಿಂಗ್ಸ್ ಆರಂಭಿಸುವ ಹೊಣೆ ಹೆಗಲೇರಿತ್ತು. ಪ್ರಥಮ ಪಂದ್ಯದಲ್ಲಿ ಕೊಹ್ಲಿ 12 ರನ್ನಿಗೆ ನಿರ್ಗಮಿದ್ದರು. ಇದೇ ಸರಣಿಯಲ್ಲಿ ಕೊಹ್ಲಿ 54 ರನ್ ಗಳಿಸಿ ಮೊದಲ ಅರ್ಧಶತಕ ಬಾರಿಸಿದ್ದರು.
2009ರ ಡಿಸೆಂಬರ್ನಲ್ಲಿ ಭಾರತ ಪ್ರವಾಸ ಕೈಗೊಂಡಿದ್ದ ಶ್ರೀಲಂಕಾ ವಿರುದ್ಧ ವಿರಾಟ್ ಕೊಹ್ಲಿ ಚೊಚ್ಚಲ ಶತಕ(107) ಬಾರಿಸಿದ್ದರು. ಆ ಪಂದ್ಯದಲ್ಲಿ ಕೊಹ್ಲಿ ಹೊರತಾಗಿ ಗೌತಮ್ ಗಂಭೀರ್ 150 ರನ್ ಗಳಿಸಿದ್ದರು. ಗೌತಿಯ ಈ ಆಟಕ್ಕೆ ಪಂದ್ಯಶ್ರೇಷ್ಠ ಪ್ರಶಸ್ತಿ ಒಲಿದು ಬಂದಿತ್ತು. ಆದರೆ ಆ ಪ್ರಶಸ್ತಿಯನ್ನು ಗಂಭೀರ್, ಚೊಚ್ಚಲ ಶತಕ ಬಾರಿಸಿದ ಕೊಹ್ಲಿ ಅವರಿಗೆ ನೀಡಿ ಎಲ್ಲರ ಮೆಚ್ಚುಗೆಗೆ ಪಾತ್ರರಾಗಿದ್ದರು.
ಕೊಹ್ಲಿ ಈವರೆಗೆ 393 ಪಂದ್ಯಗಳನ್ನಾಡಿದ್ದು, 21036 ರನ್ ಕಲೆಹಾಕಿದ್ದಾರೆ. 82 ಟೆಸ್ಟ್ ಪಂದ್ಯಗಳಲ್ಲಿ 7,066 ರನ್ ಹಾಗೂ 239 ಏಕದಿನ ಪಂದ್ಯದಲ್ಲಿ 11,520 ಹಾಗೂ 72 ಟಿ-20 ಪಂದ್ಯದಲ್ಲಿ ಕೊಹ್ಲಿ 2450 ರನ್ ಗಳಿಸಿದ್ದಾರೆ.
ಟೆಸ್ಟ್ ಕ್ರಿಕೆಟ್ನಲ್ಲಿ ಕೊಹ್ಲಿ 26 ಶತಕ ಬಾರಿಸಿದ್ದರೆ, ಏಕದಿನದಲ್ಲಿ ಈ ಸಂಖ್ಯೆ 43. ಏಕದಿನ ಶ್ರೇಯಾಂಕದಲ್ಲಿ ಅಗ್ರಸ್ಥಾನ, ಟೆಸ್ಟ್ 2ನೇ ಸ್ಥಾನ ಹಾಗೂ ಟಿ-20ಯಲ್ಲಿ 10ನೇ ಸ್ಥಾನದಲ್ಲಿದ್ದಾರೆ. ಐಪಿಎಲ್ನಲ್ಲಿ ರಾಯಲ್ ಚಾಲೆಂಜರ್ಸ್ ತಂಡವನ್ನು ಮುನ್ನಡೆಸುವ ಕೊಹ್ಲಿ ಬ್ಯಾಟಿಂಗ್ನಲ್ಲಿ ಅದ್ಭುತವಾಗಿದ್ದರೂ ನಾಯಕತ್ವದಲ್ಲಿ ಪರಿಣಾಮ ಬೀರಿಲ್ಲ.
ಕ್ರಿಕೆಟ್ ದೇವರು ಎಂದೇ ಕರೆಯಲ್ಪಡುವ ಸಚಿನ್ ತೆಂಡೂಲ್ಕರ್ ಜೊತೆಗೆ ಕೊಹ್ಲಿಯನ್ನು ಹೋಲಿಕೆ ಮಾಡುತ್ತಿದ್ದರೂ ಕೆಲ ವಿಚಾರಗಳಲ್ಲಿ ಈ ಇಬ್ಬರೂ ಆಟಗಾರರಿಗೆ ಭಿನ್ನತೆ ಇದೆ. ಸಚಿನ್ಗಿಂತ ವೇಗವಾಗಿ ರನ್ ಕಲೆಹಾಕುತ್ತಿದ್ದರೂ ಕೊಹ್ಲಿ ಮೈದಾನದಲ್ಲಿ ಆಕ್ರಮಣಕಾರಿ ಮನೋಭಾವನೆಯನ್ನು ಪ್ರದರ್ಶಿಸುತ್ತಾರೆ. ಇದೇ ವಿಚಾರ ಸಾಕಷ್ಟು ಬಾರಿ ಚರ್ಚೆಗೂ ಕಾರಣವಾಗಿದೆ.
2017ರಲ್ಲಿ ಬಾಲಿವುಡ್ ನಟಿ ಅನುಷ್ಕಾ ಶರ್ಮಾರನ್ನು ಇಟಲಿಯಲ್ಲಿ ವಿವಾಹವಾಗಿದ್ದಾರೆ. ಈ ಇಬ್ಬರೂ ಸದ್ಯ ಸುಖ ದಾಂಪತ್ಯ ನಡೆಸುತ್ತಿದ್ದಾರೆ.
ವಿರಾಟ್ ಕೊಹ್ಲಿ ಪ್ರಮುಖ ದಾಖಲೆಗಳು:
- ಹತ್ತು ವರ್ಷದಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ 20,000 ರನ್ ಗಳಿಕೆ
- ವೇಗವಾಗಿ ಏಕದಿನದಲ್ಲಿ 10,000 ರನ್ ಗಳಿಕೆ(205 ಇನ್ನಿಂಗ್ಸ್)
- ಕ್ಯಾಲೆಂಡರ್ ವರ್ಷದಲ್ಲಿ ವೇಗವಾಗಿ 1000 ರನ್ ಗಳಿಕೆ(11 ಇನ್ನಿಂಗ್ಸ್)
- ಒಂದೇ ವರ್ಷದಲ್ಲಿ ಐಸಿಸಿಯ ಎರಡು ಪ್ರಶಸ್ತಿಗೆ ಭಾಜನ (ಸರ್ ಗಾರ್ಫೀಲ್ಡ್ ಸೋಬರ್ಸ್ ಟ್ರೋಫಿ, ವರ್ಷದ ಏಕದಿನ ಮತ್ತು ಟೆಸ್ಟ್ ಆಟಗಾರ)
- ಎರಡು ಎದುರಾಳಿ ತಂಡದ ವಿರುದ್ಧ ಮೂರು ಸತತ ಶತಕ ಬಾರಿಸಿದ ಭಾರತದ ನಾಯಕ(ಶ್ರೀಲಂಕಾ ವಿರುದ್ಧ 133*,108,106) (ವೆಸ್ಟ್ ಇಂಡೀಸ್ 140,157*,107)
- ಕ್ಯಾಲೆಂಡರ್ ವರ್ಷದಲ್ಲಿ ಅತೀ ಹೆಚ್ಚು ರನ್ ಗಳಿಸಿದ ನಾಯಕ.(2017ರಲ್ಲಿ 1460 ರನ್)
- ವಿಶ್ವಕಪ್ನಲ್ಲಿ ಸತತ ಐದು ಅರ್ಧಶತಕ ಸಿಡಿಸಿದ ಮೊದಲ ನಾಯಕ(2019ರಲ್ಲಿ 82,77,67,72)
- ಸತತ ಮೂರು ಕ್ಯಾಲೆಂಡರ್ ವರ್ಷದಲ್ಲಿ ಸಹಸ್ರ ರನ್ ಗಳಿಸಿದ ಮೊದಲ ಟೆಸ್ಟ್ ನಾಯಕ ಹಾಗೂ ಮೊದಲ ಭಾರತೀಯ ಆಟಗಾರ(2016ರಲ್ಲಿ 1215, 2017ರಲ್ಲಿ 1059 ಹಾಗೂ 2018ರಲ್ಲಿ 1322 ರನ್)
- ಟೆಸ್ಟ್ ನಾಯಕನಾಗಿ ಅತೀ ಹೆಚ್ಚು ದ್ವಿಶತಕದ ಗಳಿಕೆ
- ಐಪಿಎಲ್ ಆವೃತ್ತಿಯೊಂದರಲ್ಲಿ ಅತೀ ಹೆಚ್ಚು ಗಳಿಕೆ(2016ರಲ್ಲಿ 973)
- ನಾಯಕನಾಗಿ 3000 ಏಕದಿನ ರನ್ ಗಳಿಸಿದ ಮೊದಲ ನಾಯಕ(49 ಇನ್ನಿಂಗ್ಸ್)
- ಕ್ಯಾಲೆಂಡರ್ ವರ್ಷದಲ್ಲಿ ಅತೀ ಹೆಚ್ಚು ಶತಕ ದಾಖಲು(2017ರಲ್ಲಿ 11ಶತಕ)
- ವೇಗವಾಗಿ 4000 ಟೆಸ್ಟ್ ರನ್ ಗಳಿಸಿದ ಮೊದಲ ಆಟಗಾರ(65 ಇನ್ನಿಂಗ್ಸ್)
- ವೇಗವಾಗಿ 30(186 ಇನ್ನಿಂಗ್ಸ್) ಹಾಗೂ 35(267 ಇನ್ನಿಂಗ್ಸ್) ಏಕದಿನ ಶತಕ ದಾಖಲು
- ಮೂರು ಏಕದಿನ ಪಂದ್ಯದಲ್ಲಿ ಸರಣಿಯಲ್ಲಿ ಮೂರು ಶತಕ ದಾಖಲಿಸಿದ ಮೊದಲ ನಾಯಕ ಹಾಗೂ ಮೊದಲ ಭಾರತೀಯ ಆಟಗಾರ
- 350ಕ್ಕೂ ಅಧಿಕ ರನ್ ಚೇಸಿಂಗ್ ವೇಳೆ ಮೂರು ಬಾರಿಯೂ ಶತಕ ದಾಖಲು
- ಚೊಚ್ಚಲ ವಿಶ್ವಕಪ್ ಪಂದ್ಯದಲ್ಲಿ ಶತಕ ದಾಖಲಿಸಿದ ಮೊದಲ ಭಾರತೀಯ(2011ರಲ್ಲಿ ಬಾಂಗ್ಲಾದೇಶ ವಿರುದ್ಧ)
- ಪಾಕ್ ವಿರುದ್ಧ ವಿಶ್ವಕಪ್ನಲ್ಲಿ ಶತಕ ದಾಖಲಿಸಿದ ಮೊದಲ ಭಾರತೀಯ(2015ರಲ್ಲಿ 107 ರನ್)
- ಐಪಿಎಲ್ ಆವೃತ್ತಿಯೊಂದರಲ್ಲಿ ಅತೀಹೆಚ್ಚು ಶತಕ ಸಿಡಿಸಿದ್ದ ಮೊದಲ ಆಟಗಾರ(2016ರಲ್ಲಿ 4 ಶತಕ)
