ಬಿಸಿ ಗಾಳಿಯಿಂದ ಭಾರೀ ಹಿಮಪಾತಕ್ಕೆ ಸಾಕ್ಷಿಯಾದ ವಿಶ್ವದ ಅತಿದೊಡ್ಡ ದ್ವೀಪರಾಷ್ಟ್ರ!

ವಿಶ್ವದ ಅತಿದೊಡ್ಡ ದ್ವೀಪವಾಗಿರುವ ಗ್ರೀನ್​ಲ್ಯಾಂಡ್ ಭಾರೀ ಪ್ರಮಾಣದ ಹಿಮ ಕರಗುವಿಕೆಗೆ ಸಾಕ್ಷಿಯಾಗಿದೆ. ದಿನದಿಂದ ದಿನಕ್ಕೆ ಹಿಮಪದರ ಕರಗುವಿಕೆಯ ಪ್ರಮಾಣ ಹೆಚ್ಚಾಗುತ್ತಿದ್ದು, ಈ ವರ್ಷ ಶೇ. 56.5 ರಷ್ಟು ಕರಗುವಿಕೆ ದಾಖಲಾಗಿದೆ.

ಗ್ರೀನ್​ಲ್ಯಾಂಡ್ : ಯುರೋಪ್​ನ ಐದು ರಾಷ್ಟ್ರಗಳಲ್ಲಿ ಕಳೆದೊಂದು ವಾರದಲ್ಲಿ ಜೋರಾಗಿ ಬೀಸುತ್ತಿರುವ ಬಿಸಿಗಾಳಿಯಿಂದಾಗಿ ತಾಪಮಾನದಲ್ಲಿ ಭಾರೀ ಏರಿಕೆ ಕಂಡಿದೆ. ಇನ್ನೊಂದೆಡೆ ವಿಶ್ವದ ಅತಿದೊಡ್ಡ ದ್ವೀಪವಾಗಿರುವ ಗ್ರೀನ್​ಲ್ಯಾಂಡ್​ನ ಹಿಮಪದರ ಭಾರೀ ಪ್ರಮಾಣದಲ್ಲಿ ಕರಗಿದೆ.

ಗ್ರೀನ್​ಲ್ಯಾಂಡ್, ವಿಶ್ವದ ಅತಿದೊಡ್ಡ ದ್ವೀಪರಾಷ್ಟ್ರ. ಇದು ಅಟ್ಲಾಂಟಿಕ್ ಮತ್ತು ಆರ್ಕಟಿಕ್​ ಸಾಗರಗಳ ನಡುವೆ ಇದೆ. ಈ ದ್ವೀಪದ ಮೇಲ್ಪದರದ 82 ಶೇ. ಭಾಗ ಹಿಮದಿಂದಲೇ ತುಂಬಿದೆ. ಸದ್ಯ ಗ್ರೀನ್​ಲ್ಯಾಂಡ್ ಹಾಗೂ ಸುತ್ತಮುತ್ತಲ ರಾಷ್ಟ್ರಗಳಲ್ಲಿ ಜೋರಾಗಿ ಬೀಸುತ್ತಿರುವ ಬಿಸಿಗಾಳಿಯಿಂದಾಗಿ ಭಾರೀ ಪ್ರಮಾಣದಲ್ಲಿ ಹಿಮಪದರ ಕರಗಿ ನೀರಾಗುತ್ತಿದೆ.

ದಿನದಿಂದ ದಿನಕ್ಕೆ ಹಿಮಪದರ ಕರಗುವಿಕೆಯ ಪ್ರಮಾಣ ಹೆಚ್ಚಾಗುತ್ತಿದ್ದು, ಈ ವರ್ಷ ಶೇ. 56.5 ರಷ್ಟು ದಾಖಲೆಯ ಕರಗುವಿಕೆ ದಾಖಲಾಗಿದೆ. ಕಳೆದ ಬುಧವಾರ ಒಂದರಲ್ಲೇ ಸುಮಾರು ಒಂದು ಸಾವಿರ ಕೋಟಿ ಟನ್​ನಷ್ಟು ಮಂಜು ಕರಗಿ ನೀರಾಗಿ ಹೋಗಿದೆ. ಅಲ್ಲದೆ ಕಳೆದ ಜುಲೈನಿಂದ 19700 ಕೋಟಿ ಟನ್​ನಷ್ಟು ಹಿಮ ಕರಗಿ ನೀರಾಗಿದೆ ಎಂದು ಡ್ಯಾನಿಶ್ ಹವಾಮಾನ ಸಂಸ್ಥೆಯ ಹವಾಮಾನ ವಿಜ್ಞಾನಿ ರುತ್ ಮೊಟ್ರಾಮ್ ಹೇಳಿದ್ದಾರೆ.

ಇದೇ ರೀತಿಯ ವಾತಾವರಣ ಇನ್ನೂ ಮುಂದುವರಿಯುವ ಸಾಧ್ಯತೆಯಿದ್ದು, ಹಿಮಪದರದ ಕರಗುವಿಕೆ ಇದೇ ರೀತಿ ಮುಂದುವರಿಯಲಿದೆ ಎಂದು ರುತ್ ಮೊಟ್ರಾಮ್ ತಿಳಿಸಿದ್ದಾರೆ.