'ಲಾಲ್ ಸಿಂಗ್ ಚಡ್ಡಾ' (Laal Singh Chaddha) ಸಿನಿಮಾದಲ್ಲಿ ಕೊನೆಯದಾಗಿ ಕಾಣಿಸಿಕೊಂಡಿದ್ದ ಬಾಲಿವುಡ್ ಸೂಪರ್‌ ಸ್ಟಾರ್ ಅಮೀರ್ ಖಾನ್ ಅವರು 'ಕ್ಯಾರಿ ಆನ್ ಜಟ್ಟಾ 3' (Carry On Jatta 3) ಟ್ರೇಲರ್ ಬಿಡುಗಡೆ ಸಮಾರಂಭದಲ್ಲಿ ಭಾಗವಹಿಸಿ ಗಮನ ಸೆಳೆದರು. ಅಮೀರ್ ಖಾನ್ ಈ ಮೊದಲೇ ತಿಳಿಸಿದಂತೆ ಸಿನಿಮಾ ವೃತ್ತಿಜೀವನದಿಂದ ಕೊಂಚ ಬ್ರೇಕ್ ಪಡೆಯುವ ಬಗ್ಗೆ ಚರ್ಚಿಸಿದರು ಮತ್ತು ಪ್ರಸ್ತುತ ತಮ್ಮ ಕುಟುಂಬದೊಂದಿಗೆ ಸಮಯ ಕಳೆಯುತ್ತಿರುವುದಾಗಿ ಈ ಕಾರ್ಯಕ್ರಮದಲ್ಲಿ ತಿಳಿಸಿದರು.
'ಭಾವನಾತ್ಮಕವಾಗಿ ಸಿದ್ಧರಾಗಬೇಕು'....:ಅಮೀರ್ ಖಾನ್ ಸದ್ಯ ತಾವು ರಜೆಯಲ್ಲಿರುವುದಾಗಿ ಮತ್ತು ಕುಟುಂಬದೊಂದಿಗೆ ಸಮಯ ಕಳೆಯುವ ಮೂಲಕ ಈ ಸಮಯವನ್ನು ಸದುಪಯೋಗ ಮಾಡಿಕೊಳ್ಳುತ್ತಿರುವುದಾಗಿ ಹೇಳಿದ್ದಾರೆ. ಅವರು ತಮ್ಮ ಸಿನಿ ವೃತ್ತಿಜೀವನವನ್ನು ಪುನರಾರಂಭಿಸುವ ಮೊದಲು 'ಭಾವನಾತ್ಮಕವಾಗಿ ಸಿದ್ಧರಾಗಬೇಕು' ಎಂದು ಸಹ ಹೇಳಿದ್ದಾರೆ. 'ಕ್ಯಾರಿ ಆನ್ ಜಟ್ಟಾ 3' ಟ್ರೇಲರ್ ಪ್ರೀಮಿಯರ್ ಸಂದರ್ಭದಲ್ಲಿ ಮಾಧ್ಯಮಗಳನ್ನು ಉದ್ದೇಶಿಸಿ ಮಾತನಾಡುವ ವೇಳೆ ಈ ವಿಚಾರಗಳನ್ನು ಹಂಚಿಕೊಂಡರು.
'ಸದ್ಯ ಕುಟುಂಬಕ್ಕೆ ಸಮಯ ಮೀಸಲು'...:ಅವರ ಮುಂದಿನ ಯೋಜನೆಗಳ ಕುರಿತು ಕೇಳಿದಾಗ, ಅಮೀರ್ ಅವರು ಬೆಂಬಲಿಸಲು ಬಂದಿರುವ ಪಂಜಾಬಿ ಚಿತ್ರದ (Carry On Jatta 3) ಮೇಲೆ ಗಮನ ಕೇಂದ್ರೀಕರಿಸಲು ಎಲ್ಲರಿಗೂ ಸಲಹೆ ನೀಡಿದರು. "ನೀವೆಲ್ಲರೂ ಕುತೂಹಲದಿಂದಿರಬೇಕು" ಎಂದು ಹೇಳಿದರು. "ನಾನು ನಿಮಗೆ ಶೀಘ್ರ ಉತ್ತರವನ್ನು ನೀಡಲು ಬಿಡಿ, ನನ್ನ ಮುಂದಿನ ಯೋಜನೆ ಸಂಬಂಧ ನಾನು ಇನ್ನೂ ನಿರ್ಧರಿಸಿಲ್ಲ. ಸದ್ಯ ನಾನು ನನ್ನ ಕುಟುಂಬದೊಂದಿಗೆ ಸಮಯ ಕಳೆಯಲು ಬಯಸುತ್ತೇನೆ. ನಾನು ಅದರ ಬಗ್ಗೆ ಉತ್ಸುಕನಾಗಿದ್ದೇನೆ. ನಾನು ಸದ್ಯ ಮಾಡಲು ಬಯಸಿದ್ದು ಅದನ್ನೇ. ಭಾವನಾತ್ಮಕವಾಗಿ ಸಿದ್ಧವಾದಾಗ ನಾನು ಸಿನಿಮಾ ಮಾಡುತ್ತೇನೆ" ಎಂದು ಉತ್ತರಿಸಿದರು.