ಗುವಾಹಟಿ (ಅಸ್ಸೋಂ): ಗುವಾಹಟಿಯ ಇಂಡಿಯನ್ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ (ಐಐಟಿ) ಗುವಾಹಟಿಯ ಸಂಶೋಧಕರು ನ್ಯಾನೊ ಕ್ಲೇ ಬಳಸಿ ಲಿಕ್ವಿಡ್ ಮಾರ್ಬಲ್ಗಳನ್ನು ಅಭಿವೃದ್ಧಿಪಡಿಸಿದ್ದಾರೆ. ಇದನ್ನು ದೇಹದೊಳಗೆ ಔಷಧ ನೀಡಲು ಮತ್ತು ಕ್ಯಾಸ್ಕೇಡ್ ರಾಸಾಯನಿಕ ಪ್ರತಿಕ್ರಿಯೆಗಳ ಕೆಲಸಗಳಿಗಾಗಿ ಪೂರ್ವದಲ್ಲಿಯೇ ಪ್ರೋಗ್ರಾಮ್ ಮಾಡಬಹುದು. ನ್ಯಾನೊ ಕ್ಲೇಗಳು ಖನಿಜ ಸಿಲಿಕೇಟ್ಗಳ ಪದರು ಹೊಂದಿರುವ ನ್ಯಾನೊ ಪಾರ್ಟಿಕಲ್ಗಳಾಗಿವೆ.
ಸಾಮಾನ್ಯವಾಗಿ ರೋಗದ ಚಿಕಿತ್ಸೆಯಲ್ಲಿ ಮಾತ್ರೆಗಳು, ಕ್ಯಾಪ್ಸುಲ್ಗಳು, ಸಿರಪ್ಗಳು, ಮುಲಾಮುಗಳು ಮುಂತಾದುವುಗಳನ್ನು ಒಳಗೊಂಡಿರುತ್ತದೆ. ಮತ್ತೊಂದೆಡೆ ನಿಯಂತ್ರಿತ ಔಷಧ ಪೂರೈಕೆ ವ್ಯವಸ್ಥೆಯಲ್ಲಿ ನಿರ್ದಿಷ್ಟ ಜಾಗದಲ್ಲಿ ಅಪೇಕ್ಷಿತ ಅವಧಿಗೆ ಕ್ರಮೇಣವಾಗಿ ಅಗತ್ಯವಿರುವ ಪ್ರಮಾಣದ ಔಷಧವನ್ನು ತಲುಪಿಸುವ ಹೆಚ್ಚು ಪರಿಣಾಮಕಾರಿ ತಂತ್ರವಾಗಿದೆ. ಕರಗುವ ರೂಪದಲ್ಲಿ ಔಷಧಗಳ ಲೋಡ್ ಮತ್ತು ಬಿಡುಗಡೆ ಈ ತಂತ್ರಜ್ಞಾನದ ಮತ್ತೊಂದು ಪ್ರಮುಖ ಅಂಶವಾಗಿದೆ. 'ಟೈಮ್ ಬಾಂಬ್' ಮಾದರಿಯಲ್ಲಿ ಔಷಧ ಬಿಡುಗಡೆಯ ಪರಿಣಾಮವನ್ನು ಹೊಂದಲು ಮತ್ತು ಸ್ವಯಂಪ್ರೇರಿತ ರಾಸಾಯನಿಕ ಕ್ರಿಯೆಯನ್ನು ನಡೆಸಬಹುದಾದ ದ್ರವ ಮಾರ್ಬಲ್ಗಳನ್ನು IIT ಗುವಾಹಟಿಯ ತಂಡವು ವಿನ್ಯಾಸಗೊಳಿಸಿದೆ.
ಉದಾಹರಣೆಗೆ ನೋಡುವುದಾದರೆ ಬೆಳಕು, ತಾಪಮಾನ, ವಿದ್ಯುತ್ ಪ್ರಚೋದನೆಗೆ ಪ್ರತಿಕ್ರಿಯೆಯಾಗಿ ಲಿಕ್ವಿಡ್ ಮಾರ್ಬಲ್ನಿಂದ ಔಷಧಗಳ ಬಿಡುಗಡೆಯನ್ನು ಈ ಮೊದಲೇ ಸಾಧಿಸಲಾಗಿದೆ. ಆದರೆ, ಸಮಯದ ಮುಂಚೆಯೇ ಪ್ರೋಗ್ರಾಮ್ ಮಾಡಲಾದ ಬಿಡುಗಡೆಯನ್ನು ಇನ್ನೂ ಸಾಧಿಸಲಾಗಿಲ್ಲ. ನಾವು ನೀರಿನ ಮೇಲೆ ತೇಲುವ ಲಿಕ್ವಿಡ್ ಮಾರ್ಬಲ್ನ ಜೀವಿತಾವಧಿಯನ್ನು ರಾಸಾಯನಿಕವಾಗಿ ಮಾರ್ಪಡಿಸಿದ್ದೇವೆ ಎಂದು ವಿಶ್ವವಿದ್ಯಾಲಯದ ರಸಾಯನಶಾಸ್ತ್ರ ವಿಭಾಗ ಮತ್ತು ನ್ಯಾನೊತಂತ್ರಜ್ಞಾನ ಕೇಂದ್ರದ ಸಹ ಪ್ರಾಧ್ಯಾಪಕ ಡಾ. ಉತ್ತಮ್ ಮನ್ನಾ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ಸಾಮಾನ್ಯ ಹನಿಗಳಿಗಿಂತ ಭಿನ್ನವಾಗಿ, ಲಿಕ್ವಿಡ್ ಮಾರ್ಬಲ್ ಇದು ಅಂಟಿಕೊಳ್ಳದ, ಒದ್ದೆಯಾಗದ ಡ್ರಾಪ್ಲೆಟ್ ಆಗಿದೆ. ಸೂಕ್ಷ್ಮ ಹೈಡ್ರೋಫೋಬಿಕ್ ಕಣಗಳು ಅಂದರೆ ನೀರು - ಹಿಮ್ಮೆಟ್ಟಿಸುವ ಕಣಗಳೊಂದಿಗೆ ಒಂದು ಡ್ರಾಪ್ಲೆಟ್ ಅನ್ನು ಸುತ್ತುವ ಮೂಲಕ ಇದನ್ನು ರಚಿಸಲಾಗಿದೆ. ಲಿಕ್ವಿಡ್ ಮಾರ್ಬಲ್ಗಳನ್ನು ಸುತ್ತಬಹುದು, ಹಿಂಡಬಹುದು ಮತ್ತು ನೀರಿನ ಕೊಳದಲ್ಲಿ ಹಾಕಿದಾಗ ಸೋರಿಕೆಯಾಗದಂತೆ ತೇಲಿಸಬಹುದು.
ಔಷಧವು ಸೂಕ್ತ ಸಮಯದಲ್ಲಿ ಬಿಡುಗಡೆಯಾಗುವಂತೆ ಮಾರ್ಬಲ್ಗಳನ್ನು ಪ್ರೋಗ್ರಾಮ್ ಮಾಡಲು ಸಂಶೋಧಕರು ನ್ಯಾನೊ ಜೇಡಿ ಮಣ್ಣನ್ನು ರಾಸಾಯನಿಕ ವಸ್ತುಗಳೊಂದಿಗೆ ಮಾರ್ಪಡಿಸಿದರು. ಈ ರಾಸಾಯನಿಕ ವಸ್ತುಗಳು ನೀರು ಹೀರಿಕೊಳ್ಳುವ (ಹೈಡ್ರೋಫಿಲಿಕ್) ಅಥವಾ ನೀರನ್ನು ಹಿಮ್ಮೆಟ್ಟಿಸುವ (ಹೈಡ್ರೋಫೋಬಿಕ್) ವಸ್ತುಗಳಾಗಿದ್ದವು. ಹೈಡ್ರೋಫಿಲಿಕ್ ಮತ್ತು ಹೈಡ್ರೋಫೋಬಿಕ್ ನ್ಯಾನೊ ಮಣ್ಣಿನ ಪುಡಿಗಳನ್ನು ಒಳಗೊಂಡಿರುವ ಪೌಡರ್ ಬೆಡ್ ಮೇಲೆ ನೀರಿನ ಹನಿಯನ್ನು ಹಾಕಲಾಯಿತು. ನ್ಯಾನೊ ಜೇಡಿಮಣ್ಣಿನ ಮೇಲ್ಮೈಯಲ್ಲಿ ನೀರು ಹೀರಿಕೊಳ್ಳುವ ಮತ್ತು ನೀರು ಹಿಮ್ಮೆಟ್ಟಿಸುವ ಗುಂಪುಗಳ ಸಂಬಂಧಿತ ಪ್ರಮಾಣಗಳ ಪ್ರಕಾರ ಲಿಕ್ವಿಡ್ ಮಾರ್ಬಲ್ಗಳ ಗುಣಲಕ್ಷಣಗಳು ಮತ್ತು ಸ್ಥಿರತೆ ಬದಲಾಗಿರುವುದು ಕಂಡು ಬಂದಿತು.
ಲಿಕ್ವಿಡ್ ಮಾರ್ಬಲ್‌ಗಳು ಮೃದುವಾದ ಗೋಳಾಕಾರದ ಘನವಸ್ತುಗಳಾಗಿದ್ದು, ಅವುಗಳೊಳಗಿನ ದ್ರವವನ್ನು ಬದಲಿಸುವ ಮೂಲಕ ಅನೇಕ ವಿಧಾನಗಳಲ್ಲಿ ಇದನ್ನು ಬಳಸಬಹುದು. ಸೆನ್ಸರ್ ಪ್ಲಾಟ್‌ಫಾರ್ಮ್‌ಗಳು, ಸಾಫ್ಟ್ ರೊಬೊಟಿಕ್ಸ್, ಹೀಲಿಂಗ್ ಏಜೆಂಟ್‌ಗಳು, ಬಯೋಸಿಸ್ಟಮ್‌ಗಳು ಇತ್ಯಾದಿಗಳಲ್ಲಿ ಇವುಗಳನ್ನು ಬಳಸಬಹುದಾಗಿದೆ. ಈ ಸಂಶೋಧನಾ ಅಧ್ಯಯನವನ್ನು ಅಡ್ವಾನ್ಸ್‌ಡ್ ಫಂಕ್ಷನಲ್ ಮೆಟೀರಿಯಲ್ಸ್ ಜರ್ನಲ್‌ನಲ್ಲಿ ಪ್ರಕಟವಾದ ಪೇಪರ್‌ನಲ್ಲಿ ವಿವರಿಸಲಾಗಿದೆ.
ಇದನ್ನೂ ಓದಿ : "ಕುಸ್ತಿಪಟುಗಳ ಆರೋಪ ಗಂಭೀರ"; ದೆಹಲಿ ಪೊಲೀಸರಿಗೆ ಸುಪ್ರೀಂ ಕೋರ್ಟ್ ನೋಟಿಸ್
