ಸ್ಯಾಂಡಲ್ವುಡ್ನ ರಾಕಿಂಗ್ ಸ್ಟಾರ್ ಯಶ್ ಜನ್ಮದಿನಾಚರಣೆಗೆ ಕ್ಷಣಗಣನೆ ಆರಂಭವಾಗಿದೆ. ನಾಳೆ 38ನೇ ವಸಂತಕ್ಕೆ ಕಾಲಿಡಲಿದ್ದಾರೆ ಕೆಜಿಎಫ್ ಸ್ಟಾರ್. ಅಪಾರ ಸಂಖ್ಯೆಯ ಅಭಿಮಾನಿಗಳು ತಮ್ಮ ಮೆಚ್ಚಿನ ನಟನ ಜನ್ಮದಿನವನ್ನು ವಿಶೇಷವಾಗಿ ಆಚರಿಸಲು ಸಜ್ಜಾಗಿದ್ದಾರೆ. ಜೊತೆಗೆ ಬರ್ತ್ಡೇ ಸ್ಪೆಷಲ್ ಆಗಿ 'ಟಾಕ್ಸಿಕ್' ಸಿನಿಮಾದ ಅಪ್ಡೇಟ್ಸ್ ಸಿಗಬಹುದೆಂಬ ನಿರೀಕ್ಷೆಯಲ್ಲಿ ಅಭಿಮಾನಿಗಳಿದ್ದಾರೆ.
ಮುಂದಿನ ಸಿನಿಮಾ ಮೇಲೆ ಸಾಕಷ್ಟು ನಿರೀಕ್ಷೆ:'ಸ್ವಯಂ ನಿರ್ಮಿತ ನಟ' ಎಂದೇ ಗುರುತಿಸಿಕೊಂಡಿರುವ ಯಶ್ ನಾಯಕ ನಟನಾಗಿ ಅಭಿನಯಿಸಿದ ಚಿತ್ರಗಳು ಕೇವಲ 18. ಕೊನೆಯ ಎರಡು ಚಿತ್ರಗಳಾದ ಕೆಜಿಎಫ್ 1, ಕೆಜಿಎಫ್ 2 ಮೂಲಕ ತಮ್ಮ ಜನಪ್ರಿಯತೆಯನ್ನು ಸಾಕಷ್ಟು ಹೆಚ್ಚಿಸಿಕೊಂಡಿದ್ದಾರೆ. ಅಭಿಮಾನಿಗಳು, ಸಿನಿಪ್ರಿಯರು ಮಾತ್ರವಲ್ಲದೇ ಇಡೀ ಭಾರತೀಯ ಚಿತ್ರರಂಗದ ಖ್ಯಾತನಾಮರು ಕನ್ನಡ ನಟನ ಬಗ್ಗೆ ಮಾತನಾಡುವಂತಾಯ್ತು. ಇವರ ಅಮೋಘ ಅಭಿನಯಕ್ಕೆ ಚಿತ್ರರಂಗದವರಿಂದಲೂ ಮೆಚ್ಚುಗೆ ವ್ಯಕ್ತವಾಗಿದೆ. ಹಾಗಾಗಿ ನಟನ ಮುಂದಿನ ಸಿನಿಮಾ ಮೇಲೆ ಸಾಕಷ್ಟು ನಿರೀಕ್ಷೆಗಳಿವೆ.
'ಯಶ್ 19'..ಕೆಜಿಎಫ್ 2 ಬ್ಲಾಕ್ಬಸ್ಟರ್ ಹಿಟ್ ಆದ ಬಳಿಕ ನಟನ ಯಾವುದೇ ಸಿನಿಮಾ ಘೋಷಣೆ ಆಗಿರಲಿಲ್ಲ. 2022ರ ಏಪ್ರಿಲ್ನಲ್ಲಿ ಕೆಜಿಎಫ್ 2 ತೆರೆಕಂಡು ಚಿತ್ರಮಂದಿರಗಳಲ್ಲಿ ಧೂಳೆಬ್ಬಿಸಿದ ಹಿನ್ನೆಲೆ ಮುಂದಿನ ಸಿನಿಮಾ ಘೋಷಣೆಗೆ ಸಿನಿಪ್ರಿಯರು ಕಾತರರಾಗಿದ್ದರು. ಆದ್ರೆ ಒಂದೂವರೆ ವರ್ಷ ಕಳೆದರೂ ಯಾವುದೇ ಸುದ್ದಿ ಇರಲಿಲ್ಲ. ಅಂತಿಮವಾಗಿ 2023ರ ಡಿಸೆಂಬರ್ 8ರಂದು 'ಯಶ್ 19' ಘೋಷಣೆಯಾಯ್ತು. ಸಣ್ಣ ಗ್ಲಿಂಪ್ಸ್ ಮೂಲಕ ಶೀರ್ಷಿಕೆ ಅನಾವರಣಗೊಳಿಸಲಾಯ್ತು. ವಿಡಿಯೋ ನೋಡಿದ ಯಶ್ ಕಟ್ಟಾ ಅಭಿಮಾನಿಗಳು ಸಂತಸದಿಂದ ಕುಣಿದಿದ್ದರು.
ಟಾಕ್ಸಿಕ್ ಅಪ್ಡೇಟ್ಸ್?'ಟಾಕ್ಸಿಕ್' ಶೀರ್ಷಿಕೆಯ 'ಯಶ್ 19' ಸಿನಿಮಾವನ್ನು ಹೆಸರಾಂತ ನಿರ್ದೇಶಕರಾದ ಗೀತು ಮೋಹನ್ ದಾಸ್ ನಿರ್ದೇಶಿಸಲಿದ್ದಾರೆ. ಜನಪ್ರಿಯ ಚಲನಚಿತ್ರ ನಿರ್ಮಾಣ ಸಂಸ್ಥೆಯಾಗಿರುವ ಕೆವಿಎನ್ ಪ್ರೊಡಕ್ಷನ್ಸ್ ಅಡಿ ವೆಂಕಟ್ ಕೆ ನಾರಾಯಣ ಅವರು ಬಂಡವಾಳ ಹೂಡಲಿದ್ದಾರೆ. ಶೀಘ್ರದಲ್ಲೇ ಶೂಟಿಂಗ್ ಪ್ರಾರಂಭವಾಗುವ ನಿರೀಕ್ಷೆ ಇದೆ. 2025ರ ಏಪ್ರಿಲ್ 10ರಂದು ಟಾಕ್ಸಿಕ್ ತೆರೆಗಪ್ಪಳಿಸಲಿದೆ. ನಾಳೆ ನಟನ ಜನ್ಮದಿನ ಹಿನ್ನೆಲೆ ಈ ಚಿತ್ರದ ಅಪ್ಡೇಟ್ಸ್ ಬರಬಹುದೆಂಬ ನಿರೀಕ್ಷೆ ಅಭಿಮಾನಿಗಳದ್ದು. ಕರೀನಾ ಕಪೂರ್ ಖಾನ್ ಚಿತ್ರದ ನಾಯಕಿ ಎಂದು ಹೇಳಲಾಗುತ್ತಿದೆ. ಎಲ್ಲದಕ್ಕೂ ಚಿತ್ರತಂಡ ಶೀಘ್ರವೇ ಅಧಿಕೃತ ಮಾಹಿತಿ ಕೊಡಲಿದೆ.
ಜನ್ಮದಿನದಂದು ಅಭಿಮಾನಿಗಳಿಗೆ ಯಶ್ ಸಿಗುವುದಿಲ್ಲ:ಹೆಸರಾಂತ ನಟರನ್ನು, ತಮ್ಮ ಮೆಚ್ಚಿನ ನಟರನ್ನು ನೋಡುವ ಕಾತರ ಅಪಾರ ಸಂಖ್ಯೆಯ ಅಭಿಮಾನಿಗಳದ್ದಾಗಿರುತ್ತದೆ. ವಿಶೇಷವಾಗಿ ಅವರ ಜನ್ಮದಿನದಂದು ಈ ಭೇಟಿ ಸಾಧ್ಯವಾಗುತ್ತದೆ. ಆದ್ರೆ ಸೋಮವಾರ ಯಶ್ ಅವರು ಅಭಿಮಾನಿಗಳಿಗೆ ಸಿಗುತ್ತಿಲ್ಲ. ಬಿಡುವಿಲ್ಲದ ಕೆಲಸದ ಹಿನ್ನೆಲೆ ಪ್ರಯಾಣ ಮಾಡಬೇಕಿರುವುದರಿಂದ ಜನವರಿ 8ರಂದು ನಿಮಗೆ ಸಿಗಲು ಆಗುತ್ತಿಲ್ಲ ಎಂದು ಈಗಾಗಲೇ ಸೊಷಿಯಲ್ ಮೀಡಿಯಾ ಪೋಸ್ಟ್ ಮೂಲಕ ಯಶ್ ತಿಳಿಸಿದ್ದಾರೆ.
ಯಶ್ ಬರ್ತ್ಡೇ ಕಾಮನ್ ಡಿಪಿ: ಯಶ್ ಜನ್ಮದಿನದ ಸಲುವಾಗಿ ಈಗಾಗಲೇ 'ಯಶ್ ಬರ್ತ್ಡೇ ಸಿಡಿಪಿ' ಅನಾವರಣಗೊಂಡಿದೆ. ಈ ಕಾಮನ್ ಡಿಪಿ ಅನಾವರಣಗೊಳಿಸಿದ್ದು ಬೇರೆ ಯಾರೂ ಅಲ್ಲ. ಕನ್ನಡದ ಹೆಸರಾಂತ ನಟ ಶಿವ ರಾಜ್ಕುಮಾರ್. ಹೌದು, ಜನವರಿ 5ರಂದು ತಮ್ಮ ಅಧಿಕೃತ ಸಾಮಾಜಿಕ ಜಾಲತಾಣ ಖಾತೆಗಳಲ್ಲಿ ಡಿಪಿ ಬಿಡುಗಡೆ ಮಾಡಿದ್ದ ಶಿವಣ್ಣ ''ಯಶ್ ಮತ್ತು ಅವರ ಎಲ್ಲಾ ಅಭಿಮಾನಿಗಳಿಗೂ ಶುಭಾಶಯಗಳು. ಸಿಡಿಪಿ ಬಹಳ ಚೆನ್ನಾಗಿದೆ. ಯಶ್ ಬರ್ತ್ಡೇಯ ಕಾಮನ್ ಡಿಪಿ ಅನಾವರಣಗೊಳಿಸಲು ಸಂತೋಷವಾಗಿದೆ'' ಎಂದು ಬರೆದುಕೊಂಡಿದ್ದರು.
