ಬುಧವಾರದಂದು ನಟ ನಾನಾ ಪಾಟೇಕರ್ ಅವರ ವಿಡಿಯೋವೊಂದು ವೈರಲ್ ಆಗಿ ಸಾಕಷ್ಟು ಟೀಕೆಗೆ ಗುರಿಯಾಗಿತ್ತು. ಇತ್ತೀಚೆಗೆ ತಮ್ಮೊಂದಿಗೆ ಸೆಲ್ಫಿ ಕ್ಲಿಕ್ಕಿಸಿಕೊಳ್ಳಲು ಮುಂದಾದ ಅಭಿಮಾನಿಗೆ ಹೊಡೆದಿದ್ದಾರೆನ್ನಲಾದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿ, ಮಿಶ್ರ ಪ್ರತಿಕ್ರಿಯೆ ಸ್ವೀಕರಿಸಿತ್ತು.
ವೈರಲ್ ವಿಡಿಯೋದಲ್ಲೇನಿತ್ತು? ಬ್ರೌನ್ ಕೋಟ್, ಹ್ಯಾಟ್ ಧರಿಸಿ ಜನಸಮೂಹದ ನಡುವೆ ನಿಂತಿದ್ದ ನಾನಾ ಪಾಟೇಕರ್ ಅವರ ವಿಡಿಯೋ ಬುಧವಾರ ಆನ್ಲೈನ್ನಲ್ಲಿ ಶರವೇಗದಲ್ಲಿ ವೈರಲ್ ಆಗಿತ್ತು. ಅಭಿಮಾನಿಯೋರ್ವರು ಹಿಂಬದಿಯಿಂದ ಬಂದು ಹಿರಿಯ ನಟನೊಂದಿಗೆ ಸೆಲ್ಫಿ ಕ್ಲಿಕ್ಕಿಸಿಕೊಳ್ಳಲು ಮುಂದಾಗಿದ್ದಾರೆ. ಆ ವೇಳೆ ನಟ ಅಭಿಮಾನಿಯ ತಲೆಯ ಹಿಂಭಾಗಕ್ಕೆ ಹೊಡೆದಿದ್ದಾರೆ. ನಟನ ಪಕ್ಕದಲ್ಲಿ ನಿಂತಿದ್ದ ಇತರೆ ಸಿಬ್ಬಂದಿ ಕೂಡ ಆ ಹುಡುಗನ ಕತ್ತು ಹಿಡಿದು ಸೆಟ್‌ನಿಂದ ಹೊರಹೋಗುವಂತೆ ಮಾಡುತ್ತಾರೆ. ಈ ವಿಡಿಯೋ ವೈರಲ್ ಆಗಿ, ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಫೈನಲಿ ಹಿರಿಯ ನಟ ಘಟನೆ ಬಗ್ಗೆ ಮೌನ ಮುರಿದಿದ್ದಾರೆ. ವೈರಲ್ ವಿಡಿಯೋಗೆ ಪ್ರತಿಕ್ರಿಯಿಸಿ "ಬೈ ಮಿಸ್ಟೇಕ್ ಹೀಗಾಗಿದೆ" ಎಂದು ತಿಳಿಸಿದ್ದಾರೆ. ಸೋಷಿಯಲ್ ಮೀಡಿಯಾ ಪ್ಲಾಟ್ಫಾರ್ಮ್ ಎಕ್ಸ್ನಲ್ಲಿ ವಿಡಿಯೋ ಸಂದೇಶದ ಮೂಲಕ ನಡೆದ ಅಸಲಿ ವಿಚಾರವನ್ನು ಬಹಿರಂಗಪಡಿಸಿದ್ದಾರೆ.
ನಾನಾ ಪಾಟೇಕರ್ ಪ್ರತಿಕ್ರಿಯೆ:ಟ್ವಿಟರ್ ಮೂಲಕ ನಟ ನಾನಾ ಪಾಟೇಕರ್ ಪ್ರತಿಕ್ರಿಯಿಸಿ, "ನಾನು ಆ ಹುಡುಗನಿಗೆ ಹೊಡೆದ ವಿಡಿಯೋ ವೈರಲ್ ಆಗುತ್ತಿದೆ. ಈ ಸೀಕ್ವೆನ್ಸ್ ನಮ್ಮ ಚಿತ್ರದ ಒಂದು ಭಾಗ. ನಾವು ಆ ದೃಶ್ಯದ ರಿಹರ್ಸಲ್ (ಪೂರ್ವಾಭ್ಯಾಸ) ಮಾಡಿದ್ದೆವು. ನಮಗೆ ಎರಡನೇ ಬಾರಿ ರಿಹರ್ಸಲ್ ನಡೆಸಲು ಹೇಳಲಾಯಿತು. ನಿರ್ದೇಶಕರು ನನಗೆ ಶುರು ಮಾಡುವಂತೆ ಹೇಳಿದರು. ಹುಡುಗ ಬಂದಾಗ ನಮ್ಮ ಸೀಕ್ವೆನ್ಸ್ ಪ್ರಾರಂಭವಾಗುತ್ತದೆ. ಆದ್ರೆ ಆ ಹುಡುಗ (ವೈರಲ್ ವಿಡಿಯೋದಲ್ಲಿರುವವರು) ಯಾರೆಂದು ನನಗೆ ತಿಳಿದಿರಲಿಲ್ಲ. ಅವನು ನಮ್ಮ ಸಿಬ್ಬಂದಿಯಲ್ಲಿ ಒಬ್ಬ ಎಂದು ಭಾವಿಸಿದೆ. ಹಾಗಾಗಿ ನಾನು ಸ್ಕ್ರಿಪ್ಟ್ ಪ್ರಕಾರ ಅವನಿಗೆ ಹೊಡೆದೆ. ನಂತರ, ಆ ಹುಡುಗ ನಮ್ಮ ಚಿತ್ರತಂಡದವನಲ್ಲ ಎಂಬುದು ತಿಳಿಯಿತು. ಹಾಗಾಗಿ ನಾನು ಅವನನ್ನು ಮಾತನಾಡಿಸಲು ನೋಡಿದೆ, ಆದರೆ ಅವನು ಓಡಿಹೋದ. ಬಹುಶಃ ಅವನ ಸ್ನೇಹಿತ ಈ ವಿಡಿಯೋವನ್ನು ಶೂಟ್ ಮಾಡಿರಬಹುದು. ನಾನು ಯಾರೊಂದಿಗೂ ಫೋಟೋ ಕ್ಲಿಕ್ಕಿಸಿಕೊಳ್ಳುವುದು ಬೇಡ ಎಂದು ಹೇಳಿಲ್ಲ. ನಾನೀಗೆ ಮಾಡುವುದೂ ಇಲ್ಲ. ಬೈ ಮಿಸ್ಟೇಕ್ ಹೀಗಾಗಿದೆ. ಏನಾದರೂ ಮಿಸ್ ಅಂಡರ್ಸ್ಟ್ಯಾಂಡ್ ಆಗಿದ್ದರೆ ದಯವಿಟ್ಟು ನನ್ನನ್ನು ಕ್ಷಮಿಸಿ. ನಾನಿನ್ನು ಈ ರೀತಿ ಮಾಡುವುದಿಲ್ಲ" ಎಂದು ತಿಳಿಸಿದ್ದಾರೆ.