ಚಿಪ್​​ಸೆಟ್​ ಫೋನ್​ನ ಹಾರ್ಟ್​ ಆ್ಯಂಟ್​ ಬ್ರೈನ್: ಗ್ರಾಹಕರಲ್ಲಿ ಹೆಚ್ಚಿದ ಅರಿವು

ಸ್ಮಾರ್ಟ್​ಫೋನ್​ನಲ್ಲಿ ಚಿಪ್​ಸೆಟ್​ನ ಪಾತ್ರ ಎಷ್ಟು ಪ್ರಮುಖ ಎಂಬುದು ಇತ್ತೀಚೆಗೆ ಸ್ಮಾರ್ಟ್​ಫೋನ್ ಬಳಕೆದಾರರಿಗೆ ಅರಿವಾಗುತ್ತಿದೆ. ಇತ್ತೀಚಿನ ದಿನಗಳಲ್ಲಿ ಬಳಕೆದಾರರು ಚಿಪ್​ಸೆಟ್​ ಆಧರಿಸಿಯೇ ಫೋನ್ ಖರೀದಿಸುತ್ತಿದ್ದಾರೆ.

ನವದೆಹಲಿ: ಸ್ಮಾರ್ಟ್​ಫೋನ್​ನಲ್ಲಿರುವ ಚಿಪ್​ಸೆಟ್​ ಅದರ ಹೃದಯ ಹಾಗೂ ಮೆದುಳಿನಂತೆ ಕೆಲಸ ಮಾಡುತ್ತದೆ ಎಂಬ ವಿಷಯ ಸ್ಮಾರ್ಟ್​ಫೋನ್ ಬಳಸುವ ಪ್ರತಿ ಐವರ ಪೈಕಿ ನಾಲ್ವರಿಗೆ ತಿಳಿದಿದೆ ಎಂದು ಸೋಮವಾರ ವರದಿಯೊಂದು ಹೇಳಿದೆ. ಸೈಬರ್ ಮೀಡಿಯಾ ಸಂಶೋಧನೆಯ ಪ್ರಕಾರ, ಪ್ರಸ್ತುತ ಸುಮಾರು 83 ಪ್ರತಿಶತದಷ್ಟು ಸ್ಮಾರ್ಟ್‌ಫೋನ್ ಬಳಕೆದಾರರು 5G ಸಕ್ರಿಯಗೊಳಿಸಿದ ಸ್ಮಾರ್ಟ್‌ಫೋನ್ ಒಂದನ್ನು ಖರೀದಿಸಲು ಯೋಜಿಸಿದ್ದಾರೆ.

"ತಮಗೆ ಅತ್ಯುತ್ತಮ ಫೋನ್ ಬಳಕೆಯ ಅನುಭವ ನೀಡುವಲ್ಲಿ ಸ್ಮಾರ್ಟ್‌ಫೋನ್​ನ ಚಿಪ್‌ಸೆಟ್ ನಿರ್ಣಾಯಕವಾಗಿದೆ ಎಂದು ಹೆಚ್ಚಿನ ಗ್ರಾಹಕರು ಇತ್ತೀಚೆಗೆ ಅರಿತುಕೊಳ್ಳುತ್ತಿದ್ದಾರೆ. ಗ್ರಾಹಕರ ಈ ತಿಳುವಳಿಕೆಯ ಆಧಾರದ ಮೇಲೆ ಚಿಪ್‌ಸೆಟ್ ಬ್ರ್ಯಾಂಡ್‌ಗಳು ಅವರ ಆಕಾಂಕ್ಷೆಗಳು ಮತ್ತು ನಿರೀಕ್ಷೆಗಳನ್ನು ಪೂರೈಸಲು ಶ್ರಮಿಸುತ್ತಿವೆ" ಎಂದು ಸೈಬರ್‌ಮೀಡಿಯಾ ಸಂಶೋಧನೆಯ ಉದ್ಯಮ ಸಲಹಾ ಗುಂಪು ವಿಶ್ಲೇಷಕ ಸುರಚಿತಾ ದೇಬ್ ಶರ್ಮಾ ಹೇಳಿದರು.

ಇದಲ್ಲದೆ ಫೋಲ್ಡಬಲ್ ಸ್ಮಾರ್ಟ್‌ಫೋನ್‌ಗಳಂತಹ ಹೊಸ ಉದಯೋನ್ಮುಖ ವೈಶಿಷ್ಟ್ಯಗಳನ್ನು ತಯಾರಿಸುವಲ್ಲಿ ಚಿಪ್‌ಸೆಟ್‌ಗಳ ಪಾತ್ರವು ಮಹತ್ವದ್ದಾಗಿದೆ. ಜೊತೆಗೆ AR/VR ಮತ್ತು ಆಟೋಮೋಟಿವ್ ಸೇರಿದಂತೆ ಇತರ ಸ್ಮಾರ್ಟ್ ಸಾಧನಗಳನ್ನು ಬೆಂಬಲಿಸುತ್ತದೆ ಎಂದು ವರದಿ ಹೇಳಿದೆ. ಫೋಲ್ಡಬಲ್ ಫೋನ್‌ಗಳ ವಿಷಯಕ್ಕೆ ಬಂದರೆ, ಸುಮಾರು 79 ಪ್ರತಿಶತದಷ್ಟು ಸ್ಮಾರ್ಟ್‌ಫೋನ್ ಬಳಕೆದಾರರು ಮಡಚಬಹುದಾದ ಸ್ಮಾರ್ಟ್‌ಫೋನ್‌ಗಳ ಪರಿಕಲ್ಪನೆಯೊಂದಿಗೆ ಪರಿಚಿತರಾಗಿದ್ದಾರೆ. ಈ ಗುಂಪಿನಲ್ಲಿ, ಸುಮಾರು 50 ಪ್ರತಿಶತದಷ್ಟು ಜನರು ತಮ್ಮ ಮುಂದಿನ ಸಾಧನವಾಗಿ ಮಡಚಬಹುದಾದ ಸ್ಮಾರ್ಟ್‌ಫೋನ್ ಒಂದನ್ನು ಕೊಳ್ಳಲು ಆಸಕ್ತಿ ತೋರಿಸಿದ್ದಾರೆ.

ಇದಲ್ಲದೆ ಗ್ರಾಹಕರು ಮಡಚಬಹುದಾದ ಸ್ಮಾರ್ಟ್‌ಫೋನ್‌ಗಳನ್ನು ಕೊಳ್ಳುವಾಗ ಪ್ರಾಥಮಿಕವಾಗಿ ದೊಡ್ಡ ಗಾತ್ರದ ಸ್ಕ್ರೀನ್ (84 ಪ್ರತಿಶತ), ಸುಧಾರಿತ ಪೋರ್ಟಬಿಲಿಟಿ (81 ಪ್ರತಿಶತ) ಮತ್ತು ಮಲ್ಟಿಟಾಸ್ಕಿಂಗ್ ಸಾಮರ್ಥ್ಯ (80 ಪ್ರತಿಶತ) ಮುಂತಾದ ಅಂಶಗಳನ್ನು ಪ್ರಮುಖವಾಗಿ ನೋಡುತ್ತಾರೆ ಎಂದು ವರದಿ ಹೇಳಿದೆ. ಪ್ರತಿ ಏಳು ಸ್ಮಾರ್ಟ್‌ಫೋನ್ ಬಳಕೆದಾರರ ಪೈಕಿ ಆರು ಮಂದಿ ತಮ್ಮ ಸ್ಮಾರ್ಟ್‌ಫೋನ್‌ಗಳನ್ನು ಕಂಟೆಂಟ್​ ಕ್ರಿಯೇಶನ್​ಗೆ ಬಳಸುತ್ತಾರೆ. ವೀಡಿಯೊಗಳು ಅಥವಾ ಫೋಟೋಗಳನ್ನು ಸೆರೆಹಿಡಿಯುವಾಗ, ವೇಗವಾಗಿ ಅಪ್‌ಲೋಡ್ ಮಾಡುವುದನ್ನು (ಶೇ 71) ಅತ್ಯಂತ ಪ್ರಮುಖ ಅಂಶವೆಂದು ಪರಿಗಣಿಸಲಾಗುತ್ತದೆ. ಇದರ ನಂತರ ವರ್ಧಿತ ಶೇಖರಣಾ ಸಾಮರ್ಥ್ಯ (67 ಪ್ರತಿಶತ) ಮತ್ತು ವೇಗದ ನೆಟ್‌ವರ್ಕ್ ಸಂಪರ್ಕ (ಶೇ 65)ಕ್ಕೆ ಆದ್ಯತೆ ನೀಡಲಾಗುತ್ತದೆ.

ಸ್ಮಾರ್ಟ್‌ಫೋನ್ ಪ್ರೊಸೆಸರ್ ಅನ್ನು ಚಿಪ್‌ಸೆಟ್ ಎಂದೂ ಕರೆಯುತ್ತಾರೆ. ಇದು ನಿಮ್ಮ ಸ್ಮಾರ್ಟ್‌ಫೋನ್‌ನಲ್ಲಿ ನಡೆಯುತ್ತಿರುವ ಎಲ್ಲವನ್ನೂ ನಿಯಂತ್ರಿಸುವ ಒಂದು ಘಟಕವಾಗಿದೆ ಮತ್ತು ಫೋನ್ ಸರಿಯಾಗಿ ಕಾರ್ಯನಿರ್ವಹಿಸುವುದನ್ನು ಅದು ಖಚಿತಪಡಿಸುತ್ತದೆ. ಚಿಪ್​ಸೆಟ್​ ಅನ್ನು ಮಾನವ ದೇಹದ ಮೆದುಳಿಗೆ ಹೋಲಿಸಬಹುದು. ನಿಮ್ಮ ಸ್ಮಾರ್ಟ್‌ಫೋನ್‌ನಲ್ಲಿ ನೀವು ಮಾಡುವ ಪ್ರತಿಯೊಂದು ಕ್ರಿಯೆಯು ನೇರವಾಗಿ ಪ್ರೊಸೆಸರ್‌ಗೆ ಹೋಗುತ್ತದೆ. ಈ ಕ್ರಿಯೆಗಳನ್ನು ನಂತರ ನಿಮ್ಮ ಪರದೆಯ ಮೇಲೆ ದೃಶ್ಯ ಬದಲಾವಣೆಗಳಿಗೆ ಪರಿವರ್ತಿಸಲಾಗುತ್ತದೆ ಮತ್ತು ಇದೆಲ್ಲವೂ ಒಂದು ವಿಭಜಿತ ಸೆಕೆಂಡ್‌ನಲ್ಲಿ ನಡೆಯುತ್ತದೆ. ಪ್ರೊಸೆಸರ್ ಒಂದು ನಿರ್ದಿಷ್ಟ ಕ್ರಿಯೆಯನ್ನು ಪ್ರಕ್ರಿಯೆಗೊಳಿಸುವ ವೇಗವು ಪ್ರೊಸೆಸರ್ ಕೋರ್‌ಗಳ ಸಂಖ್ಯೆಯಂತಹ ಹಲವಾರು ಅಂಶಗಳ ಮೇಲೆ ಅವಲಂಬಿತವಾಗಿರುತ್ತದೆ.

ಇದನ್ನೂ ಓದಿ : ರೈಲು ದುರಂತ ಸಂತ್ರಸ್ತರ ಕ್ಲೈಮ್​ ತ್ವರಿತವಾಗಿ ಇತ್ಯರ್ಥಪಡಿಸುವಂತೆ ವಿಮಾ ಕಂಪನಿಗಳಿಗೆ ಸೂಚನೆ