ನಟಿ ಅನುಷ್ಕಾ ಶೆಟ್ಟಿ ಬೆಳ್ಳಿತೆರೆಯಲ್ಲಿ ಕಾಣಿಸಿಕೊಂಡು ಸುಮಾರು ಐದು ವರ್ಷಗಳು ಕಳೆದಿವೆ. ದೊಡ್ಡ ಗ್ಯಾಪ್‌ನ ನಂತರ ಇದೀಗ 'ಮಿಸ್ ಶೆಟ್ಟಿ ಮಿಸ್ಟರ್ ಪೋಲಿಶೆಟ್ಟಿ' ಚಿತ್ರದೊಂದಿಗೆ ಪ್ರೇಕ್ಷಕರನ್ನು ರಂಜಿಸಲು ಸಜ್ಜಾಗಿದ್ದಾರೆ. ಜಾತಿ ರತ್ನಲು ಜನಪ್ರಿಯತೆಯ ಯುವ ನಟ ನವೀನ್ ಪೋಲಿಶೆಟ್ಟಿ ಜೊತೆ ಅವರು ನಾಯಕಿಯಾಗಿ ನಟಿಸುತ್ತಿದ್ದಾರೆ.
ರೊಮ್ಯಾಂಟಿಕ್ ಮತ್ತು ಕಾಮಿಡಿ ಎಂಟರ್ಟೈನರ್ ಸಿನಿಮಾ ಇದಾಗಿದೆ. ಮಹೇಶ್ ಬಾಬು ಪಿ ನಿರ್ದೇಶಿಸಿದ್ದಾರೆ. ಯುವಿ ಕ್ರಿಯೇಷನ್ಸ್ ಬ್ಯಾನರ್ ಅಡಿಯಲ್ಲಿ ವಂಶಿ ಪ್ರಮೋದ್ ನಿರ್ಮಾಣ ಮಾಡುತ್ತಿದ್ದಾರೆ. ಬಹುತೇಕ ಚಿತ್ರೀಕರಣ ಪೂರ್ಣಗೊಂಡಿದ್ದು ಟೀಸರ್ ಅನ್ನು ಶನಿವಾರ ನಿರ್ಮಾಪಕರು ಬಿಡುಗಡೆ ಮಾಡಿದ್ದಾರೆ.
ನವೀನ್ ಪೋಲಿಶೆಟ್ಟಿ ಅವರು ಸಿದ್ದು ಪೋಲಿಶೆಟ್ಟಿ ಎಂಬ ಪಾತ್ರದಲ್ಲಿ ಸ್ಟ್ಯಾಂಡ್‌ಅಪ್ ಕಾಮಿಡಿಯನ್ ಆಗಿ ನಟಿಸಿದ್ದಾರೆ. ಅನುಷ್ಕಾ ಶೆಟ್ಟಿ ಅವರು ಅನ್ವಿತಾ ರವಳಿಶೆಟ್ಟಿಯಾಗಿ ಶೆಫ್ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಇಬ್ಬರ ನಡುವಿನ ಕಾಮಿಡಿ ಕೆಮಿಸ್ಟ್ರಿ ಆಕರ್ಷಕವಾಗಿದೆ ಎಂದು ಚಿತ್ರತಂಡ ಹೇಳುತ್ತಿದೆ. ರಾಧನ್ ಸಂಗೀತ ಸಂಯೋಜಿಸುತ್ತಿದ್ದಾರೆ.
ಟೀಸರ್ನಲ್ಲಿ ಅನುಷ್ಕಾ ಶೆಟ್ಟಿ ಬಾಣಸಿಗರಾಗಿ ಕಾಣಿಸಿಕೊಂಡಿದ್ದು, ಪ್ರಾಕ್ಟಿಕಲ್ ಆಗಿ ಯೋಚಿಸುವ ಮಹಿಳೆ ಪಾತ್ರ ನಿಭಾಯಿಸಿದ್ದಾರೆ. 'ಆಹಾರ ಅಂದ್ರೆ ಮ್ಯಾಜಿಕ್ ಅಲ್ಲ ಸೈನ್ಸ್' ಅನ್ನೋ ಅನುಷ್ಕಾ ಡೈಲಾಗ್ನೊಂದಿಗೆ ಟೀಸರ್ ಪ್ರಾರಂಭವಾಗುತ್ತದೆ. ನಂತರ, ‘ನನ್ನ ಮಗಳು ಸಾಮಾನ್ಯ ಅಂದುಕೊಂಡಿದ್ದೀಯಾ.. ಅವಳು ಯಾವತ್ತೂ ಮದುವೆ ಆಗಲ್ಲ’ ಎಂದು ಅನುಷ್ಕಾ ತಾಯಿ ಎಂದು ಜಯಸುಧಾ ಹೇಳಿದ ಡೈಲಾಗ್ ಕುತೂಹಲ ಹೆಚ್ಚಿಸುತ್ತದೆ.