ಕಾಬೂಲ್‌ನಲ್ಲಿ 20 ವರ್ಷಗಳ ಯುಕೆ ಕಾರ್ಯಾಚರಣೆ ಅಂತ್ಯ: ತವರಿಗೆ ಮರಳಿದ ಕೊನೆಯ ವಿಮಾನ

ಅಫ್ಘಾನಿಸ್ಥಾನದಲ್ಲಿ ತಾಲಿಬಾನ್​ ಹಾಗೂ ಐಸಿಸ್​ ಉಗ್ರರ ದುಷ್ಕೃತ್ಯಗಳು ಮುಂದುವರಿದಿವೆ. ಈ ಮಧ್ಯೆ ಯುಕೆ(ಯುನೈಟೆಡ್ ಕಿಂಗ್‌ಡಂ) ಸೇನೆ ತನ್ನ ಕಾರ್ಯಾಚರಣೆ ಅಂತ್ಯಗೊಳಿಸಿ ತಾಯ್ನಾಡಿಗೆ ವಾಪಸಾಗಿದೆ. 1,000 ಜನರನ್ನು ಹೊತ್ತ ಕೊನೆಯ ವಿಮಾನ ಕಾಬೂಲ್​ನಿಂದ ತವರಿಗೆ ಮರಳಿತು.

ಲಂಡನ್ (ಯು.ಕೆ):ಎರಡು ದಶಕಗಳ ಸೇನಾ ಕಾರ್ಯಚರಣೆಯ ಬಳಿಕ ಅಫ್ಘನ್ ನೆಲದಿಂದ ಯುಕೆ ಸೇನೆಯು ತವರಿಗೆ ಮರಳಿತು. ಈ ಬಗ್ಗೆ ಪ್ರಧಾನಿ ಬೋರಿಸ್​​ ಜಾನ್ಸನ್ ಪ್ರತಿಕ್ರಿಯಿಸಿದ್ದು, ಎಲ್ಲಾ ನಾಗರಿಕರನ್ನು ಅಲ್ಲಿಂದ ಕರೆತರಲು ಸಾಧ್ಯವಾಗಿಲ್ಲ ಎಂದು ವಿಷಾದ ವ್ಯಕ್ತಪಡಿಸಿದ್ದಾರೆ.

ಅಫ್ಘನ್ ನೆಲದಿಂದ ಯುಕೆಯ ಕೊನೆಯ ಏರ್​ಲಿಫ್ಟ್ ನಡೆದಿದ್ದು, ವಿಮಾನದಲ್ಲಿ ಸಾವಿರ ಮಂದಿ ಸ್ವದೇಶಕ್ಕೆ ಮರಳಿದ್ದಾರೆ. ಈ ವಿಮಾನದಲ್ಲಿ ಯುಕೆ ಹಾಗೂ ಅಫ್ಘನ್ ಪ್ರಜೆಗಳಿದ್ದಾರೆ ಎಂದು ಅಫ್ಘನ್​​​ನಲ್ಲಿರುವ ಯುಕೆ ರಾಯಭಾರಿ ಲೌರಿ ಬ್ರಿಸ್ಟೋ ತಿಳಿಸಿದರು. ಈ ಕಾರ್ಯಾಚರಣೆ ಇಲ್ಲಿಗೆ ಕೊನೆಯಾಗುತ್ತಿದೆ ಎಂದು ಕಾಬೂಲ್ ವಿಮಾನ ನಿಲ್ದಾಣದಲ್ಲಿ ತಾಯ್ನಾಡಿಗೆ ಮರಳುವ ಮುನ್ನ ಅವರು ಹೇಳಿದ್ದಾರೆ.

ಆದರೆ ಇಲ್ಲಿಂದ ಬೇರೆಡೆ ತೆರಳಲು ಸಿದ್ಧರಿರುವವರನ್ನು ನಾವೆಂದೂ ಮರೆಯುವುದಿಲ್ಲ. ಅವರಿಗೆ ಬೇಕಾದ ಸಹಾಯವನ್ನು ನಾವು ಮಾಡುತ್ತೇವೆ. ಅಫ್ಘನ್​ನಲ್ಲಿರುವ ಧೈರ್ಯವಂತ ಹಾಗೂ ಶಾಂತಿಯುತ ಪ್ರಜೆಗಳನ್ನು ನಾವು ಮರೆಯುವುದಿಲ್ಲ. ಅವರು ಸುರಕ್ಷಿತ ಹಾಗೂ ಶಾಂತಿಯಿಂದ ಬದುಕಲು ಅರ್ಹರಾಗಿದ್ದಾರೆ. ಕಳೆದೊಂದು ವಾರದಿಂದ ಕಾಬೂಲ್ ವಿಮಾನ ನಿಲ್ದಾಣದಿಂದ ಸುಮಾರು 15 ಸಾವಿರಕ್ಕೂ ಅಧಿಕ ಜನರನ್ನು ಸ್ಥಳಾಂತರಿಸಲಾಗಿದೆ.

ಇದನ್ನೂ ಓದಿ:ಇಸ್ರೇಲ್ ಸೈನಿಕರು, ಪ್ಯಾಲೆಸ್ತೀನ್‌ ಪ್ರತಿಭಟನಾಕಾರರ ನಡುವೆ ಮತ್ತೆ ಘರ್ಷಣೆ: 7 ಮಂದಿಗೆ ಗಾಯ