ನವದೆಹಲಿ:ಭಾರತ ಫ್ರೆಂಚ್ನಿಂದ 36 ರಫೇಲ್ ಜೆಟ್ ವಿಮಾನ ಖರೀದಿಯ ಒಪ್ಪಂದ ಅಂತಿಮಗೊಳಿಸಿ ಪ್ರಕಟಣೆ ಹೊರಡಿಸಿದ ಬಳಿಕ ಅನಿಲ್ ಅಂಬಾನಿ ಒಡೆತನದ ರಿಲಯನ್ಸ್ ಕಮ್ಯುನಿಕೇಷನ್ಸ್ನ ಫ್ರಾನ್ಸ್ ನೋಂದಾಯಿತ ಟೆಲಿಕಾಂ ಉಪ ಸಂಸ್ಥೆಗೆ ₹ 11 ಸಾವಿರ ಕೋಟಿ (143.7 ದಶಲಕ್ಷ ಯೂರೋ) ತೆರಿಗೆ ಮೊತ್ತ ವಿನಾಯಿತಿ ನೀಡಲಾಗಿತ್ತು ಎಂದು ಫ್ರಾನ್ಸ್ನ ಸ್ಥಳೀಯ ಮಾಧ್ಯಮ ಪ್ರಕಟಿಸಿದೆ.
ಇದಕ್ಕೆ ಪ್ರತಿಕ್ರಿಯಿಸಿರುವ ರಿಲಯನ್ಸ್ ಕಮ್ಯುನಿಕೇಷನ್ಸ್, ' ನಾವೇನೂ ತಪ್ಪು ಮಾಡಿಲ್ಲ, ಕಾನೂನಿನ ಚೌಕಟ್ಟಿನ ವ್ಯಾಪ್ತಿಯೊಳಗೆ ನಮ್ಮ ತೆರಿಗೆ ವಿವಾದವನ್ನು ಇತ್ಯರ್ಥ ಪಡಿಸಿಕೊಂಡಿದ್ದೇವೆ. ಫ್ರಾನ್ಸ್ನಲ್ಲಿ ಕಾರ್ಯನಿರ್ವಹಿಸುತ್ತಿರುವ ಎಲ್ಲ ಕಂಪನಿಗಳಿಗೂ ಈ ರೀತಿಯ ಸೌಲಭ್ಯ ಸಿಗುತ್ತಿದೆ' ಎಂದು ಸ್ಪಷ್ಟನೆ ನೀಡಿದೆ.
ಫ್ರಾನ್ ತೆರಿಗೆ ಸಂಸ್ಥೆ ರಿಲಯನ್ಸ್ ಫ್ಲ್ಯಾಗ್ ಅಟ್ಲಾಂಟಿಕ್‌ ಫ್ರಾನ್ಸ್ ಕಂಪನಿಯಿಂದ ₹ 1,182 ಕೋಟಿ (151 ದಶಲಕ್ಷ ಯೂರೋ) ಪಾವತಿ ಕೇಳಿತ್ತು. ಅಂತಿಮವಾಗಿ ಈ ತೆರಿಗೆ ವಿವಾದ ಇತ್ಯರ್ಥಗೊಳ್ಳುವಲ್ಲಿ ₹ 57 ಕೋಟಿ (7.3 ದಶಲಕ್ಷ ಯೂರೋ) ಪಡೆಯಿತು. ರಿಲಯನ್ಸ್ ಫ್ಯಾಗ್ ಸಂಸ್ಥೆ ಫ್ರಾನ್ಸ್ನಲ್ಲಿ ಟೆರೆಸ್ಟ್ರಿಯಲ್ ಕೇಬಲ್ ನೆಟ್ ವರ್ಕ್ ಹಾಗೂ ಇತರ ಟೆಲಿಕಾಂ ಮೂಲ ಸೌಕರ್ಯಗಳ ಒಡೆತನ ಹೊಂದಿದೆ.
ಈ ಬಗ್ಗೆ ಸ್ಪಷ್ಟೀಕರಣ ನೀಡಿರುವ ರಕ್ಷಣಾ ಸಚಿವಾಲಯ ತೆರಿಗೆ ವಿವಾದ ಮತ್ತು ರಫೇಲ್ ಒಪ್ಪಂದದ ನಡುವೆ ಯಾವುದೇ ಸಂಬಂಧವಿಲ್ಲ. ಇದು ಸಂಪೂರ್ಣವಾಗಿ ಅಸಮರ್ಪಕವಾಗಿದೆ ಎಂದಿದೆ.
ಪ್ರಧಾನಿ ನರೇಂದ್ರ ಮೋದಿ ಅವರು ಆಗಿನ ಫ್ರಾನ್ಸ್ ಅಧ್ಯಕ್ಷ ಫ್ರಾನ್ಸ್ನ ಹೊಲಾಂಡ್‌ ಅವರೊಂದಿಗೆ 2015ರ ಏಪ್ರಿಲ್‌ 10ರಂದು ಪ್ಯಾರಿಸ್‌ನಲ್ಲಿ ಮಾತುಕತೆ ನಡೆಸಿದ ಬಳಿಕ 36 ರಫೇಲ್ ಫೈಟರ್‌ ಜೆಟ್‌ಗಳ ಖರೀದಿ ವ್ಯವಹಾರವನ್ನು ಪ್ರಕಟಿಸಿದ್ದರು. ಈ ವಹಿವಾಟು 2016ರ ಸೆ.23ರಂದು ಅಂತಿಮಗೊಂಡಿತ್ತು. ರಫೇಲ್ ಒಪ್ಪಂದದಲ್ಲಿ ಸಾಕಷ್ಟು ಅವ್ಯವಹಾರ ನಡೆದಿದೆ. ಅನುಭವವಿಲ್ಲದ ರಿಲಯನ್ಸ್ ಕಂಪನಿಗೆ ನೀಡಲಾಗಿದೆ ಎಂದು ಕಾಂಗ್ರೆಸ್ ಸೇರಿದಂತೆ ಪ್ರತಿ ಪಕ್ಷಗಳು ಆರೋಪಿಸಿವೆ. ಈ ಬಗ್ಗೆ ಸುಪ್ರೀಂಕೋರ್ಟ್ನಲ್ಲಿ ವಿಚಾರಣೆ ನಡೆಯುತ್ತಿದೆ.
