ಮುಂಬೈ:ಐಪಿಎಲ್ನಲ್ಲಿ ಮಿಂಚಿದ್ದ ವೆಸ್ಟ್ ಇಂಡೀಸ್ ತಂಡದ ಸ್ಫೋಟಕ ಆಲ್ರೌಂಡರ್ ಆ್ಯಂಡ್ರ್ಯೂ ರಸೆಲ್ 2019 ವಿಶ್ವಕಪ್ನಿಂದ ಹೊರಬಿದ್ದಿದ್ದಾರೆ.
ಮಂಡಿ ನೋವಿನಿಂದ ಬಳಲುತ್ತಿದ್ದ ರಸೆಲ್ ಕಳೆದ ಪಂದ್ಯದಿಂದ ಹೊರಗುಳಿದಿದ್ದರು. ಇದೀಗ ಗುಣಮುಖರಾಗದ ಹಿನ್ನಲೆಯಲ್ಲಿ ಇಡೀ ಟೂರ್ನಿಯಿಂದಲೇ ಹೊರಬಿದ್ದಿದ್ದಾರೆ. ಕೊನೆಯ ಮೂರು ಪಂದ್ಯಗಳಲ್ಲಾದರೂ ಗೆದ್ದು ವಿಶ್ವಕಪ್ನಲ್ಲಿ ಗೆಲುವಿನ ವಿದಾಯ ಹೇಳಬೇಕೆಂದುಕೊಂಡಿದ್ದ ವಿಂಡೀಸ್ ತಂಡಕ್ಕೆ ಭಾರಿ ಆಘಾತವುಂಟಾಗಿದೆ.
ಐಪಿಎಲ್ನಲ್ಲಿ ಬ್ಯಾಟಿಂಗ್ ಹಾಗೂ ಬೌಲಿಂಗ್ನಲ್ಲಿ ಮಿಂಚಿದ್ದ 510 ರನ್ ಹಾಗೂ 14 ವಿಕೆಟ್ ಪಡೆದು ಮಿಂಚಿದ್ದರು. ವಿಶ್ವಕಪ್ನಲ್ಲೂ ತಮ್ಮ ಪ್ರದರ್ಶನ ಮುಂದುವರಿಸುವ ಮುನ್ಸೂಚನೆಯೊಂದಿಗೆ ಮೊದಲ ಪಂದ್ಯಕ್ಕಿಳಿದಿದ್ದ ರಸೆಲ್ ಪಾಕಿಸ್ತಾನದ ವಿರುದ್ಧ 3 ಓವರ್ಗಳಲ್ಲಿ 4 ರನ್ ನೀಡಿ 2 ವಿಕೆಟ್ ಪಡೆದು ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದರು.
ಆದರೆ ಅವರ ಪ್ರದರ್ಶನ ಅದೊಂದೇ ಪಂದ್ಯಕ್ಕೆ ಸೀಮಿತವಾಗಿತ್ತು. ಈ ಟೂರ್ನಿಯಲ್ಲಿ 3 ಪಂದ್ಯಗಳಿಂದ 36 ರನ್ ಗಳಿಸಿದ್ದು 5 ವಿಕೆಟ್ ಪಡೆದಿದ್ದರು.
ರಸೆಲ್ ಬದಲಿಗೆ ಐರ್ಲೆಂಡ್ ಸರಣಿಯಲ್ಲಿ ಭರ್ಜರಿ ಪ್ರದರ್ಶನ ತೋರಿದ್ದ ಸುನಿಲ್ ಆ್ಯಂಬ್ರಿಸ್ ವೆಸ್ಟ್ ಇಂಡೀಸ್ ತಂಡದ 15 ಸದಸ್ಯರ ತಂಡ ಸೇರಿಕೊಂಡಿದ್ದಾರೆ. ಆಂಬ್ರಿಸ್ ವಿಂಡೀಸ್ ಪರ ಕೇವಲ 7 ಪಂದ್ಯಗಳನ್ನಾಡಿದ್ದಾರೆ.
