ದಕ್ಷಿಣ ಆಫ್ರಿಕಾ ವಿರುದ್ಧ ಇನ್ನಿಂಗ್ಸ್​ ಹಾಗೂ 137 ರನ್​ಗಳ ಜಯ... ಭಾರತಕ್ಕೆ ಸರಣಿ ಜಯ

ಮೊದಲ ಇನ್ನಿಂಗ್ಸ್​ನಲ್ಲಿ 275 ರನ್​ಗಳಿಗೆ ಆಲೌಟ್​ ಆಗುವ ಮೂಲಕ  326 ರನ್​ಗಳ ಇನ್ನಿಂಗ್ಸ್​ ಹಿನ್ನಡೆ ಅನುಭವಿಸಿ ಫಾಲೋಅನ್​ಗೆ ತುತ್ತಾಗಿದ್ದ ದಕ್ಷಿಣ ಆಫ್ರಿಕಾ ತಂಡ 2ನೇ ಇನ್ನಿಂಗ್ಸ್​ನಲ್ಲಿ 189 ರನ್​ಗಳಿಗೆ ಆಲೌಟ್​ ಆಗುವ ಮೂಲಕ ಇನ್ನಿಂಗ್ಸ್​ ಹಾಗೂ 137 ರನ್​ಗಳ ಹೀನಾಯ ಸೋಲನುಭವಿಸಿದೆ.

ಪುಣೆ: ದಕ್ಷಿಣ ಆಫ್ರಿಕಾ ವಿರುದ್ಧ ಎರಡನೇ ಟೆಸ್ಟ್​ನಲ್ಲಿ ಭಾರತ ತಂಡ ಇನ್ನಿಂಗ್ಸ್​ ಹಾಗೂ 137 ರನ್​ಗಳಿಂದ ಜಯ ಸಾಧಿಸು ಮೂಲಕ ಸರಣಿಯನ್ನು 2-0ಯಲ್ಲಿ ವಶಪಡಿಸಿಕೊಂಡಿದೆ.

ಮೊದಲ ಇನ್ನಿಂಗ್ಸ್​ನಲ್ಲಿ 275 ರನ್​ಗಳಿಗೆ ಆಲೌಟ್​ ಆಗುವ ಮೂಲಕ 326 ರನ್​ಗಳ ಇನ್ನಿಂಗ್ಸ್​ ಹಿನ್ನಡೆ ಅನುಭವಿಸಿ ಫಾಲೋಅನ್​ಗೆ ತುತ್ತಾಗಿದ್ದ ದಕ್ಷಿಣ ಆಫ್ರಿಕಾ ತಂಡ ನಾಲ್ಕನೇ ದಿನದಾಟದಲ್ಲಿ 189 ರನ್​ಗಳಿಗೆ ಆಲೌಟ್​ ಆಗುವ ಮೂಲಕ ಇನ್ನಿಂಗ್ಸ್​ ಹಾಗೂ 137 ರನ್​ಗಳ ಸೋಲನುಭವಿಸಿತು.

ಆರಂಭಿಕರಾದ ಮಾರ್ಕ್ರಮ್​ ಮೊದಲ ಓವರ್​ನಲ್ಲಿ ಎಲ್​ಬಿ ಬಲೆಗೆ ಬಿದ್ದರೆ, ನಂತರ ಬಂದ ಥ್ಯೂನಿಸ್ ಡಿ ಬ್ರೂಯ್ನ್ (8) ಉಮೇಶ್​ ಯಾದವ್​ ಬೌಲಿಂಗ್​ನಲ್ಲಿ ಸಹಾ ಹಿಡಿದ ಅದ್ಭುತ ಕ್ಯಾಚ್​ಗೆ ಬಲಿಯಾದರು. ಇವರ ಬೆನ್ನಲ್ಲೇ ನಾಯಕ ಪ್ಲೆಸಿಸ್​(5) ಹಾಗೂ 48 ರನ್​ಗಳಿಸಿ ಉತ್ತಮವಾಗಿ ಆಡುತ್ತಿದ್ದ ಡೀನ್ ಎಲ್ಗರ್​ ಅಶ್ವಿನ್​ ಬೌಲಿಂಗ್​ನಲ್ಲಿ ಔಟಾದರು.

ಭೋಜನ ವಿರಾಮದ ವೇಳೆಗೆ 74 ರನ್​ಗೆ 4 ವಿಕೆಟ್​ ಕಳೆದುಕೊಂಡಿದ ಆಫ್ರಿಕಾ ತಂಡ ವಿರಾಮದ ನಂತರ ಡಿಕಾಕ್​(5) ಬವುಮಾ(38)ರನ್ನು ಜಡೇಜಾ ಪೆವಿಲಿಯನ್​ಗಟ್ಟಿದ್ದರು. ನಂತರ ಬಂದ ಮುತ್ತುಸ್ವಾಮಿಯನ್ನು (9) ಶಮಿ ಬೌಲಿಂಗ್​ನಲ್ಲಿ ರೋಹಿತ್​ ಕ್ಯಾಚ್​ ನೀಡಿ ಔಟಾದರು.

ಮತ್ತೆ ಕಾಡಿದ ಫಿಲಾಂಡರ್​-ಮಹಾರಾಜ

ಮೊದಲ ಇನ್ನಿಂಗ್ಸ್​ನಲ್ಲಿ 42 ಓವರ್​ಗಳ ಕಾಳ ಭಾರತೀಯರನ್ನು ಕಾಡಿದ್ದ ಈ ಜೋಡಿ ಎರಡನೇ ಇನ್ನಿಂಗ್ಸ್​ನಲ್ಲೂ 22 ಓವರ್​ಗಳ ಜೊತೆಯಾಟ ನಡೆಸಿ ಭಾರತದ ಗೆಲುವನ್ನು ಸ್ವಲ ಸಮಯ ಮುಂದೂಡಿದರು.

ಆದರೆ 67 ನೇ ಓವರ್​ನಲ್ಲಿ ಕಣಕ್ಕಿಳಿದ ಉಮೇಶ್​ ಯಾದವ್​ 37 ರನ್​ಗಳಿಸಿದ್ದ ವೆರ್ನಾನ್​ ಫಿಲಾಂಡರ್​ ಹಾಗೂ ಇವರ ನಂತರ ಬಂದ ರಬಡಾ(4)ರನ್ನು ಒಂದೇ ಓವರ್​ನಲ್ಲಿ ಔಟ್​ ಮಾಡಿದರು. ನಂತರದ ಓವರ್​ನಲ್ಲೇ 22 ರನ್​ಗಳಿಸಿದ್ದ ಮಹಾರಾಜರನ್ನು ಜಡೇಜಾ ಎಲ್​ಬಿ ಬಲೆಗೆ ಬೀಳಿಸಿ ಹರಿಣಗಳ ಎರಡನೇ ಇನ್ನಿಂಗ್ಸ್​ಗೆ ತೆರೆ ಎಳೆದರು.

ಭಾರತದ ಪರ ಉಮೇಶ ಯಾದವ್​ 3, ಜಡೇಜಾ 3, ಅಶ್ವಿನ್​ 2, ಶಮಿ ಹಾಗೂ ಇಶಾಂತ್​ ಶರ್ಮಾ ತಲಾ ಒಂದು ವಿಕೆಟ್​ ಪಡೆದು ಮಿಂಚಿದರು.

ಈ ಪಂದ್ಯದ ಗೆಲುವಿನೊಂದಿಗೆ ಭಾರತ ತಂಡ 3 ಪಂದ್ಯಗಳ ಸರಣಿಯನ್ನು ಇನ್ನು ಒಂದು ಪಂದ್ಯ ಇರುವಂತೆಯೇ 2-0 ಯಲ್ಲಿ ಸರಣಿ ವಶಪಡಿಸಿಕೊಂಡಿತು. ಆಕರ್ಷಕ ದ್ವಿಶತಕ ಸಿಡಿಸಿದ್ದ ನಾಯಕ ಕೊಹ್ಲಿ ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು.