ನವದೆಹಲಿ :ಯಾವುದೇ ತಂಡ ಲೆಗ್-ಬಿಫೋರ್ ವಿಕೆಟ್ (ಎಲ್ಬಿಡಬ್ಲ್ಯೂ) ನಿರ್ಧಾರಕ್ಕೆ ಸಂಬಂಧಿಸಿದಂತೆ ರಿವಿವ್ಯೂ ತೆಗೆದುಕೊಂಡಾಗ ಅಂಪೈರ್ ಕಾಲ್ ಕರೆಯನ್ನು ದೂರವಿಡಬೇಕು ಎಂದು ಭಾರತ ತಂಡದ ಹಿರಿಯ ಸ್ಪಿನ್ನರ್ ಹರ್ಭಜನ್ ಸಿಂಗ್ ಒತ್ತಾಯಿಸಿದ್ದಾರೆ.
ಇತ್ತೀಚೆಗೆ ಭಾರತದ ಬ್ಯಾಟಿಂಗ್ ದಿಗ್ಗಜ ಸಚಿನ್ ತೆಂಡೂಲ್ಕರ್, ಲಾರಾ ಅವರೊಂದಗಿನ ಆನ್ಲೈನ್ ಸಂವಾದದ ವೇಳೆ ಡಿಆರ್ಎಸ್ ನಿಯಮದ ಕುರಿತು, ಎಲ್ಬಿಡಬ್ಲ್ಯೂ ಕರೆಗೆ ರಿವ್ಯೂವ್ ತಗೆದುಕೊಂಡ ವೇಳೆ, ಚೆಂಡು ಸ್ಟಂಪ್ಗೆ ಎಷ್ಟು ಪ್ರಮಾಣದಲ್ಲಿ ತಾಗಿದೆ ಎನ್ನುವುದನ್ನು ಪರಿಗಣಿಸದೆ, ಸ್ಟಂಪ್ಗೆ ಚೆಂಡು ಟಚ್ ಆಗಿದ್ದರೆ ಅಂಪೈರ್ ತೀರ್ಮಾನ ಏನೇ ಆಗಿದ್ದರೂ ಬ್ಯಾಟ್ಸ್ಮನ್ ಔಟ್ಎಂದು ತೀರ್ಪು ನೀಡಬೇಕು. ಇದು ತಂತ್ರಜ್ಞಾನವನ್ನು ಉಪಯೋಗದ ಉದ್ದೇಶವಾಗಿದೆ. ತಂತ್ರಜ್ಞಾನವೂ ಶೇ.100ರಷ್ಟು ಸರಿಯಲ್ಲ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದರು.
ಇದಕ್ಕೆ ಹರ್ಭಜನ್ ಸಿಂಗ್ ಕೂಡ ಧ್ವನಿಗೂಡಿಸಿದ್ದು, 'ನಿಮ್ಮ ಅಭಿಪ್ರಾಯ 1000 ಪರ್ಸೆಂಟ್ ಸರಿಯಿದೆ. ಚೆಂಡು ಸ್ಟಂಪ್ಗೆ ತಾಗಲಿ ಅಥವಾ ಮುತ್ತು ನೀಡಿರಲಿ, ಅದು ಔಟ್ ಎಂದು ತೀರ್ಮಾನಿಸಬೇಕು. ಯಾವ ಭಾಗಕ್ಕೆ ಚೆಂಡು ತಾಗಿದೆ ಎನ್ನುವುದು ಮುಖ್ಯವಲ್ಲ. ಆಟ ಉತ್ತಮಗೊಳ್ಳಬೇಕಾದರೆ ಕೆಲವು ನಿಯಮಗಳು ಬದಲಾಗಬೇಕು. ಅದರಲ್ಲಿ ಇದು ಒಂದು' ಎಂದು ಭಜ್ಜಿ ಹೇಳಿದ್ದಾರೆ.
ಇದಕ್ಕೂ ಮುನ್ನ ಟ್ವೀಟ್ ಜೊತೆ ವಿಡಿಯೋವೊಂದನ್ನು ಶೇರ್ ಮಾಡಿದ್ದ ಸಚಿನ್ " ಚೆಂಡು ಸ್ಟಂಪ್ಗೆ ಯಾವುದೇ ಆ್ಯಂಗಲ್ನಲ್ಲಿ ಬಡಿದ್ರೂ ಅದನ್ನು ಔಟ್ ಎಂದು ಘೋಷಿಸುವ ಮೂಲಕ, ಬೌಲರ್ ಪರ ತೀರ್ಪು ನೀಡಬೇಕು. ಅಂಪೈರ್ ಎಲ್ಬಿಡಬ್ಲ್ಯೂ ವಿಷಯದಲ್ಲಿ ನಾಟೌಟ್ ಎಂದು ತೀರ್ಪು ನೀಡಿದ್ದ ಸಂದರ್ಭದಲ್ಲಿ ಫೀಲ್ಡ್ ಟೀಂ ರಿವ್ಯೂವ್ ತೆಗೆದುಕೊಂಡಾಗ, ರೀಪ್ಲೇನಲ್ಲಿ ಚೆಂಡು 50%ಕ್ಕಿಂತ ಹೆಚ್ಚುಭಾಗ ಸ್ಟಂಪ್ಗೆ ತಾಗಿದ್ದರೆ ಮಾತ್ರ ಔಟ್ ಎಂದು ತೀರ್ಪು ನೀಡುತ್ತಾರೆ. ಇಲ್ಲವಾದ್ರೆ ಆನ್ಫೀಲ್ಡ್ ತೀರ್ಪು ಅಂತಿಮ ಎಂದು ಹೇಳಲಾಗುತ್ತದೆ. ಐಸಿಸಿಯ ಈ ನಿಯಮವನ್ನು ನಾನು ಒಪ್ಪುವುದಿಲ್ಲ ಎಂದು ಸಚಿನ್ ಹೇಳಿದ್ದಾರೆ.
