ನವದೆಹಲಿ:ಬಾಲಿವುಡ್‌ನ ಜನಪ್ರಿಯ ನಟಿ ಮಾಧುರಿ ದೀಕ್ಷಿತ್ ಅವರ ಕಿರಿಯ ಪುತ್ರ ರಿಯಾನ್ ಕ್ಯಾನ್ಸರ್ ಜಾಗೃತಿ ದಿನದ ಅಂಗವಾಗಿ ತಮ್ಮ ತಲೆ ಕೂದಲನ್ನು ದಾನ ಮಾಡಿ ಕ್ಯಾನ್ಸರ್ ರೋಗಿಗಳಿಗೆ ನೆರವಾಗಿದ್ದಾರೆ. ರಿಯಾನ್ ಕಾರ್ಯಕ್ಕೆ ನೆಟ್ಟಿಗರಿಂದ ಮೆಚ್ಚುಗೆ ವ್ಯಕ್ತವಾಗಿದೆ.
ಮಾಧುರಿ ದೀಕ್ಷಿತ್ ಅವರು ಪುತ್ರ ರಿಯಾನ್ ತಲೆಕೂದಲನ್ನು ದಾನ ಮಾಡಲು ಸಲೂನ್ನಲ್ಲಿ ಕುಳಿತ ವಿಡಿಯೋವನ್ನು ತಮ್ಮ ಇನ್ಸ್ಟಾಗ್ರಾಮ್ನಲ್ಲಿ ಹಂಚಿಕೊಂಡಿದ್ದಾರೆ.
ತಮ್ಮ ಮಗನನ್ನು 'ಹೀರೋ' ಎಂದು ಸಂಬೋಧಿಸಿರುವ ಮಾಧುರಿ ಅವರು, ರಾಷ್ಟ್ರೀಯ ಕ್ಯಾನ್ಸರ್ ದಿನದ ಹಿನ್ನೆಲೆ ನನ್ನ ಮಗ ರಿಯಾನ್ ತನ್ನ ತಲೆಕೂದಲನ್ನು ದಾನವಾಗಿ ನೀಡಿದ್ದಾರೆ. ಕ್ಯಾನ್ಸರ್ ಪೀಡಿತರಾಗಿ ಕೀಮೋ ಪಡೆಯುತ್ತಿರುವ ರೋಗಿಗಳಿಗೆ ಅಗತ್ಯವಿರುವ ತಲೆಕೂದಲನ್ನು ನೀಡುವುದಾಗಿ ರಿಯಾನ್ ಹೇಳಿದಾಗ ಅಚ್ಚರಿಪಟ್ಟಿದ್ದೆವು. ಇದಕ್ಕಾಗಿ 2 ವರ್ಷಗಳಿಂದ ಉದ್ದವಾದ ಕೂದಲನ್ನು ಕತ್ತರಿಸದೇ ಬೆಳೆಸಿದ್ದ. ಈಗ ರಾಷ್ಟ್ರೀಯ ಕ್ಯಾನ್ಸರ್ ಜಾಗೃತಿ ದಿನದ ಹಿನ್ನೆಲೆ ಕೂದಲನ್ನು ಕ್ಯಾನ್ಸರ್ ಸಂಸ್ಥೆಗೆ ನೀಡಿದ್ದಾನೆ. ಮಗನ ನಿರ್ಧಾರದ ಬಗ್ಗೆ ಹೆಮ್ಮೆ ಇದೆ ಎಂದು ಬರೆದುಕೊಂಡಿದ್ದಾರೆ.
ಮಾಧುರಿ ದೀಕ್ಷಿತ್ ಅವರ ಪುತ್ರನ ಈ ಕಾರ್ಯಕ್ಕೆ ನಟಿಯರಾದ ಶಿಲ್ಪಾಶೆಟ್ಟಿ, ಜೆನಿಲಿಯಾ ಡಿಸೋಜಾ, ನಿರ್ಮಾಪಕಿ ಫರಾ ಖಾನ್, ನಟ ರಿತೇಶ್ ದೇಶ್ಮುಖ್ ಸೇರಿದಂತೆ ನೆಟ್ಟಿಗರಿಂದಲೂ ಪ್ರಶಂಸೆ ವ್ಯಕ್ತವಾಗಿದೆ.