ಮೈಸೂರು: ನಾಯಕ ಮಯಾಂಕ್ ಅಗರ್ವಾಲ್ ಅವರ ಆಕರ್ಷಕ ಶತಕದ ನೆರವಿನಿಂದ ಬೆಂಗಳೂರು ಬ್ಲಾಸ್ಟರ್ಸ್ ತಂಡ ಮಹಾರಾಜ ಟ್ರೋಫಿಯಲ್ಲಿ ಶಿವಮೊಗ್ಗ ಸ್ಟ್ರೈಕರ್ಸ್ ವಿರುದ್ಧ 9 ವಿಕೆಟ್ ಜಯ ಗಳಿಸಿದೆ. ಮಯಾಂಕ್ ಅಗರ್ವಾಲ್ 49 ಎಸೆತಗಳನ್ನೆದುರಿಸಿ 10 ಬೌಂಡರಿ ಹಾಗೂ 6 ಸಿಕ್ಸರ್ ನೆರವಿನಿಂದ ಅಜೇಯ 102 ರನ್ ಗಳಿಸಿ ಟೂರ್ನಿಯ ಎರಡನೇ ಶತಕ ಗಳಿಸಿದ ಆಟಗಾರರೆನಿಸಿದರು. ಇದಕ್ಕೂ ಮೊದಲು ಗುಲ್ಬರ್ಗ ಪರ ರೋಹನ್ ಪಾಟೀಲ್ ಮೊದಲ ಶತಕ ಗಳಿಸಿದ್ದರು.
ಕೆ.ವಿ. ಅನೀಶ್ ಅಜೇಯ 35 ರನ್ ಗಳಿಸಿ ನಾಯಕ ಮಯಾಂಕ್ಗೆ ಉತ್ತಮ ರೀತಿಯಲ್ಲಿ ಸಾಥ್ ನೀಡಿದರು. ಮಯಾಂಕ್ ಹಾಗೂ ಅನೀಶ್ 107 ರನ್ ಜೊತೆಯಾಟ ಆಡುವುದರೊಂದಿಗೆ ಬೆಂಗಳೂರು ಬ್ಲಾಸ್ಟರ್ಸ್ ಇನ್ನೂ 20 ಎಸೆತ ಬಾಕಿ ಇರುವಾಗಲೇ ಜಯದ ಗುರಿ ತಲುಪಿತು.
174 ರನ್ ಜಯದ ಗುರಿ ಹೊತ್ತ ಬೆಂಗಳೂರು ಬ್ಲಾಸ್ಟರ್ಸ್ ಅಬ್ಬರದ ಆರಂಭ ಕಂಡಿತ್ತು. ನಾಯಕ ಮಯಾಂಕ್ ಅಗರ್ವಾಲ್ ಹಾಗೂ ಎಲ್.ಆರ್. ಚೇತನ್ 5 ಓವರ್ಗಳಲ್ಲಿ 69 ರನ್ ಗಳಿಸಿ ಜಯಕ್ಕೆ ಅಗತ್ಯವಿರುವ ವೇದಿಕೆ ನಿರ್ಮಿಸಿದರು. 15 ಎಸೆತಗಳನ್ನೆದುರಿಸಿ 34 ರನ್ ಗಳಿಸಿ ಆಡುತ್ತಿದ್ದ ಚೇತನ್ ಅವರ ವಿಕೆಟ್ ಪಡೆಯವಲ್ಲಿ ದೇವಯ್ಯ ಯಶಸ್ವಿಯಾದರು. ಚೇತನ್ ಅವರ ಇನ್ನಿಂಗ್ಸ್ನಲ್ಲಿ 4 ಬೌಂಡರಿ ಹಾಗೂ 2 ಸಿಕ್ಸರ್ ಸೇರಿತ್ತು.
ಶಿವಮೊಗ್ಗ ಸ್ಟ್ರೈಕರ್ಸ್ 173: ಬೆಂಗಳೂರು ಬ್ಲಾಸ್ಟರ್ಸ್ ಟಾಸ್ ಗೆದ್ದು ಫೀಲ್ಡಿಂಗ್ ಆಯ್ದುಕೊಂಡಿತು. ರೋಹನ್ ಕದಮ್ ಹಾಗೂ ಬಿ.ಆರ್.ಶರತ್ ಉತ್ತಮ ಬ್ಯಾಟಿಂಗ್ ಪ್ರದರ್ಶಿಸಿ 10.1 ಓವರ್ಗಳಲ್ಲಿ 83 ರನ್ ಗಳಿಸಿರುವಾಗ ಪಂದ್ಯಕ್ಕೆ ಮಳೆ ಅಡ್ಡಿಯಾಯಿತು. ಮಳೆ ನಿಂತ ನಂತರ ಪಂದ್ಯವನ್ನು 19 ಓವರ್ಗಳಿಗೆ ಸೀಮಿತಗೊಳಿಸಲಾಯಿತು. ಬಿ.ಆರ್.ಶರತ್ (51) ಮತ್ತು ರೋಹನ್ ಕದಮ್ (84) 116 ರನ್ ಜೊತೆಯಾಟವಾಡಿದರು.