ಕೇಂದ್ರ ಸರ್ಕಾರದ ವಿಶೇಷ ಪ್ಯಾಕೇಜ್ ಸುಳ್ಳಿನ ಕಂತೆ: ಕುಮಾರಸ್ವಾಮಿ

ಮಾಜಿ ಸಿಎಂ ಕುಮಾರಸ್ವಾಮಿಯವರು ವಿಧಾನಸೌಧದಲ್ಲಿ ಸುದ್ದಿಗೋಷ್ಠಿ ನಡೆಸಿ ಕೇಂದ್ರ ಸರ್ಕಾರದ ವಿಶೇಷ ಪ್ಯಾಕೇಜ್ ಕುರಿತು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಬೆಂಗಳೂರು: ಕೇಂದ್ರ ಸರ್ಕಾರದ ವಿಶೇಷ ಪ್ಯಾಕೇಜ್ ಸುಳ್ಳಿನ‌ ಕಂತೆಯಾಗಿದ್ದು, ಅದು ಮೂರ್ಖತನದ ಘೋಷಣೆಯಾಗಿದೆ ಎಂದು ಮಾಜಿ ಸಿಎಂ ಕುಮಾರಸ್ವಾಮಿ ಕಿಡಿಕಾರಿದರು.

ವಿಧಾನಸೌಧದಲ್ಲಿ ಸುದ್ದಿಗೋಷ್ಠಿ ಉದ್ದೇಶಿಸಿ ಮಾತನಾಡಿದ ಅವರು, ಇಂತಹ ಕ್ಲಿಷ್ಟ ಸಮಯದಲ್ಲಿ ದೊಡ್ಡ ಮಟ್ಟದ ಪರಿಹಾರ ಸಿಗುತ್ತದೆ ಅಂದುಕೊಂಡಿದ್ದೆ. ಕೇಂದ್ರ ಹಣಕಾಸು ಸಚಿವೆ ಈ ರೀತಿಯ ಪ್ಯಾಕೇಜ್ ಘೋಷಣೆ ಮಾಡ್ತಾರೆ ಅಂತ ಅಂದುಕೊಂಡಿರಲಿಲ್ಲ. ಇದರಿಂದ ನನಗೆ ನಿರಾಶೆಯಾಗಿದೆ ಎಂದರು.

ನಾನು ಟಿವಿ ಸೀರಿಯಲ್ ನೋಡುವ ಥರ ಆರ್ಥಿಕ ಸಚಿವೆಯ ಸರಣಿ ಸುದ್ದಿಗೋಷ್ಠಿಯನ್ನು ನೋಡಿದ್ದೇನೆ. ಈ ಘೋಷಣೆಗಳನ್ನು ಸ್ವೇಚ್ಛಾಚಾರವಾಗಿ ಮಾಡಿದ್ದಾರೆ. ಅದರ ಟೀಕಾಕಾರರನ್ನು ದೇಶದ್ರೋಹ‌ ಮಾಡಿದವರಂತೆ ಬಿಂಬಿಸಲಾಗುತ್ತಿದೆ ಎಂದು ಕಿಡಿ‌ಕಾರಿದರು.

ಹಣಕಾಸು ಸಚಿವೆಗೆ ಪರಿಹಾರ ವೆಚ್ಚ ಮತ್ತು ಅಭಿವೃದ್ಧಿ ವೆಚ್ಚದ ನಡುವೆ ಇರುವ ವ್ಯತ್ಯಾಸವೇ ಗೊತ್ತಿಲ್ಲ. ರಾಜ್ಯಗಳಿಗೆ ಹೇಗೆ ಆರ್ಥಿಕ ನೆರವು ಕೊಡಬೇಕು ಎಂದು ಹಣಕಾಸು ಆಯೋಗ ಶಿಫಾರಸು ಮಾಡಿದೆ. ಆದರೆ ದಿವಾಳಿಯಾಗಿರುವ ರಾಜ್ಯಗಳಿಗೆ ವಿಶೇಷ ಪ್ಯಾಕೇಜ್ ಮೂಲಕ ಯಾವ ರೀತಿ ಹಣ ವರ್ಗಾವಣೆ ಮಾಡುತ್ತಿದ್ದೀರಾ?, ಮೊದಲ ಪ್ಯಾಕೇಜ್ 6.50 ಲಕ್ಷ ಕೋಟಿಯಲ್ಲಿ ಕೇಂದ್ರ ಸರ್ಕಾರದ ಪಾಲು 2,500 ಕೋಟಿ ಮಾತ್ರ. ಅದರಲ್ಲಿ ಕೇಂದ್ರದ ಕೊಡುಗೆ ಏನೂ ಇಲ್ಲ. ಇದರಿಂದ ತಕ್ಷಣ ಆರ್ಥಿಕ ಚೇತರಿಕೆ ಸಾಧ್ಯವಿಲ್ಲ. ಇದು ಸಂಕಷ್ಟದಲ್ಲಿರುವ ಉದ್ಯಮಿಗಳ ನೆರವಿಗೆ ಬರಲ್ಲ ಎಂದು ಆರೋಪಿಸಿದರು.

ಸುಳ್ಳು ಹೇಳಿ ಸರ್ಕಾರ ನಡೆಸಲು ಸಾಧ್ಯವಿಲ್ಲ:

1,600 ಕೋಟಿ ರೂ. ರಾಜ್ಯ ಸರ್ಕಾರದ ಪ್ಯಾಕೇಜ್ ಹೂ ಮುಡಿಸುವ ಪ್ಯಾಕೇಜ್ ಆಗಿದೆ. 7,50,000 ಆಟೋ, ಕಾರು ಚಾಲಕರಿಗೆ ನೀಡಿರುವ ಪ್ಯಾಕೇಜ್ ಸಂಬಂಧ ಬಿಡುಗಡೆಯಾಗಿರುವ ಹಣ 20 ಕೋಟಿ ರೂ. ಇದರಲ್ಲಿ ಎಷ್ಟು ಮಂದಿಗೆ ಪರಿಹಾರ ನೀಡಲು ಸಾಧ್ಯ ಎಂದು ಕಿಡಿಕಾರಿದರು.

ಆಟೋ ಡ್ರೈವರ್​ಗಳಿಗೆ ಪ್ರಯಾಣಿಕರಿಲ್ಲ, ಅವರ ಪರಿಸ್ಥಿತಿ ಚಿಂತಾಜನಕವಾಗಿದೆ. ಹೀಗಿದ್ದಾಗ 20 ಕೋಟಿ ರೂ. ಕೊಟ್ಟು ನಾಟಕ ಆಡುತ್ತಿದ್ದೀರಾ. ಜನಗಳ ಜೊತೆ ಚೆಲ್ಲಾಟ ಆಡಬೇಡಿ. ಸುಳ್ಳು ಹೇಳಿ, ಪ್ರಚಾರ ಗಿಟ್ಟಿಸಿ ಸರ್ಕಾರ ನಡೆಸಲು ಸಾಧ್ಯವಿಲ್ಲ ಎಂದು ಕಿಡಿಕಾರಿದರು.

ಜಮೀರ್ ವಿರುದ್ಧ ಕಿಡಿ:

ವಕ್ಫ್​​​ ಬೋರ್ಡ್​ನಿಂದ ಕೋವಿಡ್-19 ಸಿಎಂ‌ ಪರಿಹಾರ ನಿಧಿಗೆ ಹಣ ನೀಡಿಕೆ ಬಗ್ಗೆ ಕೈ ಶಾಸಕ ಜಮೀರ್ ವಿರೋಧಿಸಿರುವುದಕ್ಕೆ ಹೆಚ್​ಡಿಕೆ ಆಕ್ಷೇಪ ವ್ಯಕ್ತಪಡಿಸಿದರು.

ಸರ್ಕಾರಕ್ಕೆ ಪರಿಹಾರ ರೂಪದಲ್ಲಿ ಯಾವುದೇ ಸಂಸ್ಥೆಗಳು ಹಣ ಕೊಡುವುದಕ್ಕೆ ವಿರೋಧಿಸುತ್ತಿರುವುದು ಅತ್ಯಂತ ಬಾಲಿಷ. ಅದಕ್ಕೆ ‌ನನ್ನ ಸಹಮತ ಇಲ್ಲ. ವಕ್ಫ್​​ ಬೋರ್ಡ್ ಹಣವನ್ನು ಕೊರೊನಾ ನಿಯಂತ್ರಣ ಸಿಎಂ ಪರಿಹಾರ ನಿಧಿಗೆ ಕೊಡುವುದಕ್ಕೆ ವಿರೋಧ ವ್ಯಕ್ತಪಡಿಸುತ್ತಿರುವುದು ಅವರಿಗೆ ಶೋಭೆ ತರಲ್ಲ. ಕೊರೊನಾ ಯಾವುದೇ ಜಾತಿ ನೋಡಿ ಬರಲ್ಲ. ಅದಕ್ಕೆ ಯಾರೂ ವಿರೋಧ ವ್ಯಕ್ತಪಡಿಸಬಾರದು ಎಂದರು.