ಬೆಂಗಳೂರು:ಕೆಪಿಎಲ್ ಬಹುಕೋಟಿ ಬೆಟ್ಟಿಂಗ್ ಪ್ರಕರಣಕ್ಕೆ ಸಂಬಂಧ ಬಳ್ಳಾರಿ ಟಸ್ಕರ್ಸ್ ತಂಡದ ಮಾಲೀಕ ಅರವಿಂದ್ ವೆಂಕಟೇಶ್ ರೆಡ್ಡಿಯನ್ನು ಸಿಸಿಬಿ ಪೊಲೀಸರು ವಿಚಾರಣೆ ನಡೆಸಿದ್ದಾರೆ.
ಈ ಹಿಂದೆ ಬೆಳಗಾವಿ ಪ್ಯಾಂಥರ್ಸ್ ಮಾಲೀಕ ಅಶ್ರಫ್ ಅಲಿ ಥಾರ್ನನ್ನ ಅರೆಸ್ಟ್ ಮಾಡಲಾಗಿತ್ತು. ಹೀಗಾಗಿ ಅಶ್ರಫ್ ಅಲಿ ಜೊತೆ ಸಂಪರ್ಕ ಹೊಂದಿರುವ ಹಾಗೂ ಬೆಟ್ಟಿಂಗ್ ದಂಧೆ ನಡೆಸಿರೋ ಶಂಕೆ ಮೇರೆಗೆ ಅರವಿಂದ್ರನ್ನ ವಿಚಾರಣೆಗೆ ಒಳಪಡಿಸಿದ್ದಾರೆ.
ಈ ಕುರಿತು ಮಾತನಾಡಿದ ಅರವಿಂದ್ ವೆಂಕಟೇಶ್ ರೆಡ್ಡಿ, ಸಿಸಿಬಿ ಅಧಿಕಾರಿಗಳು ನೋಟಿಸ್ ನೀಡಿ ವಿಚಾರಣೆಗೆ ಹಾಜರಾಗುವಂತೆ ಹೇಳಿದ್ದರು. ಅದರಂತೆ ಬಂದು ವಿಚಾರಣೆಯಲ್ಲಿ ಭಾಗಿಯಾಗಿದ್ದೇನೆ. ಕೆಪಿಎಲ್ನಲ್ಲಿ ಫಿಕ್ಸಿಂಗ್ ಯತ್ನ ನಡೆದಿತ್ತು ಎನ್ನಲಾಗಿದೆ. ಈ ವಿಚಾರವಾಗಿ ನನ್ನ ತಂಡದ ಬೌಲರ್ ಭವೇಶ್ ಗುಲ್ಚಾ ಸಿಸಿಬಿಗೆ ದೂರು ನೀಡಿದ್ದರು. ಈಗಾಗಲೇ ಬಂಧಿತನಾದ ಭವೇಶ್ ಭಾಫ್ನ, ಓವರ್ನಲ್ಲಿ ಹೆಚ್ಚು ರನ್ ಪಡೆಯುವಂತೆ ಗುಲ್ಚಾಗೆ ಬೇಡಿಕೆ ಇಟ್ಟಿದ್ದರೆಂದು ಗುಲ್ಚಾ ದೂರು ನೀಡಿದ್ದರು. ಈ ವಿಚಾರವಾಗಿ ನನಗೆ ನೋಟಿಸ್ ನೀಡಿದ್ದರು. ಗುಲ್ಚಾ ಹಾಗೂ ಭಾಫ್ನ ನಡುವಿನ ವಿಚಾರ ನಮಗೆ ಗೊತ್ತಿರಲಿಲ್ಲ. ಟೀಮ್ನ ಕೋಚ್ಗೂ ಈ ವಿಚಾರ ಗೊತ್ತಿರಲಿಲ್ಲ. ಮಾಧ್ಯಮಗಳಲ್ಲಿ ವಿಚಾರ ಪ್ರಸ್ತಾಪವಾದಾಗಲೇ ನನಗೂ ಗೊತ್ತಾಯ್ತು ಎಂದರು.
ಫಿಕ್ಸಿಂಗ್ ವಿಚಾರ ಈಗ ತನಿಖೆ ನಡೆಯುತ್ತಿದ್ದು, ಎಲ್ಲಾ ತಂಡದ ಮಾಲೀಕರನ್ನು ಕರೆಸಲಾಗುತ್ತಿದೆ. ಹಾಗೆ ನಮಗೂ ನೋಟಿಸ್ ನೀಡಿ ವಿಚಾರಣೆಗೆ ಬರುವಂತೆ ಹೇಳಿದ್ದರು. ಈಗ ವಿಚಾರಣೆ ಮುಗಿದಿದೆ, ಲಿಖಿತ ಹೇಳಿಕೆಯನ್ನು ಮತ್ತೆ ಪಡೆಯಲಿದ್ದಾರೆ ಎಂದು ಅರವಿಂದ್ ಹೇಳಿದರು.