ಹೈದರಾಬಾದ್: ಡೆಲ್ಲಿ ಕ್ಯಾಪಿಟಲ್ ವಿರುದ್ಧದ ಪಂದ್ಯದಲ್ಲಿ ಕೊನೆಯ ಓವರ್ಗಳಲ್ಲಿ ಅದ್ಭುತ ಯಾರ್ಕರ್ ಎಸೆತಗಳನ್ನೆಸದು ಹೈದರಾಬಾದ್ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದ ಎಸ್ಆರ್ಹೆಚ್ ತಂಡದ ಟಿ ನಟರಾಜನ್ ಬಗ್ಗೆ ಭಾರತದ ಮಾಜಿ ಕ್ರಿಕೆಟಿಗ ವಿರೇಂದ್ರ ಸೆಹ್ವಾಗ್ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ದುಬೈನ ಶೇಕ್ ಜಾಯೇದ್ ಸ್ಟೇಡಿಯಂನಲ್ಲಿ ಮಂಗಳವಾರ ಡೆಲ್ಲಿ ಕ್ಯಾಪಿಟಲ್ ವಿರುದ್ಧ ಸನ್ರೈಸರ್ಸ್ ಹೈದರಾಬಾದ್ ತಂಡ 15 ರನ್ಗಳ ಜಯ ಸಾಧಿಸಿತ್ತು. ರಶೀದ್ ಖಾನ್, ಭುವನೇಶ್ವರ್ ಕುಮಾರ್ ಹಾಗೂ ನಟರಾಜನ್ ಅವರು ಅದ್ಭುತ ಬೌಲಿಂಗ್ ಪ್ರದರ್ಶನದಿಂದ ಟೂರ್ನಿಯಲ್ಲಿ ಎಸ್ಆರ್ಹೆಚ್ ಮೊದಲ ಗೆಲುವು ಪಡೆದಿತ್ತು.
14ನೇ ಓವರ್ ಬೌಲಿಂಗ್ ಮಾಡಿದ್ದ ನಟರಾಜನ್ 5 ಯಾರ್ಕರ್ ಪ್ರಯೋಗಿಸುವ ಮೂಲಕ ಎದುರಾಳಿ ತಂಡ ದೊಡ್ಡ ಹೊಡೆತ ಬಾರಿಸದಂತೆ ತಡೆಯುವಲ್ಲಿ ಯಶಸ್ವಿಯಾಗಿದ್ದರು. ಅಲ್ಲದೇ 18 ನೇ ಓವರ್ನಲ್ಲೂ ಉತ್ತಮವಾಗಿ ಬೌಲಿಂಗ್ ಮಾಡಿ ಸ್ಟೋಯ್ನಿಸ್ ವಿಕೆಟ್ ಪಡೆದಿದರು. ನಟರಾಜನ್ ಬೌಲಿಂಗ್ ಕೌಶಲ್ಯಕ್ಕೆ ಸೆಹ್ವಾಗ್ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
" ನಟರಾಜನ್ ಅವರ ಬೌಲಿಂಗ್ ನೋಡಿ ತುಂಬಾ ಸಂತೋಷವಾಗಿದೆ. ಡೆತ್ ಓವರ್ಗಳಲ್ಲಿ ಅತ್ಯುತ್ತಮ ಯಾರ್ಕರ್ಗಳನ್ನು ಪ್ರಯೋಗಿಸಿದ್ದಾರೆ. ರಶೀದ್ ಕೂಡ ಅದ್ಭುತ ಪ್ರದರ್ಶನ ತೋರಿದರು. ಈಗ ಎಲ್ಲ ತಂಡಗಳು ಗೆಲುವಿನ ಹಾದಿಯನ್ನು ಹಿಡಿದಿರುವುದು ಅದ್ಭುತವಾಗಿದೆ. ವಿನೋದ ಹೀಗೆ ಮುಂದುವರಿಯಲಿದೆ. ಓಂ ತೆವಾಟಿಯಾ ನಮಾಹ್" ಎಂದು ಸೆಹ್ವಾಗ್ ಟ್ವೀಟ್ ಮಾಡಿದ್ದಾರೆ.
ತಮಿಳುನಾಡಿನ ಸಣ್ಣ ಹಳ್ಳಿಯಿಂದ ಬಂದಿರುವ ನಟರಾಜನ್ ದಿನಗೂಲಿ ನೌಕರನ ಮಗನಾಗಿದ್ದಾರೆ. ಕಠಿಣ ಪರಿಶ್ರಮಿಯಾಗಿರುವ ನಟರಾಜನ್ ತಮಿಳುನಾಡು ಪ್ರೀಮಿಯರ್ ಲೀಗ್ನಲ್ಲಿ ಅತ್ಯುತ್ತಮ ಪ್ರದರ್ಶನ ತೋರಿದ ನಂತರ ತಮಿಳುನಾಡು ತಂಡದಲ್ಲಿ ಅವಕಾಶ ಪಡೆದಿದ್ದರು. ನಂತರ 2017ರ ಐಪಿಎಲ್ ಹರಾಜಿನಲ್ಲಿ ಬರೋಬ್ಬರಿ 3 ಕೋಟಿನ ರೂ.ಗೆ ಕಿಂಗ್ಸ್ ಇಲೆವೆನ್ ಪಂಜಾಬ್ ಖರೀದಿಸಿತ್ತು. ಆದರೆ, ಉತ್ತಮ ಪ್ರದರ್ಶನ ತೋರಲು ವಿಫಲರಾದರು. ನಂತರ 2018ರ ಹರಾಜಿನಲ್ಲಿ 40 ಲಕ್ಷಕ್ಕೆ ಸನ್ರೈಸರ್ಸ್ ಹೈದರಾಬಾದ್ ತಂಡ ಖರೀದಿಸಿತು. ಇದೀಗ ಮತ್ತಯ್ಯ ಮುರಳೀದರನ್ ಗರಡಿಯಲ್ಲಿ ಪಳಗುತ್ತಿರುವ ನಟರಾಜನ್ ದಿನದಿಂದ ದಿನಕ್ಕೆ ಚರ್ಚೆಗೆ ಬರುತ್ತಿದ್ದಾರೆ.