ಅಬುಧಾಬಿ:ರಾಯಲ್ಸ್ ಚಾಲೆಂಜರ್ಸ್ ಬೆಂಗಳೂರು ತಂಡದ ವಿರುದ್ಧ ಅಬುಧಾಬಿಯಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಸಂಜು ಸಾಮ್ಸನ್ ಕೇವಲ 4 ರನ್ಗಳಿಸಿ ಔಟಾಗಿದ್ದಾರೆ. ಆದರೆ ಅವರು ಔಟಾದ ರೀತಿ ವಿವಾದಕ್ಕೆ ಎಡೆಮಾಡಿಕೊಟ್ಟಿದೆ.
ಚಹಾಲ್ ಎಸೆದ 5 ನೇ ಓವರ್ನ ಮೊದಲ ಎಸೆತದಲ್ಲಿ ಸಂಜು ಸಾಮ್ಸನ್ ಡಿಫೆನ್ಸ್ ಮಾಡಿದರು. ಚೆಂಡು ನೇರವಾಗಿ ಚಹಾಲ್ ಕೈಸೇರಿತು. ಆದರೆ, ಚಹಾಲ್ ಕ್ಯಾಚ್ ಹಿಡಿಯುವ ಸಂದರ್ಭದಲ್ಲಿ ಚೆಂಡು ನೆಲಕ್ಕೆ ತಾಗಿದಂತೆ ಕಾಣುತ್ತಿತ್ತು. ಎರಡು ಮೂರು ಬಾರಿ ರಿಪ್ಲೇ ನೋಡಿದ ಮೂರನೇ ಅಂಪೈರ್ ಕೂಡ ಸ್ಪಷ್ಟವಾಗಿ ತೀರ್ಪು ನೀಡಲಾಗದೇ ಮೈದಾನದ ಅಂಪೈರ್ ತೀರ್ಮಾನವನ್ನೇ ಎತ್ತಿ ಹಿಡಿದರು.
ಆದರೆ, ಚೆಂಡು ನೆಲಕ್ಕೆ ತಾಗಿರುವುದು ಸ್ಪಷ್ಟವಾಗಿದೆ. ಕ್ರಿಕೆಟ್ ನಿಯಮಗಳ ಪ್ರಕಾರ ಅಸ್ಪಷ್ಟವಾದರೆ ಅದರ ಲಾಭವನ್ನು ಬ್ಯಾಟ್ಸ್ಮನ್ಗೆ ನೀಡಬೇಕು. ಆದರೆ, ಇಲ್ಲಿ ಸಾಮ್ಸನ್ಗೆ ಅನ್ಯಾಯವಾಗಿದೆ ಎಂದು ಅಂಪೈರ್ ವಿರುದ್ಧ ಅಭಿಮಾನಿಗಳು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.
ಆರ್ಸಿಬಿ ಬೆಂಬಲಿಗರು ಚೆಂಡು ಚಹಾಲ್ ಹಿಡಿದ ಕ್ಯಾಚ್ನಲ್ಲಿ ಯಾವುದೇ ಲೋಪವಿಲ್ಲ ಎಂದು ಟ್ವೀಟ್ ಮಾಡುತ್ತಿದ್ದಾರೆ. ಕುತೂಹಲ ಕೆರಳಿಸಿರುವ ಪಂದ್ಯದಲ್ಲಿ ಸಂಜು ಸಾಮ್ಸನ್ ಕಡಿಮೆ ಮೊತ್ತಕ್ಕೆ ಔಟಾಗಿರುವುದು ಅಭಿಮಾನಿಗಳಿಗೆ ಬೇಸರ ತಂದಿದೆ.
ಸಾಮ್ಸನ್ ಮೊದಲ ಪಂದ್ಯದಲ್ಲಿ 74, ಎರಡನೇ ಪಂದ್ಯದಲ್ಲಿ 85 ರನ್ಗಳಿಸಿದ್ದರೆ, 3 ಮತ್ತು 4 ನೇ ಪಂದ್ಯದಲ್ಲಿ 8 ಮತ್ತು 4 ರನ್ಗಳಿಗೆ ಔಟಾಗಿದ್ದಾರೆ.
