ಸಾಲಗಾರರ ಒತ್ತಡ ತಾಳದೇ ಅಂಡರ್ 16 ತಂಡದ ಕ್ರಿಕೆಟಿಗ ಸಾವಿಗೆ ಶರಣು

ಆರ್ಥಿಕ ಸಮಸ್ಯೆ ಕಾರಣದಿಂದ ಬಂಗಾಳದ ಅಂಡರ್ 16 ತಂಡದ ಯುವ ಕ್ರಿಕೆಟಿಗ ರೋಹಿತ್ ಯಾದವ್ ಸಾವಿಗೆ ಶರಣಾಗಿದ್ದಾರೆ. ಕ್ರೀಡಾ ಸಾಮಗ್ರಿಗಳನ್ನು ಖರೀದಿಸುವ ಸಲುವಾಗಿ ತಮ್ಮ ಪರಿಚಯಸ್ಥರಿಂದ ರೋಹಿತ್​ ಸಾಲ ಪಡೆದಿದ್ದರು ಎನ್ನಲಾಗಿದೆ.

ಹೌರಾ (ಪಶ್ಚಿಮ ಬಂಗಾಳ): ಪಶ್ಚಿಮ ಬಂಗಾಳದ ಉದಯೋನ್ಮುಖ ಕ್ರಿಕೆಟಿಗ ರೋಹಿತ್ ಯಾದವ್ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಬಂಗಾಳದ ಅಂಡರ್ 16 ತಂಡದ ಯುವ ಕ್ರಿಕೆಟಿಗರಾಗಿದ್ದ ರೋಹಿತ್ ಸಾವು ಕ್ರೀಡಾ ವಲಯದಲ್ಲಿ ಸಂಚಲನ ಮೂಡಿಸಿದೆ. ಕುಟುಂಬದಲ್ಲಿನ ಆರ್ಥಿಕ ಸಂಕಷ್ಟದ ನಡುವೆಯೂ ಕ್ರಿಕೆಟ್​ನಲ್ಲಿ ಮುಂದುವರೆಯಲು ರೋಹಿತ್​ ತಮ್ಮ ಸ್ನೇಹಿತರ ಬಳಿ ಸಾಕಷ್ಟು ಸಾಲ ಮಾಡಿಕೊಂಡಿದ್ದರು ಎಂದು ತಿಳಿದು ಬಂದಿದೆ.

ಹೌರಾದ ನಿವಾಸಿಯಾದ ರೋಹಿತ್ ಯಾದವ್​ ಕೇವಲ 18 ವರ್ಷ ವಯಸ್ಸಿನವರಾಗಿದ್ದರು. ಬುಧವಾರ ಬೆಳಗ್ಗೆ ತಮ್ಮ ಮನೆಯ ಕೊಠಡಿಯಲ್ಲಿ ಪ್ರಜ್ಞಾಹೀನ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾರೆ. ಆಗ ತಕ್ಷಣ ಪೋಷಕರು ರೋಹಿತ್​ನನ್ನು ಸಮೀಪದ ಟಿಎ ಜೈಸ್ವಾಲ್ ಆಸ್ಪತ್ರೆಗೆ ಸಾಗಿಸಿದ್ದಾರೆ. ಆದರೆ, ಅಷ್ಟರಲ್ಲೇ ಮೃತಪಟ್ಟಿರುವುದಾಗಿ ಎಂದು ವೈದ್ಯರು ಘೋಷಿಸಿದ್ದಾರೆ. ನಂತರ ಮೃತದೇಹವನ್ನು ಪೊಲೀಸರು ಮರಣೋತ್ತರ ಪರೀಕ್ಷೆಗೆ ರವಾನಿಸಿದ್ದಾರೆ.

ಬಂಗಾಳ ಕ್ರಿಕೆಟ್​ ಅಸೋಸಿಯೇಷನ್​ ಪ್ರಕಟಿಸಿದ್ದ 2019-20ರ ಸಾಲಿನ ಅಂಡರ್ 16 ತಂಡದ ಸಂಭವನೀಯರ ಪಟ್ಟಿ

ಬಂಗಾಳ ತಂಡದಲ್ಲಿ ಸ್ಥಾನ ಪಡೆದಿದ್ದ ಕ್ರಿಕೆಟಿಗ: ಉತ್ತಮ ಕ್ರಿಕೆಟ್​ ಪಟುವಾಗಿದ್ದ ರೋಹಿತ್​ ಬಂಗಾಳದ ಅಂಡರ್ 16 ತಂಡದಲ್ಲೂ ಸ್ಥಾನ ಪಡೆದಿದ್ದರು. ಬಂಗಾಳ ಕ್ರಿಕೆಟ್​ ಅಸೋಸಿಯೇಷನ್​ ಪ್ರಕಟಿಸಿದ್ದ 2019-20ರ ಸಾಲಿನ ಅಂಡರ್ 16 ತಂಡದ ಸಂಭವನೀಯ 35 ಜನ ಆಟಗಾರರಲ್ಲಿ ರೋಹಿತ್​ ಮೊದಲ ಹನ್ನೊಂದರಲ್ಲಿ ತಮ್ಮ ಸ್ಥಾನ ಖಚಿತ ಪಡಿಸಿಕೊಂಡಿದ್ದರು.

ಕ್ರಿಕೆಟಿಗಾಗಿ ಸಾಲ ಮಾಡಿದ್ದ ರೋಹಿತ್:ಪ್ರತಿಭಾನ್ವಿತ ಕ್ರಿಕೆಟಿಗರಾಗಿದ್ದ ರೋಹಿತ್​ ಯಾದವ್​ ತಮ್ಮ ಕೆರಿಯರ್​ ಬಗ್ಗೆ ಸಾಕಷ್ಟು ಕನಸುಗಳನ್ನು ಕಂಡಿದ್ದರು. ಆದರೆ, ಅವರ ಮನೆಯಲ್ಲಿ ಬಡವತವಿತ್ತು. ಇದರಿಂದ ಕ್ರಿಕೆಟ್ ವೃತ್ತಿಜೀವನವನ್ನು ಮುಂದುವರಿಸಲು ಹಣದ ಸಮಸ್ಯೆ ಎದುರಿಸುತ್ತಿದ್ದರು. ಆದರೆ, ಹೇಗಾದರೂ ಮಾಡಿ ಕ್ರಿಕೆಟ್​ನಲ್ಲಿ ಮುಂದುವರೆಯಬೇಕೆಂಬ ಛಲವನ್ನು ಹೊಂದಿದ್ದರು. ಹೀಗಾಗಿಯೇ ತಮ್ಮ ಕ್ರೀಡಾ ಸಾಮಗ್ರಿಗಳನ್ನು ಖರೀದಿಸುವ ನಿಟ್ಟಿನಲ್ಲಿ ಪರಿಚಯಸ್ಥರಿಂದ ರೋಹಿತ್​ ಸಾಲ ಪಡೆದಿದ್ದರು ಎಂದು ಹೇಳಲಾಗುತ್ತಿದೆ.

ಖಿನ್ನತೆಯಿಂದ ಸಾವಿಗೆ ಶರಣು?: ರೋಹಿತ್​ ಯಾದವ್​ ಕುಟುಂಬವು ಯಾವುದೇ ಸ್ಥಿರ ಆದಾಯದ ಮೂಲವನ್ನು ಹೊಂದಿರಲಿಲ್ಲ. ಇದರಿಂದ ತಮ್ಮ ಸಾಲವನ್ನು ಮರುಪಾವತಿಸಲು ಆತನಿಗೆ ಸಾಧ್ಯವಾಗಿರಲಿಲ್ಲ ಎನ್ನಲಾಗುತ್ತಿದೆ. ಇತ್ತ, ಸಾಲ ಕೊಟ್ಟುವರು ತಮ್ಮ ಹಣವನ್ನು ಮರಳಿ ಕೇಳಲು ಆರಂಭಿಸಿದ್ದರು. ಇದರ ಪರಿಣಾಮವಾಗಿ ಯುವ ಕ್ರಿಕೆಟಿಗ ಮಾನಸಿಕವಾಗಿ ನೊಂದುಕೊಂಡಿದ್ದರು. ಅಲ್ಲದೇ, ಇದೇ ವಿಷಯವಾಗಿ ಖಿನ್ನತೆಗೂ ಒಳಗಾಗಿ, ಸಾವಿಗೆ ಶರಣಾಗಿರುವ ಶಂಕೆ ವ್ಯಕ್ತವಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಮರಣೋತ್ತರ ಪರೀಕ್ಷೆ ನಿಖರ ಕಾರಣ ಬಹಿರಂಗ: ಇದೇ ವೇಳೆ ಸಾಲವನ್ನು ತೀರಿಸಲು ಒತ್ತಡ ಹೆಚ್ಚಾಗಿತ್ತು. ಈ ಸಾಲವನ್ನು ಮರುಪಾವತಿಸಲು ರೋಹಿತ್ ಇತರ ಮೂಲಗಳಿಂದ ಹೊಸ ಸಾಲವನ್ನು ಪಡೆಯಲು ಶುರು ಮಾಡಿದ್ದರು ಎಂಬ ಮಾಹಿತಿ ಲಭ್ಯವಾಗಿದೆ. ಸದ್ಯ ಪ್ರಜ್ಞಾಹೀನ ಸ್ಥಿತಿಯಲ್ಲಿ ಆತನ ಮೃತದೇಹ ಪತ್ತೆಯಾಗಿದ್ದು, ಆತ್ಮಹತ್ಯೆಯ ನಿಖರ ಕಾರಣವು ಮರಣೋತ್ತರ ಪರೀಕ್ಷೆ ವರದಿ ಮತ್ತು ಹೆಚ್ಚಿನ ತನಿಖೆ ನಂತರ ಬಹಿರಂಗವಾಗಲಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಆತ್ಮಹತ್ಯೆಗೆ ಪ್ರಚೋದನೆ - ತಾಯಿ ಆರೋಪ: ಮತ್ತೊಂದೆಡೆ ಮಗವನ್ನು ಕಳೆದುಕೊಂಡು ಪೋಷಕರ ಆಕ್ರಂದನ ಮುಗಿಲು ಮುಟ್ಟಿತ್ತು. ಈ ಸಂದರ್ಭದಲ್ಲಿ ಮಾತನಾಡಿದ ರೋಹಿತ್ ತಾಯಿ, ಸಾಲ ಮರು ಪಾವತಿಸುವ ಕುರಿತಂತೆ ರೋಹಿತ್​ ಮೇಲೆ ಸಾಕಷ್ಟು ಒತ್ತಡ ಹೇರಲಾಗುತ್ತಿತ್ತು. ಸಾಲ ಕೊಟ್ಟವರೇ ನಮ್ಮ ಮಗನಿಗೆ ಆತ್ಮಹತ್ಯೆಗೆ ಪ್ರಚೋದಿಸಿದ್ದಾರೆ. ಇದರಿಂದಲೇ ಆತ ಇಂತಹ ನಿರ್ಧಾರಕ್ಕೆ ತೆಗೆದುಕೊಂಡಿದ್ದಾನೆ ಎಂದು ಆರೋಪಿಸಿದ್ದಾರೆ.

ಇದನ್ನೂ ಓದಿ:ಮೂವರು ಒಡಹುಟ್ಟಿದವರ ಅನುಮಾನಾಸ್ಪದ ಸಾವು.. ಸಾಲದ ಸಮಸ್ಯೆಯಿಂದ ಆತ್ಮಹತ್ಯೆ ಶಂಕೆ