ಬಾಲಿವುಡ್ ಸ್ಟಾರ್ ಸಿಂಗರ್ ಅರಿಜಿತ್ ಸಿಂಗ್ (Arijit Singh) ಇತ್ತೀಚೆಗೆ ಮಹಾರಾಷ್ಟ್ರದ ಔರಂಗಾಬಾದ್‌ನಲ್ಲಿ ಲೈವ್ ಸಂಗೀತ ಕಾರ್ಯಕ್ರಮ ನಡೆಸಿಕೊಟ್ಟರು. ಇದರ ಅಂಗವಾಗಿ ಅಭಿಮಾನಿಗಳಿಗಾಗಿ ಹಲವು ಸೂಪರ್ ಹಿಟ್ ಹಾಡುಗಳನ್ನು ಹಾಡಲಾಯಿತು. ಸಾಮಾನ್ಯವಾಗಿ ಸಂಗೀತ ಕಾರ್ಯಕ್ರಮಗಳಲ್ಲಿ ನಡುನಡುವೆ ಅವರು ತಮ್ಮ ಅಭಿಮಾನಿಗಳಿಂದಲೂ ಹಾಡಿಸುತ್ತಾರೆ. ಅದರಂತೆ ಸೋಮವಾರ ನಡೆದ ಮ್ಯೂಸಿಕ್ ಶೋನಲ್ಲಿ ವೇದಿಕೆ ಮೇಲಿಂದಲೇ ಅಭಿಮಾನಿಗಳಿಗೆ ಶುಭಾಶಯ ಕೋರಿದರು.
ಸಂಗೀತ ಮಾಂತ್ರಿಕ ಅರಿಜಿತ್ ಸಿಂಗ್ ಅವರಿಗೆ ಡೊಡ್ಡ ಫ್ಯಾನ್ ಫಾಲೋವಿಂಗ್ ಇದೆ. ತಮ್ಮ ಕಂಠಸಿರಿಯಿಂದಲೇ ಸಿಕ್ಕಾಪಟ್ಟೆ ಜನಪ್ರಿಯತೆ ಜೊತೆಗೆ ಅಭಿಮಾನಿಗಳನ್ನು ಸಂಪಾದಿಸಿದ್ದಾರೆ. ಇವರ ಸಂಗೀತಕ್ಕೆ ಅಭಿಮಾನಿಗಳ ಮಂತ್ರಮುಗ್ಧಗೊಳ್ಳುತ್ತಾರೆ. ಈವರೆಗೆ ಹಲವು ಸೂಪರ್ ಹಿಟ್ ಹಾಡುಗಳನ್ನು ಮನರಂಜನಾ ಕ್ಷೇತ್ರಕ್ಕೆ ಕೊಡುಗೆಯಾಗಿ ನೀಡಿದ್ದಾರೆ. ಸಿನಿಮಾ ಮಾತ್ರವಲ್ಲದೇ ದೇಶದ ವಿವಿಧೆಡೆ ಲೈವ್ ಮ್ಯೂಸಿಕ್ ಶೋನ ನಡೆಸಿಕೊಡುತ್ತಾರೆ. ಇವರ ಸ್ವರ ಕೇಳಲು ಅಭಿಮಾನಿಗಳ ಸಾಗರ ಬಂದು ಸೇರುತ್ತದೆ. ಅದರಂತೆ ಮಹಾರಾಷ್ಟ್ರದ ಔರಂಗಾಬಾದ್‌ನಲ್ಲಿ ಸೋಮವಾರ ಸಂಗೀತ ಕಾರ್ಯಕ್ರಮ ನೀಡಿದ್ದರು.
ಈ ಕಾರ್ಯಕ್ರಮದಲ್ಲಿ ಮಹಿಳಾ ಅಭಿಮಾನಿಯೊಬ್ಬರು ಸ್ಟಾರ್ ಸಿಂಗರ್ ಅರಿಜಿತ್ ಸಿಂಗ್ ಅವರ ಕೈ ಕುಲುಕಲು ಯತ್ನಿಸಿದರು. ಅಭಿಮಾನಿ ಪ್ರೀತಿಗೆ ಗಾಯಕ ಕೂಡ ಸ್ಪಂದಿಸಿದರು. ಉತ್ಸುಕರಾದ ಅಭಿಮಾನಿ ಅರಿಜಿತ್ ಸಿಂಗ್ ಅವರ ಕೈಯನ್ನು ಬಿಗಿಯಾಗಿ ಹಿಡಿದಿದ್ದಾರೆ. ಅಭಿಮಾನಿಯ ಉತ್ಸಾಹಕ್ಕೆ ಗಾಯಕ ನಿಯಂತ್ರಣ ಕಳೆದುಕೊಳ್ಳಲಿದ್ದರು. ಅವರ ಕೈಗೆ ಗಾಯವಾಗಿದೆ. ಫ್ಯಾನ್ ಗಾಯಕನ ಕೈಯನ್ನು ಬಲವಾಗಿ ಎಳೆದಿದ್ದರಿಂದ ಕೈ ಉಳುಕಿದೆ ಎಂದು ವರದಿಯಾಗಿದೆ.