ರಾಮಚಂದ್ರ-ಜಾನು ನೆನಪುಗಳ ಮಾತು ಮಧುರ... ಮೌನ ಭಾರ

ಕೊನೆಗೂ ಗೋಲ್ಡನ್ ಸ್ಟಾರ್ ಅಭಿನಯದ '99' ಸಿನಿಮಾ ನಿನ್ನೆ ಕಾರ್ಮಿಕ ದಿನಾಚರಣೆಯಂದು ಬಿಡುಗಡೆಯಾಗಿದೆ. ಇದು ತಮಿಳಿನ '96' ಸಿನಿಮಾದ ರೀಮೇಕ್​​​. ಪ್ರೀತಮ್ ಗುಬ್ಬಿ ಈ ಸಿನಿಮಾವನ್ನು ನಿರ್ದೇಶಿಸಿದ್ದಾರೆ.

ಇದು ಮನಸ್ಸಿಗೆ ಮುಟ್ಟುವ ಸಿನಿಮಾ ಆದರೂ ಚಿತ್ರದ ಮೊದಲಾರ್ಧ ಪ್ರೇಕ್ಷಕ ಸಹಕರಿಸಬೇಕು. ದಾಡಿ ಬಿಟ್ಟಿರುವ ರಾಮಚಂದ್ರನಿಗೆ (ಗಣೇಶ್​​​) ಹೆಚ್ಚು ಮಾತಿಲ್ಲ. ಮಾತಿನ ಮಲ್ಲ ಗಣೇಶ್ ಸಿಕ್ಕುವುದು ಎರಡನೇ ಭಾಗದಲ್ಲೂ ಕಡಿಮೆಯೇ. ಗಣೇಶ್ ಒಂದು ರೀತಿಯಲ್ಲಿ ತ್ಯಾಗರಾಜ. ತನ್ನ ಪ್ರೀತಿಯನ್ನು ಬಚ್ಚಿಟ್ಟುಕೊಂಡು ಹಾಗೆ ಇದ್ದು ಬಿಡುತ್ತಾನೆ. 20 ವರ್ಷದ ನಂತರ ರಾಮಚಂದ್ರ ಹಾಗೂ ಜಾನು (ಭಾವನ) ಇಬ್ಬರೂ ಒಂದು ರಾತ್ರಿಯಲ್ಲಿ ತಮ್ಮ ಜೀವನದ ಪಯಣವನ್ನು ಒಬ್ಬರಿಗೊಬ್ಬರು ಒಪ್ಪಿಸಿಕೊಳ್ಳುತ್ತಾರೆ. ‘99’ ಚಿತ್ರದ ಜೀವಾಳವೇ ರಾಮಚಂದ್ರ ಹಾಗೂ ಜಾನು ಅವರ ಮಾತು ಕಥೆ.

ಶಾಲಾ ದಿನಗಳಲ್ಲಿ ರಾಮಚಂದ್ರ ಅಚಾನಕ್ ಆಗಿ ಕಾಣೆಯಾದಾಗ ಹೆಚ್ಚು ವ್ಯಥೆ ಆಗುವುದು ಜಾನುಗೆ. ವಿಧಿಯಿಲ್ಲದೆ ಜಾನು ಕಾಲೇಜು ಓದಿಗಾಗಿ ಬೇರೆ ಕಡೆ ಹೊರಟಾಗ ರಾಮಚಂದ್ರ ಸುಮ್ಮನೆ ಇದ್ದುಬಿಡಲ್ಲ. ಅವಳ ಪ್ರತಿಯೊಂದು ಹೆಜ್ಜೆಯನ್ನು ಗಮನಿಸಿರುತ್ತಾನೆ. ಆದರೆ ಒಂದು ಕನ್ಫ್ಯೂಶನ್​​​​​​ ಇಬ್ಬರನ್ನೂ ದೂರ ಮಾಡಿಬಿಡುತ್ತದೆ. ಇಬ್ಬರೂ ತಮ್ಮ ಪ್ರೀತಿಯನ್ನು ಹೇಳಿಕೊಳ್ಳಲಾಗದೆ ಮನಸ್ಸಿನಲ್ಲಿಟ್ಟುಕೊಂಡು ವೇದನೆ ಪಡುತ್ತಾರೆ. ಮುಂದಿನ ಕಥೆಯನ್ನು ನೀವು ಸಿನಿಮಾ ನೋಡಿಯೇ ತಿಳಿದುಕೊಳ್ಳಬೇಕು.

ಗಣೇಶ್ ಅವರಿಗೆ ಇನ್ನೂ ಹೆಚ್ಚು ಮಾತು ಇರಬೇಕಿತ್ತು. ಮೊದಲಿನಿಂದಲೂ ಗಣೇಶ್ ತೆರೆ ಮೇಲೆ ಪಟ ಪಟ ಮಾತುಗಾರ. ಆದರೆ ಈ ಸಿನಿಮಾದಲ್ಲಿ ಅವರ ಮೌನ ಸ್ವಲ್ಪ ನೀರಸ ಎನಿಸುತ್ತದೆ. ಇನ್ನು ಗಣೇಶ್​​​​ಗೆ ದಾಡಿ ಹೊಂದಾಣಿಕೆ ಆಗದೆ ಜಾನು ಪಾತ್ರಧಾರಿ ಭಾವನ ಆತನನ್ನು ಸೆಲೂನ್​​ಗೆ ಕರೆದುಕೊಂಡು ಹೋಗಿ ಗಡ್ಡ ತೆಗೆಸಿದಾಗ ನಮಗೆ ನಿಜವಾದ ಗಣೇಶ್ ಕಾಣಸಿಗುತ್ತಾರೆ. ನಾಯಕಿ ಭಾವನ ಮೆನನ್ ತಮ್ಮ ಪಾತ್ರವನ್ನು ಅನುಭವಿಸಿ ಅಭಿನಯಿಸಿದ್ದಾರೆ. ಅವರ ಸುಂದರ ಕಣ್ಣುಗಳು ಅವರಷ್ಟೇ ಬಹಳ ಆಕರ್ಷಕ. ಚಿತ್ರದಲ್ಲಿ ಭಾವನ ಹೊರತುಪಡಿಸಿ ಬೇರೆ ಯಾವ ನಟಿಯೂ ಈ ಪಾತ್ರಕ್ಕೆ ನ್ಯಾಯ ಒದಗಿಸುತ್ತಿರಲಿಲ್ಲವೇನೋ ಎನಿಸುತ್ತದೆ.

ಚಿಕ್ಕ ವಯಸ್ಸಿನ ರಾಮಚಂದ್ರ-ಜಾನು ಪಾತ್ರ ಮಾಡಿರುವ ಹೇಮಂತ್ ಹಾಗೂ ಸಮೀಕ್ಷ ನಟನೆ ಕೂಡಾ ಮೆಚ್ಚುವಂತದ್ದಾಗಿದೆ​​​​​​​​​​​. ರವಿಶಂಕರ್ ಗೌಡ, ಜ್ಯೋತಿ ರಾಯ್ ಆ್ಯಕ್ಟಿಂಗ್ ಕೂಡಾ ಓಕೆ. ಇಲ್ಲಿ ಡ್ಯೂಯಟ್ ಇಲ್ಲ, ಎಲ್ಲಾ ಹಿನ್ನೆಲೆಯಲ್ಲೇ ಬಂದು ಹೋಗುತ್ತದೆ. ಅರ್ಜುನ ಜನ್ಯ ಅವರ ಸಂಗೀತ ನಿರ್ದೇಶನದ 100ನೇ ಸಿನಿಮಾ ಇದು. 'ಹೇಳಿ ಹೋಗು ಕಾರಣ' ಹಾಡು ಬಹಳವಾಗಿ ಕಾಡುತ್ತದೆ. 'ಗಮನ ಸೆಳೆದ ಮೊದಲ ಹುಡುಗ... ಅಂಗಳದಲ್ಲಿ ಹೂ ಅರಳಲು ನೀ ಜ್ಞಾಪಕ' ಸಾಲುಗಳು ಬಹಳ ಸುಂದರ. ಸಂತೋಷ್ ರಾಯ್ ಪತಾಜೆ ಅವರ ಛಾಯಾಗ್ರಹಣ ಚೆನ್ನಾಗಿದೆ.

ಒಟ್ಟಿನಲ್ಲಿ ಪರಸ್ಪರ ಪ್ರೀತಿಸುತ್ತಿರುವ ಪ್ರೇಮಿಗಳಿಗೆ, ಭಗ್ನ ಪ್ರೇಮಿಗಳಿಗೆ ಈ ಸಿನಿಮಾ ಇಷ್ಟವಾಗುವುದು ಗ್ಯಾರಂಟಿ.